IMI DEHAN HA’U NE SE?

 

Solenidade S. Pedro no S.Paulo

1a. leitura: Acts 12:1-11

2a. leitura: 2Tm 4:6-8,17-18

Evanjelho: Mt 16:13-19

Ohin loron ita celebra Solenidade são Pedro no são Paulo nian. Apostulo nai rua ne’e mai ho personalidade no “background” ne’ebé la hanesan maibe Maromak hili sira atu habelar Ninia liafuan di’ak ba Mundo. Na’i la hare ba sira nia frakesa sira no mos sira nia matenek maibe Maromak fihir sira tamba sira iha potensia atu sai Ninia instrumentu.

Iha premeira no segunda leitura convida ita atu reflete kona ba oinsa ita atu tau nafatin ita nia fiar no confiansa ba Maromak bainhira ita iha hela situasuan difisil nia laran. Hanesan São Pedro ne’ebé Herodes hatama nia iha kadea maibe Maromak haruka ninia anjo hodi tulun nia sai husi Herodes nia liman.

Nune’e mos são Paulo Haruka ninia karta ba Timotéo hodi encoraja atu nafatin tau laran metin iha Na’i Maromak basa iha nia de’t mak ita hetan kbiit no forsa hodi hasoru circumstancia oi-oin ne’ebé ita hasoru iha moris ida ne’e.

Iha evanjelho ohin nian haktuir mai ita kona ba S. Pedro ne’ebé profesa ninia fiar ba Jesus bainhira Jesus husu sira dehan:imi dehan Hau ne’e se? Pedro hatan ba Jesus dehan: Ita mak Messias, Maromak nia Oan Mane.Tuir contextu Biblical nian ita bele dehan Na'i Jesus mak ita nia Salvador, Bibi atan diak, Liurai, Dalan no Lialos. 

 Portantu, Evanjelho ohin loron nian convida ita ida-idak atu reflete no husu ba ita nia an oinsa mak  ita nia relasaun ho Nai no se mak Jesus mai ita? Ita laos atu copi ka tuir deit contextu ka saida mak ita aprende ona maibe importante liu mak ita precisa atu hametin no aprofundiza  liu tan ita nia comprensaun no fiar ba Maromak liu husi ita nia orasaun perssoal. Nune’e ita bele responde ka hatan  ba Jesus nia perguntas ne’ebé nia husu ba ita liu husi ita nia laran no fuan rasik. 

Tanba ne’e, ita hotu continua fo tempu ba ita nia an hodi husu ba ita nia a’an: Hau ne’e se? Pergunta ida ne’ebé facil atu husu maibe lori moris tomak atu hetan ninia resposta. Se ita hatene ona hatan ba pergunta ne’e, ita mos bele hatan ba Jesus Nia pergunta: Ba imi Ha’u ne’e se? Se seidauk bele hetan resposta, keta laran taridu atu tau nafatin ita nia esperansa iha Jesus liu husi hametin ita nia relasaun pessoal ho nia Nia ita nia orasaun no consciente ho Ninia prezensa iha ita nia moris, basá Nia mak buat hotu nia hun.

Iha tinan Jubilue nian h lema “Peregrinu iha espereransa,” hanesan Santu Padre Francisco hakerek dehan: ita tenke kehe ahi esperansa nian ne’ebé Maromak haraik tiha ona mai ita, no tulun ema hotu  atu hetan kbi’it foun no serteza hodi hateke ba futuro ho Espiritu no fuan nakloke atu hateke ba oin no iha vizaun klean ho confiansa iha Nia katak moris ne’e iha sentido mesmu dala ruma iha moris iha sufrimento ou hasoru terus oi-oin. Banati tuir ejemplo S. Pedro no S. Paulo, fiel tuir Jesus to’o fim.

Reflesaun Husi: Irmã Isabel de Sousa Amaral, OP

Kontinua Le'e

Ida ne’ebé hadomi hatene moris iha líalós

 

Solemnidade da Santisima Trindade

1a. Leitura: Prov 8,22-31

2a. Leitura: Rom 5,1-5

Evanjelho: João 16, 12-15

 

Wainhira ita hatene hodomi ema seluk, ida nee mak sei lori ita atu ba reflete kona-ba misteriu Santissima trindade nian ne'ebé  hatudu husi ita nia aksaun sira hanesan: hadomi malu, perdua malu, ajuda ema hirak ne’ebé presica ita nia tulun ho servisu hamutuk iha comunidade.

Domingo da Santíssima Trindade signifika Maromak hanesan comunhaun ne'ebé moris hamutuk iha comunidade ida, Katak Maromak ida deit no sira nain tolu keta-ketak; Aman hanesan creador mundo nian, Oan hanesan Salvador ne'ebé haruka husi Aman atu salva nia emar sira husi sala no Espirito Santo sai hanesan santificador no guiador ne'ebé maka nunka falha atu guia ita.

Portanto, Santisima Trindade hanorin ita, oinsa ita bele hakle’an ita nia relasaun no koneksaun ho Maromak, ho ita an, no mos ho ema seluk ne’ebé mak moris iha comunidade.

