“HO PERSEVERANSA, IMI SEI SOI IMI NIA KLAMAR” (Lk. 21:19)

                                                          DOMINGO XXIII TEMPU BAIBAIN

1a. Leitura: 3:19-20a

2a. Leitura: 2Tes. 3:7-12

Evangelho: Lk. 21:5-19

 

Mundo ne’ebé ita hela dadaun ba, sei lori ita hasoru realidade sira hotu ne’ebé mak ita rona husi Leitura ohin nianne’ebé  hateten: funu no revolusaun entre reino ida ho reino seluk, hamlaha, moras, odio malu, oho malu, lia falsu no seluk tan.

Krije hirak ne’e ohin loron acontese hela duni iha ita leet hodi halo maluk barak sofre. Hare’e ba contesto ita nia rai laran rasik, ita mos hatene hela katak: tempo ba tempo iha belun barak mak sei odio malu, moris nakonu ho depresaun hodi resulta sira atu habadak sira nia vida iha dalan ne’ebé lajusto. Belun sira balu terus tamba laiha hahan atu bele sustenta sira nia moris; balun terus ho moras oi-oin ne’ebé susar atu kura tamba problema financial; maluk balun sai vitima ba lia falsu no bosok sira.

Profeta falsu sira mos mosu ba dadaun hodi lori Maromak nia naran bosok tun sae atu manan maluk balun nia fuan. Problema hirak ne real tebes hodi halo ita barak moris la hakmatek no moris iha tauk nia laran. Los duni katak ita nia moris hanesan ema religiosa ida, dalawain ita sente buat hotu lao diak hela deit, tamba ita nia moris asegura tebes ho buat hotu. Maibe ita mos fuan sempre taridu wainhira ita nia familia ou belun ida mak hasoru problema hirak ne’ebé mak mensiona ona. Ita nia fuan mos la hakmatek wainhira rona nasaun sira funu hasoru malu.

Tan ne’e diak tebes ba ita atu tempo ba tempo bele husu ita nia an perguntas hirak nee: contribuisaun saida mak hau bele halo atu ba hau nia maluk sira ne’ebé sente moris ne lahakmatek? Saida mak hau bele ofrese ba maluk hirak ne’ebé presiza tebes ajuda? Saida mak hau sente se hau mak sai vitima ba kaju hirak nee? (tauk ou trauma? Fiar nakdoko ou lakon esperanca?) Fraquesa sa mak hau iha wainhira moris nee nia realidade moruk tebes? Hau halai sees? Ou hau pronto atu hasoru ho fiar ne’ebé metin?

Jesus nia mensagem ohin loron nian hafanun ita nia fuan atu labele laran taridu no tauk ba moris realidade moruk nian nebe mak ita hasoru hela nee. Lian murak Evangelio nian nee hateten ita atu iha Esperansa nafatin hodi lao ba oin ho aten brani. Nomos encoraja tebes ita atu haree ba oin ho fuan ne’ebé nakonu ho fiar katak ita la lao mesak iha susar hirak nee nia laran tan Maromak rasik sei salva ita no lao ho ita. Tamba nee ita nafatin tau neon ba Maromak no firme iha ita nia fiar. Pasensia sei lori ita manan buat hotu iha loron ida. Tamba ne Jesus dehan: ho persevaransa, imi sei soi imi nia klamar.

Jesus bolu no hili ita iha dalan unico ida nee, tan Nia hakarak ita atu continua Nia misaun. Nia hakarak ita atu sai instrumento Esperansa nian ba ema hirak ne’ebé lakon esperanca. Sai instrumento domin nian ba maluk hirak nebe moris iha odio nia laran. Sai instrumento ksolok nian ba maluk hirak ne’ebé moris iha triste nia laran, nst.

Ita harohan atu Nai ho Ninia domin boot hakoak nafatin ita nia maluk sira nebe’e mak moris hela iha krije hirak nee nia laran. No ita husu mos atu Nai haraik mai ita Espirito Sabiduria nian atu guia nafatin ita iha Misaun hotu ne’ebé Nia rasik tau fiar hela ba ita atu halao.

