KSOLOK LOLOS

                      “Ksolok tebes ba sira ne’ebe mak tuir Jesus nia dalan”

Ksolok lolos mak saida?  no ksolok lolos mai husi nebe?

    Ema hotu hotu hakarak tebes atu hetan Ksolok moris nian. Tamba balu lakon sira nia tempu atu hetan Ksolok iha sasan mundu nian hanesan: Riku soi, Osan, pozisaun no uja sira nia forsa atu halo atan ba ema kiak no mukit sira. Ema balu mos hanoin katak haksolok mai husi buat hotu nebe mak sei iha capacidade atu halo. Maibe, Jesus rasik hanorin ita katak Ksolok nebe mak lolos mai husi Maromak mesak. Liu husi ita nia fiar no domin ba nia mesak.   

“Segredu ba dame no haksolok nian mai husi ema nebe haluha nia an no fo nia an tomak ba hakonu ho Maromak nia domin” (Beata Ascencion Nicol Goñi, Fundadora Madre Dominicana sira nian). Ema nebe mak fo  nia an atu hadomi Maromak no nakloke ba Maromak nia domin ema ne'e sei hetan domin no ksolok lolos.  Fo domin ba Maromak liu husi fo domin nebe mak nia iha ba nia maun, bin alin sira. Hanesan Madre Teresa Calcuta hatete; “ Ema nebe hakarak hari dame iha mundu ne'e nia tenki  harí husi nia uma laran rasik, komesa husi nia domin ba nia familia sira. Domin nebe mak lolos la buka an rasik maibe buka deit buat nebe mak diak ba ema seluk. “Sasukat domin nian sukat labele” (Beata Ascencion Nicol).

Jesus Cristo mak dalan moris nian. Nia deit mak ita nia domin hun no rohan laek. Ema ne’ebe mak hatene hadomi nia, ema ne sei simu ksolok lalehan nian, no ema ne’ebe mak tuir nia sei hetan bematan moris nian. Hanesan Nia rasik haktuir katak “Ema nebe hamrook, mai hakbesik Ha’u hodi hemu! Ema nebe fiar Ha’u, nudar eskritura hatete tiha: ‘Housi nia fuan sei suli mota be moris nian” (Lia fuan diak ba imi 7:37-38). Hanesan be matan moris nian Jesus mos sei haraik moris ba ema nebe fiar no tuir nia hakarak. Nia bolu ita loro-loron atu lao ho nia. Lao tuir nia la hare ba ita nia Nationalidade, status, profisaun no cultura. Maibe oinsa ita nia hatan ba Nia. Nia bolu ita hotu atu sai nia atan ba reinu lalehan nian. Tamba Nia mak  kria ita, atu servi nia, halao nia servisu iha Igreja no mos iha Mundu nee(Eph 4:1-16). Maromak rasik mak dalan los, lialos, no moris rohan la’ek. Nudar ema moris ita mos tenki hatene hadomi Maromak no ema seluk. Maromak hadomi ita no fo nia an tomak too mate iha kruz atu soi ita. Sao Paulo konvida ita atu sai sasin Maromak nian. Nia habelar liu tan katak Fiar, esperanca no domin ne mai husi Maromak mesak no parte tolu ne domin mak boot liu buat hotu hotu (1 Corrinthians 13:13).

Iha tinan 2013, hau senti katak Jesus bolu hau atu tuir Nia, ho Ksolok tebes hau hatan ba nia katak “hau mak ne'e Nai”. Hau husik familia no buat hotu hotu hodi tuir Nia. Tuir Jesus mak ita ema nia objectivo moris nian. Maibe se ita hakarak tuir Nia ita mos tenki prontu atu tuir buat nebe mak Nia hakarak, hanesan Nia rasik hatete; ema nebe mak hakarak sai Hau nia eskolante nia tenki husik buat hotu, husik nia familia, kolega no buat hotu nebe mak nia hadomi. Nia sei simu liu fali iha moris ne'e.  Tuir Jesus sei la senti falta buat ida se wainhira ita fo ita nia fuan tomak ba Nia deit. Dala barak ita hasoru dezafius, maibe ita nia Ksolok sei metin nafatin tamba Jesus sempre fo tulun ita. Wainhira hau iha ona konventu hau hanoin katak hau sei lakon buat barak se hau husik familia sira. Maibe buat nebe mak Jesus promote sai realidade katak hau nia moris ho nia mak moris nebe lolos. Dalaruma mos hau senti katak Jesus husik hau mesak, maibe buat nebe mak hau hanoin laos buat nebe mak Maromak nia hanoin. Nia hanoin buat nebe mak diak no nakonu ho moris nian mai hau. Atu sai atan ba Maromak ita tenki hatene hadomi ema, tamba hadomi ema mak domin nebe lolos ba Maromak. Ema nebe mak konfesa katak nia hadomi Maromak maibe la hadomi nia maluk sira, nia ne'e laos ema nebe mak lolos. Ita ema nia hahalok nebe lolos mak domin nain. Se ita hakarak tuir Jesus ita tenki hatene atu rona Nia, iha Biblia, iha Igreja, no mos iha ita nia fuan rasik. Hanesan Novicia iha Missionaria Dominicana, hau sempre fo tempu atu rona Jesus nia presenza iha hau nia madre sira, no mos kolega sira tamba sira mak Jesus nia lalenok mai hau. Dala barak mos hau hetan Jesus iha hau nia servisu ba komunidade no kolega sira. Maromak bolu ita hotu hotu iha dalan oi-oin. Nia bolu ita atu sai Inan, professora, Doutora, no servisu seluk seluk maibe buat nebe mak ita halao mak servisu ho domin ba ita maluk sira.

Hakerek Nain: Rosaria Aurea Ximenes

Aurea ho belun Novicias iha etapa tinan kanóniku

  Novicias hamutuk ho madre formadoras iha  Filipina