Oinsa ita deskobre presenca Santisimo trindade iha ita nia moris?

Novidades husi evangelista saun João dehan mai ita katak: wainhira Espirito lia los mai, Nia sei guia no hanorin ita kona-ba lia los. Saun João 16:13 haktuir nune'e: " to'o tiha mai Espirito líalós nian, sei hanorin lialos tomak ba imi, bása nia sei la koalia hodi nia naran rasik, maibe nia sei koalia kona ba buat hotu ne'ebé be nia rona.” Ida ne'e mak mensagem husi Evanjelho ohin hodi tulun ita  atu compreende kona-ba saida mak Espirito lialos nune'e mos hodi hetan esperança iha jornada fiar nian.

Ho razaun ida ne'e, buat ne'ebé halo ita atu apresia iha ita nia moris mak Maromak nia prezensa ne’ebé mak oferese mai ita liu husi Nia oan, Ita Na’i Jesus Kristu ne’ebé mak saran nia an tomak ba terus, mate, no moris hi’as hodi soi ita husi ita nia salan sira. Ho prezensa Nia oan mane ne'ebé  mai iha ita leet, ho fiar ita dehan Maromak totalmente Nia prezensa hanesan misteriu; ita so bele hare deit ho matan fiar nian, no Nia mak ukun kriasaun hotu ho domin.

Hau nia bin no maun sira hotu mak hadomi iha Kristu Jesus, dalabarak ita falha atu deskobre Maromak nia prezensa iha ita nia moris wainhira ita hasoru difikuldade no problema sira. Maibe Espirito líalós sempre hatudu dalan los no encoraja  ita atu reconhese katak buat ne'ebé ita hasoru, sei la permanente so Maromak de'it mak permanente. Difikuldade hirak ne’ebé mak ita hasoru iha moris, hodi haforsa ita nia fiar, haburas liu tan ita nia virtude sira, no mos  tulun ita atu fiel liu tan ba Maromak ninia planu sira tanba buat hotu mai ho ninia objetivo.

Tamba ne’e  ha'u convida ita hotu atu hateke fila fali ba ita nia esperencia sira. Buat hotu ne’ebé ita hasoru iha moris ida ne provisoriu, ema sira ne’ebé sempre halo ita kontente no halo ita tanis, ema sira ne mos sei la Permanente. Buat ne'ebé permanente ita ita nia moris mak ita nia relasaun ho Maromak no Prezensa Maromak iha fuan tanba ho fuan make bele hadomi lolos, iha ema nia matan, ai-horik sira nia leet, husi anin nia huu, no iha fatin silencio sira. Wainhira ita hare moos saida mak iha ita nia oin ita sei hare mos Maromak.

Tan ne, keta duvidá atu tau esperança ba MaromakTrindade ne'ebé la iha hun no rohan; Nia prezensa rohan laek. Maske dalaruma ita lakon konfiança ba Nia maibe hanoin deit katak: Se nia mak fo moris mai ita, Nia mos kuidadu. Ba Nia buat hotu bele deit ba ema ne’ebé fiar (Mc 9,23). Esperança mak dalan ne’ebé sei lori ita ba dalan los, lia los hadomi lolos.

Hanesan ita selebra Solemnidade da Santissima Trindade, fo hanoin fali mai ita atu nafatin fahe domin ne'ebé mak ita simu husi Maromak ba ita nia maun alin sira hotu no sai testimunho/a diak hodi haklaken Maromak nia domin ba mundo. Mai ita kuda nafatin relasaun ne'ebé klean liu tan ho Maromak liu husi ita nia orasaun. No husu Nai santissima Trindade atu acompanha ita nia jounada moris nian hodi servi nia missaun ho hadomi liutan nia kreda.

 

Reflesaun Husi: Irmã Domingas Maria Dos Santos, OP

Kontinua Le'e

HAKMATEK HELA HO IMI!

DOMINGO PENTECOSTES

1a. Leitura: Apos. 2:1-11

2a. Leitura: 1 Cor. 12:3b-7,12-13 

Evangelio: Jo. 20:19-23

 

Tauk mak emosaun ne’ebé halo ita taka an metin katak: ita lakoi atu hasoru moris nia moruk. Dalawain ita sai atan ba tauk tamba ita nia odamatan fiar nian taka metin ona. Ita tauk atu koko realidade moris ne’ebé moruk no nakukun. Nakukun taka metin ita nia dalan, ita nia hanoin, no ita nia capacidade atu foti desizaun. Ida ne’e mak evento ne’ebé apostolo sira nia esperiencia iha momento neba hanesan ita rona iha Evanjelho ohin loron nian. Evangelista Saun João convida ita atu reflete iha ponto hirak tuir mai hanesan: Odamatan taka metin vs hakmatek hela ho imi; Apostolo sira tauk vs apostolo sira haksolok tebes; hau haruka imi ba – simu Espirito Santo ba!