Reflesaun husi: Irmã Leonarda Evangelista, OP

Kontinua Le'e

JESUS PURIFICA UMA ORASAUN NIAN HO NINIA DOMIN

DEDICAÇÃO DA BASÍLICA DE LATRÃO

 

1a. Leitura: Ez. 47:1-2,8-9,12 

2a. Leitura: 1 Cor. 3:9c-11, 16-17 

Evanjelho: Jo. 2:13-22 

 

Ita mak Maromak nia saseluk. Maromak, tan domin boot, Nia kria ita tuir Nia ilas rasik no fo ba ita presente furak mak: liberdade. Tamba ne ita nia isin ne sagrado tebes, tamba Maromak rasik hola trono iha ita ida idak nia templo; Nia horik ho ita no halo ita sai Nia oan doben lolos.   

Leitura sira ohin loron nian koalia kona ba uma orasaun ou santuario. Uma orasaun mak fatin sagrado ida ne’ebé halibur ita hodi hahi no hanai Maromak; nomos fatin ne’ebé Maromak ho ita ema hasoru malu.

Ohin Santa kreda mos celebra loron bot dedicasaun Lateran Basilica nian. Festa boot ida ne’e fo hanoin mai ita kona ba importancia uma kreda nian hanesan fatin sagrado ida ne’ebé Maromak rasik mak consagra. Los duni katak ita laos deit koalia kona ba uma orasaun hanesan uma mahon ida ne’ebé halibur ita; maibe ita koalia refere liu kona ba ita nia isin hanesan templo furak ida ne’ebé Maromak kria no nia rasik horik iha templo nee hanesan Sao Paul iha nia karta ba Korintos ne’ebé hateten: Imi mak Maromak nia uma orasaun nian no Maromak nia Espirito horik ho imi.

Dalawain, ita halo uma orasaun nee foer tebes ho ita nia sala sira; ita nia fraquesa no hahalok at sira hafoer no hasobu templo furak nee, no ikus mai templo ne mos lakon ninia bonita. Tamba ne’e Jesus iha Evangelio ohin nian hakarak atu hamos templo nee no nia promete atu hari’i hikas fali iha loron tolu nia laran.

Jesus rasik mak templo nee nia nain. No ita hotu parte iha templo nee hanesan familia ida deit no fahe identidade hanesan Jesus nia belun diak. Jesus nia aksaun hirus iha Evangelio ohin nian ne’e hirus ne’ebé que justo duni.

Aksaun ne’e lori ita atu realiza katak dalaruma mos ita presisa husi ita nia an atu Maromak purifica. Tamba ita sai atan ba sala, no ita lakon ita nia bonita nudar Maromak nia ilas lolos.

 Importante mai ita atu rekonhese an nudar ema maksalak ida ne’ebé precisa Maromak nia tulun atu purifica ita husi ita nia sala sira nebee hafoer ona ita. Ita ofrese an atu Maromak bele restora fali ita atu sai kriasaun murak no bonita nebee mak antes nee Maromak kria. Sala haketak ita husi Maromak nia grasa, no halo ita haluha katak ita nia isin mak Maromak nia Santuario ne’ebé Nia santifica ona ho grasa Batismo nian.

Mai ita harohan atu Nai ho Nia laran sadia nafatin habelun ita iha ita nia hakat sira loron ba loron. Amen!

Reflesaun Husi: Irmã Leonarda Evangelista, OP

Kontinua Le'e

HUMILDADE MAK DALAN BA NA’I MAROMAK NIA FUAN

                                                     

                                                         Domingo XXX Tempu Baibain

 

1a. Leitura: Sir. 35:12-14,16-18 

2a. Leitura: 2 Tim 4:6-8,16-18 

Evangelho: Luk. 18:9-14  

Ita koko tok hare fila fali ba ita nia a’an, oinsa ita harohan? Será que ita harohan hanesan ema farizeu ka ema publicano? Fo tempu atu reflete no hare ba ita nia a’an rasik nune’e ita bele hatene qualidade husi ita nia orasaun sira. Dala ruma ita harohan hanesan ema farizeo; koalia deit kona ba ita nia a’an ou ita nia diak sira ba Nai Maromak maibe ita haluha sei ita  nia orasaun sira monu ba  Maromak nia laran ka lae?

Jesus fo hanoin ita iha Evangelho ohin loron nian atu hare tuir ezemplo ema publicano nian. Nia harohan nune’e: “ Na’I sadia hau, basá hau ema maksalak.” Nia reza ho liafuan uitoan maibe iha sentido klean no hatudu momos saida mak intensaun iha nia fuan.

Iha ita nia orasaun lor-loron alem de ita tenki iha fiar makaas no hatene agredese, ita mos presiza hatene haraik a’an. Basá Nai Maromak rona ba sira ne’ebé haraik an no hetan opressaun. Iha primeria leitura, ita rona katak Nai Maromak la ignora sira nia apelo, maibe nia garante  justisa ba sira. Nai mak Maromak Justisa nian, Nia la hili deit ema balun. (Sir. 35:12)

Iha Evangelho hatudu katak hipocrisia la’os dalan ba Nai Maromak nia fuan, maibe sim ho humildade ou arrependimento. Humildade mos lori ita hatene saida mak orasaun sincera tan  Maromak valoriza liu orasaun sincera do que hahalok hatudu an demais.

Humildade mak fundamental atu hetan paz ho Nai Maromak. Wainhira ita hetan paz ho Nai Maromak, ita mos sei cria paz no estabilidade ba ita nia rain, comunidade, familia, no ba ita nia a’an.

Hanesan Mensagem husi ita nia Prezidente Jose Ramos Horta hato’o ba  adezaun Timor-Leste ba ASEAN katak Timor-Leste tenki sai nasaun da paz no nasaun de esperansa.

Serbisu lubuk ida ita Timor oan sira tenki halo atu compete iha areas oi-oin maibe liu-liu ita hanoin nafatin atu haforsa virtude haraik a’an nian. Katak ita presiza nafatin Na’I Maromak atu tulun ita iha processo de dezenvolvimento iha ita nia rain.

Ho koslok boot no orgulho tan hetan vitoria ida ne’e, maibe mos ho haraik an recunhese katak ita sei falta iha buat barak no ita sei fraku maibe ita fiar Nai Maromak la taka matan mai ita no bele hananu ho Salmo responsorial ohin loron nian: Nai Maromak rona kiak sira nia halerik.

 

Reflesaun Husi: Irmã Maria de Fatima Pui, OP

Kontinua Le'e

Tau confiansa iha Maromak Nia justisa mesmu que demora uitoan

                                                      Domingo XXIX TEMPU BAIBAIN

 

1a. Leitura: Ex. 17:8-13

2a. Leitura: 2 Tim. 3:14-4:2

Evangelho: Lk. 18:1-8

 

        Hanesan fiar nain, ita tenki harohan lor-loron. Ita precis duni atu harohan maibe ohin loron ema barak harohan ba Nai Maromak liu-liu wainhira hasoru terus no susar ou dificuldade ruma. Wainhira ita precisa Nai Maromak, ita halai lalais ba oratorio atu sunu lilin hodi harohan. Dala ruma ita protes ba Nai Maromak tansa Nia la rona ita nia orasaun sira? Los duni ita harohan lor-loron ho orasaun oi-oin deit maibe pergunta mak ne: oinsa ita harohan?

Iha Liafuan Diak ohin loron Jesus hateten ba discipulo sira aiknanoik ida kona ba necesidade ba sira atu harohan nafatin sem kole. Nia desafia ita  ho  parábola feto faluk  persistente. Iha Evangelho ohin nian, Jesus uza aiknanoik atu hanorin ita kona poder husi orasaun persistente no necesidade atu tau confiansa iha  Maromak Nia justisa mesmu que demora uitoan.

    Hare ba realidade moris  mundo ohin loron nian, buat hot-hotu lalais no instant, ita husu ba ita nia a’an bele ka lae ita hein atu Nai Maromak hatan ba ita nia orasaun sira? Harohan deit la to’o. Ita precisa harohan no iha fiar makaas. Iha liafuan ikus evangelho nian Jesus husu: Se Mane Maksoin fila fali mai, Nia sei hetan fiar iha rai klaran?