    Nudar ema, dalawain ita monu ba sala; no sala lori ita lao sees husi Maromak. Sala hanesan bloku ida ne’ebé taka metin ita matan no fuan atu ita labele hare’e no sente Maromak nia prezensa iha ita nia moris. Ita nia haketak an husi Maromak ikus mai lori ita ba tauk. Tauk domina ita tan ita lakon Maromak iha ita nia moris.

    Apostolo sira nia odamatan taka metin, laos deit tamba sira tauk ema judeo sira, maibe mos tamba sira nia fuan kanek tan sira nia insucesso, sira moe tan sira halai sees husi Cruz Jesus nian, sira nia fuan rahun tan lakon sira nia mestre diak. Entretanto, iha sira nia tauk no fuan tarido nia laran, Jesus mosu mai hodi hamriik iha sira nia le’et dehan: hakmatek hela ho imi. Jesus nia liafuan nee fo forsa tebes ba sira hodi kura sira husi sira nia kanek sira. Jesus nia prezensa lori ksolok bo’ot ba sira.

    Mundo ohin loron ofrese mai ita buat mesak murak no kmanek deit, maibe laiha buat sira nee ida mak lori hakmatek ne’ebé lolos ba ita nia moris. Dalawain, ita nia moris tanto iha comunidade ou iha ita nia missaun buat barak mak halo ita la hakmatek. Ita sente barulho ho lian barak nebe disturba ita. Ita nia preukupasaun sira hotu cadavez halo ita sente kolen. Ita lakon esperanca ba ita nia insucesso sira.

     Jesus mos ohin encoraja ita ho Ninia liafuan nebe hanesan nia fo hatene ba apostolu sira: Hakmatek hela ho imi! Hakmatek ne’e mak buat nebe’e mundo ohin loron presisa tebes. Maluk barak mak hamro’ok tebes ba hakmatek ida ne’e. Nai nia presensa lori ksolok ba ita moris; no hakmatek iha momento nebe’e tauk domina ita. Odamatan nebe’e taka metin hela nakloke fila fali ho grasa no Maromak nian.

    Nakukun ne’ebé taka metin ita nia fuan, neon no hanoin nakloke an fila fali ona tamba Maromak nia domin boot bai ta ema. Los duni katak transformasaun hirak nee so bele realiza wainhira ita iha fiar ne’ebé klean iha Maromak. Maibe dalabarak ho ita nia fraquesa sira, ita lakon confiansa no duvida ho buat barak nebe’e mak ita hasoru iha moris. To dalaruma mos ita husu pergunta ida nee: Maromak existe duni ou lae?

    Ita simu informasaun barak tebes maibe dalaruma ita nafatin la comprende misterio bo’ot Maromak nian iha ita moris. Tamba ne’e ohin Santa Creda celebra loron bo’ot no loron santo, Domingo Pentecostes nian. Jesus rasik mosu ba Apostolo sira hodi dehan: Simu ba Espirito Santo. Jesus hatene ita nia fraqueza sira hotu tan ne’e nia hamutuk ho Aman Maromak hodi haruka Nai Espirito Santo mai atu guia no santifica ita.

    Ho loron Pentecoste Igreja hahu’u moris iha mundo rai klaran. Igreja moris to mai iha momento nee no hamriik firme ne laos tan ita ema nia kbi’it, maibe nee obra Espirito Santo nian. Nune’e Evangelio ohin convida no lori ita ba uma nebe’e taka metin, atu experiencia no simu kbiit Espirito nian ne’e hodi hametin ita nia fiar. Nai Espirito Santo nia obra mak lori ita atu comprende misterio Maromak nian ba ita ema nia moris.

    Nai Espirito Santo mak dalan esperansa nian ne’ebé anima ita atu bele lao ba oin nafatin ho fuan bo’ot no neon metin e firme iha ita nia fiar ba Maromak. Hanesan Apostolo sira wainhira Nai Espirito Santo tun ba sira, sira nia tauk hetan aten brani no sira nia kanek hetan kura. Kbi’it Espirito Santo nian muda sira nia moris no hanoin no ikus mai fo sira aten brani hodi haklaken no fo sasin kona ba Nai Jesus.

    Ita hatene katak mundo ohin loron nakonu ho laran mamuk, fuan laran tarido, moris laiha certeza, familia barak lakon esperansa tamba esperencia moruk ne’ebé sira sente, nsst. Maske nune’e, Nai ho nia domin tomak no laran sadia bolu nafatin ita hotu atu hamutuk iha Ninia kreda. Ninia domin hakoak fila fali ita hanesan nia oan doben ne’ebé folin boot tebes.

    Hi’it an mai Maromak Espirito Santo, hodi halakan no hamoris ita nia ahi domin nian iha ami nia fuan. Halo ami sai ita nia instrumento domin nian, no sasin dame nian ba maluk sira ne’ebé mak sei moris iha nakukun. Amen!

 

Reflesaun Husi:

Irmã Leonarda Da C. Evangelista, OP. 

Kontinua Le'e