Fiar katak confiansa, certeza, no seguransa iha Maromak. Los duni Ita fiar iha Na’I Maromak maibe fiar ida ne’e oinsa ona? Sarani balun moe atu discuti kona ba sira nia fiar, mentras balun mos gosta los atu profesa sira nia fiar iha publico. Balun uza crus hanesan acesorias atu simboliza sira nia fiar no devosaun ba Jesus. Importante liu atu ita hatene katak haklaken publicamente Jesus hanesan Maromak la hanesan moris tuir Jesus. Tuir Jesus mak hatene rona no halo tuir. Trata atu tau iha practica Jesus ninia hanorin sira no  mos hatudu iha estilo moris iha dame no justisa.

Iha contexto Timor nian, tuir istoria katak Missionarios Dominicanos sai hanesan missionarios dahuluk kari ona fini fiar nian ba ita nia rain. Fini fiar nian buras ba dadauk. Tan fiar ida ne’e mak ita iha determinasaun hasoru terus oi-oin to’o ohin loron ita moris iha liberdade nia laran. Ita la rejisti no luta ba ita nia moris.

Papa Francisco iha nia vizita ba ita nia rain hahi ita rain no nia emar sira tan iha pacensia iha determinasaun no heroismo memsu que nasaun hasoru momentos tribulasaun oi-oin. Nune’e Nia dehan “ Atu nia fiar ida ne’e bele ilumina no sustenta iha passado, continua inspira iha imi nia futuro.” Nia hatutan tan katak: iha motivo atu confia nafatin katak imi nia nasaun mos bele enfrenta, iha forma inteligente no creativa ba dificuldades no problemas ohin loron nian.”

Nune’e, ohin loron iha Domingo ba Missaun ita harohan ba missionario/as hotu iha mundo raiklaran no ba ita hotu atu bele permanese fiel ba saida mak  aprende no fiar ona, tamba cunhese saida mak ita aprende, no desde infancia cunhese Sagradas Escrituras, mak bele fo  sabedoria ba salvasaun liu husi fiar iha Cristo Jesus.( 2 Tim. 3:14-4:2)

 

Reflesaun Husi: Irmã Maria de Fatima Pui, OP

Kontinua Le'e

Se mak iha fiar, hatene agradese

                                                         Domingo XXVIII iha Tempo Baibain

1a. leitura: 2 Reis 5, 14-17

2a. leitura: 2 Timóteo 2, 8-13

Evangelho: Lucas 17, 11-19

Moras lepra conhecida hanesan moras Hansen ida, katak moras ida infecciosa crónica causada principalmente husi tipo bactéria ida hanaran Mycobacterium leprae. Moras ida ne’e afeta ita nia kulit, dala barak isin lolon deforma tiha no sei isin ne’e kanek tamba moras ne’e, sei dois no ema tauk atu hakbesik. Nune’e mak  sira ne’ebé hetan moras lepra ne’e laos isin mak deforma tiha maibe hasoru descriminasaun husi sociedade tan moras ne’e bele daet ba ema seluk nune’e sira tenki hela mesak.

Tuir report husi “ World Health Organization” haktuir katak: tinan-tinan iha mundo tomak registo besik ema 208,000 mak infetadas, liu-liu iha África e na Ásia. Iha Timor mos ida munisípiu balun hanesan Oecusse, Ainaro, Manatuto, no Baucau, registo ho moras lepra. No entanto, ohin loron moras ne’e bele ona hetan kura sei halo  tratamento cedu.

Leituras sira ohin koalia kona ba cura Naamã husi lepra no leprosos nain sanulu ne’ebé hetan kura husi Jesus.  Depois de sira hetan cura, Naamã hakbesik ba Eliseu no ofresse ba nia prezente ida, recunhese hanesan Maromak nia instrumento. Embora Jesus cura tiha sira nain sanulu, ida deit mak fila atu agradese. Nia ema Samaritano ida. Jesus dehan ba nia: ita nia fiar mak soi ita.( Luk 17:19)

Ita nia fiar hanorin ita katak se ita iha fiar makaas ita sei hetan cura husi ita nia moras sira maibe ita mos tenki buka tratamento ruma. Alem de ida ne’e, se hetan ona isin diak, keta haluha agradese. Ita agradese laos hanesan obrigasaun ida maibe se ita hatene agradese, ita sei  haksolok no ksolok ida ne’e sei halo ita nia moris saudavel.

Se ita fiar, ita hatene agradese. Nune’e, mai ita hasa’e ita nia agradesemento ba Maromak ba buat diak hotu Nia haraik mai ita. Mesmu que dala barak ita mos ingrata no haluha agradese ba Nia no ba ita nia maluk sira, maibe Nia fiel nafatin ba ita. Iha Saun Paulo iha carta ba Timoteo dehan nune’e: mesmu que ita la fiel ba Nia maibe Nia fiel nafatin ba ita.( 2Tim. 2:13)

Tamba ne’e, maluk sira, ohin loron, fo tempu atu agradese ba Maromak ba fo ona oportunidade ba ita atu moris. Iha tempu diak no deficil nia laran nafatin agradese ba Nia. Tan sei ita haluha ona agradese, ita mos haluha ona kona ba ita nia fiar iha Maromak. Buat hotu ita simu gratuita, tamba sa mak ita la hatene agradese?

Iha Teólogo e escritor dominicano ida haktuir nune’e: “Se orasaun ida deit ita halo iha ita nia moris tomak mak agradecimento, ida ne’e naton ona.” (Meister Eckhart)

Reflesaun husi: Irmã Maria de Fatima Pui, OP

Kontinua Le'e

Nain Feto do Rosário

Rosário ne’ebé ita cunhese ohin dezenvolve desde seculos, maibe sai hanesan prática cristaun sira uluk nian kona ba orasaun  repetitiva. Rosários ou cordões ajuda cristaun sira atu controla sira nia orasaun. Iha século XII, sai hanesan prática comun atu  recita 150 Ave-Marias, corresponde ba 150 salmos.

Rosário continua sai fonte de conforto, força no graça ba milhões católicos. Nia simplicidade no  profundidade permite sarani sira  meditar kona ba Cristo nia Moris, no   intercessão da Virgem Maria. Ao longo da história, Santos barak, inclui São Luís de Montfort no São Padre Pio, hahi virtudes do Rosário no nia valor transformador.

Festa Nain feto do Rosario nian monu iha loron 7 de Outubro. Tuir tradisaun, Saun Domingos simu rosario husi Nain Feto atu combate heresia (dutrina la los) no lori klamar sira fila ba Maromak.

Ami nia Congresaun moris iha vesperas Festa Nain Feto do Rosario nian( dia 5 de Outubro). Iha Nain Feto ami rekonhese nudar eskolante diak, nudar feto orante, serbisu makas, atu hari'i fraternidade, ofresse an, la hanoin an no hakarak hatutan nafatin domin.

Atenta nafatin ba Maromak nia planu no Ninia istoria, ne’ebé mak hananu no selebra nafatin ho hahi atan sira no habosu hamlaha, nia mak ami nia bematan inspirasaun iha ami nia missaun, haforsa nafatin ami ho diak no tau matan nafatin baa tan feto sira ne’ebé mak lao sai husi kultura rasik ba moris iha diversidade relijioso nian. Lor-loron ami reza rosario tan ami fiar katak Nain Feto mak sai hanesan modela atu sai escolante fiel hodi la’o tuir Jesus nia ain fatin.

Mai ita haboot ita nia devosaun ba Nain Feto do Rosario tan iha Timor mos iha festa nain feto nian ita selebra loron festa peregrinasaun nasional Nain Feto Ramelau. Iha Nain Feto Ramelau nia ain iha foto religiosa Dominicana ida, Irmã Laura Sarmento, OP ne’ebé fila ona ba Aman Maromak wainhira nia fila husi peregrinasaun ba Nain Feto iha tinan 2007.

Iha familia sira, mai ita hamoris fila fali reza rosario iha uma laran tan liu husi Nain Feto nia harohan da’et, ita bele hetan moris diak, hakmatek no haksolok iha ita nia familia, comunidade, rain, no iha mundo. Liu-liu iha fulan ida ne’e, Papa Leão fo hanoin ita atu reza ba paz iha mundo.

Nain Feto do Rosario: Harohan Mai Ami.

 

 

Kontinua Le'e

Dominicana: Haklaken Jesus Cristo no Nia Misericordia ba ema hotu

 Dominicanas: 

São Domingos de Gusmão hari’I familia Dominicana iha dia 22 de Dezembro de 1216. Nia hakarak familia ida ba Igreja para haklaken Jesus Cristo no Nia misericórdia ba ema hotu. Ho ninia espiritualidade mak: orasaun, estudo, vida comum no pregasaun.

Família dominicana mak frei sira, irmãs contemplativas, congregações de irmãs vida apostólica nian, fraternidade leigos, grupos jovens, institutos seculares e fraternidade padres seculares.

Ami pertense ba familia boot ida ne’e. Tan ami nia fundadores sira: Msgr. Ramón Zubieta, bispo dominicano no Beata Ascensión Nicol, religiosa semi-contemplativa dominicana.

Portanto, ami moris hanesan bin alin iha comunidade liu husi estudo no orasaun, mak sai naroman necesario atu descovre Maromak iha realidade moris nian no recunhese sinal moris no sombras ne’ebé perfura ita nia humanidade ne’ebé kanek.

Maromak nia liafuan mak nutre ami nia compromisso ba Na’I nia reino no dudu ami nia inisiativas no projeto sira. Liafuan Diak ida ne’e mak sai fonte ba ami nia haklaken ho liafuan iha pregasaun no hahalok iha testemunha moris lor-loron nian.

Kontinua Le'e

Tamba sa Missionária?

Missionarias : 

Ami nia kongregasaun Missionaria ida. Hari’I iha Maldonado, Peru iha dia 5 de Outubro de 1918. Ohin loron komposto husi Irmãs sira husi  nasionalidade oi-oin mak marka prezensa iha mundu tomak.( Iha Europa, Amerika Latina, Asia, no Africa). Ami nia vokasaun atu haklaken Jesus Nia Liafuan Diak no Maromak nia laran diak ba maluk sira ne’ebé kiak liu no iha fatin sira ne’ebé kreda presiza liu ami nia prezensa.

Ami hela komunidade kiik inserta iha kiak sira le’et hodi comparte ami nia moris ho sira nune’e ami bele haklaken liberdade ba sira ne’ebé ema hanehan.

Ami fiar iha fraternidade universal, konfia iha posibilidade atu harii mundu iha diversidade. Nune’e ami fo valor ba interculturalidade. Ami respeita no fiar iha unidade iha diversidade cultura oi-oin.

Ami mos fiar iha kbiit feto nian hodi liberta, nudar be matan moris no kmook, hametin an iha relasaun humana, hanesan Feto samaritana. Liu husi ami nia encontro pessoal ho Jesus ho ksolok iha fuan ba fahe encontro furak ida ne’e hodi tulun no defende  maluk hirak ne’ebé sei terus no vulnerável iha rai ne’e.

Ami forma an atu sai Missionarias. Ohin loron iha Missionarias Timor oan barak hala’o hela missaun Jesus nian iha rai liur hanesan Taiwan, Macau, Filipinas, no Espanha. No parte husi formasaun ba vida missionaria nian, ami nia fatin formasaun ba Noviciado iha Noviciado Continente Asiatico, Manila, Filipinas no Junioarado Congregasional iha Aldaia, Espanha no Guatemala.

Ba sira ne’ebé hakarak entrega an atu hadomi no servi Nai Maromak liu husi maluk sira liu husi vida missionária consagrada bele koko sai parte ba familia Missionarias Dominicanas do Rosário.

Irmã Maria de Fatima Pui, OP

 

Kontinua Le'e

Domin no Laran Luak

Domingo XXVI Tempu Baibain

1.ª Leitura: Am. 6:1a, 4-7

2a. Leitura: 1 Tim. 6:11-16

Evangelho: Lk. 16:19-31

Mundu ohin loron, barak liu ho ema ne’ebe moris defisil tebes. No mos barak mak moris iha luxu, ou riku. Husi ne’e ita define, katak serteza kiak barak tebes, mak esperensia moris iha injustice no hamlaha nia laran. Refleksaun ba ita ohin loron mak oinsa atu hatudu domin no laran luak ba ita nia maluk sira. Tamba Eskritura rasik dehan: Ksolok ba ema ne’ebe laran luak sei hetan rahun diak” (Mt. 5:7).

Leituras ohin loron mos motiva ita oinsa atu hatudu domin no laran luak ba ema seluk. Tamba dalabark liu mak iha egoista ne’ebé la hare’e ba ema ne’ebé mak iha ita nia sori-sorin. Foti matan ba leten maibe haluhan an katak hau nia ain sei hakat hela.  Hanesan Evangelho ne’ebé hateten katak ema riku moris iha luxu ho kiak Lazarus  moris iha susar nia laran (Lk 16:21).

Husi ne’e hafanun ita atu matan moris ba sasan ne’ebé mak haleu` hela ita. Hanesan sarani Kristaun, ita mos tenke loke matan ba maluk sira ne’ebeé presiza tebes ita nia tulun, laos siknifika atu fahe deit sasan, maibe impotante mak hakbesik ba sira rona sira nia presiza ho fuan domin nian.

Ida ne’e mak ita nia Karisma hanorin ita atu: “hakbesik ba kiak sira ne’ebé mak presiza tebes.” Hatan ba ida ne’e ita hetan iha livru Proverbios ne’ebe dehan: Rahun diak ba ema ne’ebe laran luak, nia sei hetan bensaun tamba fahe ona nia sasan ba ema kiak sira (Pro. 22:9).

Husi kiak Lazarus nia istoria konvida ita atu reflete se mak “Lazarus”, mak ema ne’ebé iha ita nia comunidade, iha ita nia familia, maka ema ne’ebe presiza tebes, ou maka ema ne’ebe ita lao ba finji lahare?

Jesus fo hanoin ita oinsa atu fo konsiderasaun atu uza sasan, husi osan ne’ebé mak ita iha, ita nia emosaun, no mos ita nia espiritual. Tamba isin la servisu hamutuk ho emosaun no espiritual nian mak hanesan ema riku ne’eb éJesus mensiona iha Evangelo ohin nian. Ne’ebé taka nia fuan no matan delek ba nia maluk Lazarus ne’ebé mak presiza tebes nia tulun. Eskritura hateten: “Ema ne’ebé foti an Maromak sei hatun nia” (Lk 1:52).

Pergunta ba ita an katak hau ne ema ne’ebé hatene fahe sasan? ou hanesan ema ne’ebe riku hodi sai matan delek ba hau nia maluk ne’ebé presiza tebes?

Hare ba mundu ohin loron nian katak ema ida-ida iha moris sempre ne’eb diéfferente, balu riku no kiak.  Maibe funsaun husi riku ne’e, atu tulun ba ema kiak sira, tamba sasan ne’ebé maka ita iha ne’e hetan bensaun husi Maromak, maibe sempre mosu ho kontra kona ba Maromak Nia hakarak, ema ne’eb ré riku foti an ba ema kiak sira.

Tamba ne’e Jesus fo hanoin ita oinsa hatudu domin no laran luak ba maluk seluk. Ida ne’e mak valor ne’ebé ass tebes ba ita fiar nain sira. Husi ukun fuan sanulu nebe fahe ba parte rua, mak Hadomi Nai Maromak no maluk sira. Objectivu atu moris nian maka hatudu laran luak ba ema seluk, atu nune’e bele hetan moris ne’eb é rohan laek iha loron ikus.

 

Reflesaun Husi: Irmã Florinda Fernandes, OP

Kontinua Le'e

SERVI NA’I MAROMAK MESAK DEIT

          

Domingo XXV Tempu Baibain

1.ª Leitura: Am. 8:4-7

2a. Leitura: 1 Tim. 2:1-8

Evangelho: Lc. 16:1-13 ou 10-13

 

Leituras sira ohin loron nian konvida ita atu honestu husi aksaun no intensaun sira. Husi primeira leitura Profeta Amos koalia kona ba injustisa ne’ebé maka mosu iha tempu ne’eba. Iha Segunda leitura Saun Paulo obriga ita atu harohan ba ita nia lider no autoridade sira atu nune’e ita bele moris hakmatek. Husi Evangelho ohin nian Jesus bolu ita atu labele servi Maromak ho servi osan.

Menssagen ohin loron nian haruka ita atu  servi Maromak deit. Husi menssagen ne lori ita atu reflete kona ba ita nia moris kompara ba rikusoin ne’ebé maka ita halibur ou iha, hodi halo examinsaun ba ita nia-an katak, oinsa hau maneza rikusoin sira ne’ebé ita iha?

Ida ne’e fo hanoin ita oinsa ita atu utiliza rikusoin hotu tuir saida mak Maromak hakarak. Tamba rikusoin sira ne’e hanesan instrumetu deit. Maibe dalabrak liu mak ita servi osan diak liu duke servi Maromak. Iha Saun Paulo nia carta dahuluk ba Timotio dehan “ema ne’ebe hadomi liu osan mak ema ne’ebe metin lo’os iha diabu nia hanoin.”( 1 Tim. 6:10). Diabu nia servisu ne’ebé maka halo ita atu buka tan no simu tan. No osan mos bele halo ita atu sosa ema seluk nia laran luak. Hanesan mane ida ne’ebé Jesus fo sai iha Evangelho ohin, wainhira nia mestre hatene ona katak nia halo lalos iha nia servisu sira, nia komesa halo dalan oioin atu sosa ema nia laran luak( Lk 16:4).

Husi leituras sira ne’e mos lori ita atu ba hare’e  kona ba situasaun saida maka akontese iha mundo agora nian. Ema barak hetan terus tamba injustisa ne’ebé mak domina hodi halakon naroman. Tamba laiha honestu ba servisu ne’e rasik. Hanesan Profeta Amos hateten: ita sei halo dasin falsu atu han matak (Am. 8:5). Realidade tempu agora ema ne’ebé mak riku subar injustisa ne’e rasik, tamba lakoi ema kiik atu halo liu, husi ida ne’eba mak mosu kompetisaun ne’ebé mak la justu. Nune’e ema barak mak sei susar no terus hela.

Jesus nia menssagen lor-loron sira iha Sagrada Eskritura fo hanoin ba ita atu uza sasan mundo nian tuir nia fatin. Atu nune’e ita bele moris tuir hanorin Maromak nian. Jesus hateten” Ema ida labele servi mestre rua, no nia sei hahi ida no hewai ida seluk”( Lk 16:13). Sei ita la tuir Maromak nia hakarak mak dala barak ita hahi liu sasan ne’ebé mak lafo benefisiu ba ita nia klamar.  Husi evangelho ne’e nafatin fo hanoin no haforsa ita ho menssagen ne’ebé atu honestu ba ita nia-an kona ba  servisu ne’ebé mak ita hetan, atu uza sasan mundo nian ho responsabilidade,

Hare’e kona ba situasaun ne’ebé mak akontese iha ita nia rain, liliu ba ita nia nai ulun sira, Katak atu uza rikusoin hotu ho matenek, no oportunidade sira ho diak atu servi rai ne’e no mos ba diak ema hotu-hotu nian. Laos ba individualismo maibe servi hanesan kommun ida atu nu’une’e ema hotu hotu hodi sente liberdade ne’e rasik.

Ikus mai, Saun Paulo mos haruka ita atu reza ba ita nia nai ulun sira, atu iha fuan ne’ebe maka nakonu ho Maromak Nia bensaun atu nu’une’e, bele hare no hatan ba povu nia presiza sira.

 

Reflesaun Husi: Irmã Florinda Fernandes, OP

Kontinua Le'e