“Sai Missionaria katak sai ema lao rai ida”

“Keta taʼuk, tanba haʼu hamutuk ho ó.  Keta laran-taridu, tanba haʼu mak ó-nia Maromak.

Haʼu sei hametin ó, sin, haʼu sei ajuda ó” (Isaias 41:10).

        Molok atu fahe oituan hau nia experencia Misaun ninian iha Taiwan, uluk nanain hau hakarak agradece tebes ba Maromak tamba Nia bele hili hau ema folin laek ida husi ema rihun ba rihun nia leet no haruka hau ba no haklaken nia domin ba Nia emar sira.

Hau mos agradece ba hau nia madre sira hotu nebee durante nee forma hau desde Aspirante iha Timor mai to ohin loron atu sai ema Misionaria ida.

Wainhira hau sei labarik hau iha ona mehi atu sai madre maibe laos atu sai Missionaria. Tamba hau nia mehi ne hakarak sai madre hodi ba serbi hau maluk sira iha hau nia knua rasik.  Nunka mais que iha mehi atu husik hau rai doben Timor hodi mai iha ema rain.

Los duni katak dalabarak buat nebee ita hakarak ne laos Maromak nia hakarak .

Maromak nia hakarak nee misterio tebes mai ita, no ita rasik labele hatene Maromak nia hakarak mai ita nee sa los? Ita so bele hatene deit katak depois de ita halao tiha plano hotu nebe ita iha mak ita mos foin realiza katak nee mak Maromak nia plano.

       Sai Missionaria katak sai ema lao rai ida; Nudar missionaria ita pronto atu sai husi ita nia fatin nebe ita prefere liu atu lao ba fatin nebee deit mak ita nia congregação estabeleça ona. No pronto ba fatin nebee deit ita laiha maluk. Agradece ba ita nia Exemplar nain rua Mons Ramon ho Madre Ascension nebee experiencia uluk ona moris ne hodi cria hela fini diak nee e ikus mai ita hotu mai koko no lao tuir.

Iha dalan misionaria ida nee, ita mos precisa fo an tomak hodi adapta ba moris no cultura ou costume saida deit mak nasaun ida idak iha ba.

Iha dalan Misionaria nian,  ita mos sei experiencia ksolok no susar, hamnasa no tanis, forsa no fraku etc. Maibe labele desanima tamba experiência sira nee hotu naturalmente ba ema hotu nia moris, no iha dalan saida deit mak ita hili ita mos sei experiencia sentimento hirak nee.

Importante liu mak ita tenki fiar iha Maromak nia tulun.  Maromak nebee bolu ita sempre lao hamutuk ho ita hodi fo kbiit no forsa mai ita. Tan Nia rasik dehan: “Keta taʼuk, tanba haʼu hamutuk ho ó.  Keta laran-taridu, tanba haʼu mak ó-nia Maromak. Haʼu sei hametin ó, sin, haʼu sei ajuda ó”.  Nunee ita labele tauk atu koko no descobre ksolok nebee Maromak prepara hela ba ita liu husi dalan misionaria ida nee.

      Experience nebee haklean liu hau nia fiar no haburas liu hau nia vocasaun mak wainhira depois de primera votus iha Macao iha tinan 2016 ， madre provincial Asunta Fang ho ninia conselho sira decide hodi haruka hau ho companheiras nain 6 hodi mai halao missão foun iha Taiwan (Formosa). Nakonu ho confiansa hau hatan sim ba convite nee maski ho fuan tauk.

Too tiha iha Taiwan,  Madre sira fo ami oportunidade atu estuda língua Chinesa nian durante tinan 2 nia laran.

Depois de aprende tiha lingua, madre sira haruka ami ba hela iha comunidade keta-ketak hodi halao apostolado. Wanjin, Ascencion Nicol Community, mak comunidade nebe hau hela ba. Agradece Maromak tamba comunidade nebee hau hela ba localiza los iha aldeia ida nebee que dok uituan husi cidade. No fatin nee iha mos Igreja historico nian ida, nudar Basilica kiik ida iha Taiwan. Como que iha sociedade ida nee mayoria Catolica, nunee padre no madre sira nia missao boot tebes e sarani sira hotu nia contribuisaun ba igreja no unidade forte tebes.

Hau haksolok tebes ho oportunidade ida nee;  maibe hau mos sente tauk tamba ema hotu iha expectasaun boot tebes mai ami atu fahe buat barak ho sira.

Liu tiha fulan hirak iha comunidade nee, madre provincial haruka ami ida idak atu participa iha actividades ou programa Igreja nian. No ami mos ajuda iha servico pastoral hanesan visita familia sira;  liliu ba sira be ferik e katuas no mos sira be moras. No lori comunga ba avo katuas ou ferik sira nebee mak saude la saudavel. Ami mos participa iha reza ba familia sira nia uma semana ida dala ida no seluk tan. Ami nia presensa halo sarani sira  aprecia tebes  maski ho ami nia fraqueza barak nebee mak ami iha.Nudar ema strangeiro ida iha fatin nee,  buat barak tebes mak ami presisa atu adapta ba. Dificuldade bot liu mai ami mak lingua nebee. Tamba ami aprende Mandarin mas iha fatin ida nee ema hotu koalia lian Taiwanese rasik nebee que diferente tebes ho lian Mandarin. 

     Atu haklean liu tan experiencia ida nee,  ikus mai madre provincial haruka hau ba halao pastoral iha foho, ba hamutuk ho ema aboriginal sira. Ho fiar iha Maromak nia grasa, hau mos aceita ho madre nia sugestão ida nee, e  ikus mai hau consegue ba no experiencia ksolok nee hamutuk ho ema rai nain sira. No iha neba,  hau sai hanesan voluntário atu acompanha avo katuas ho ferik sira iha centro ida, nebee mak governo estabiliza. Hau sente oportunidade ida nee sai hanesan evento boot ida mai hau nia moris. No hau sente haksolok tebes fahe hau nia moris ho maluk hirak nee. Sira nia simplicidade no hospitalidade halo hau fasil liu  atu adapta ho sira. Sira nia domin halo hau sente hanesan sira hau nia familia rasik. Iha fatin aboriginal ne mos hau descobre katak ita iha cultura nebee atu hanesan. Liliu ita iha rasa nebee hanesan nunee fasil liu atu toman malu. Claro que hau mos hasoru desafius barak, liliu wainhira hau hamrik iha sira nia oin atu fahe experencia ruma. Hau nia lingua sei limite tebes maski aprende ona lingua iha tinan rua nia laran. Maibe agradece Maromak,  ba ema sira nia laran luak no domin hodi ajuda no suporta hau wainhira hau sente tauk no lakon confiansa. Sira fo coragem mai hau,  wainhira hau hamriik iha sira nia oin hodi fahe hau nia experencia fiar nian ho sira. Nudar madre ida iha sira nia leet, sira nia considerasaun boot tebes maski iha buat barak mak hau sei kuran.

Hau sente katak experencia hirak nee hotu ajuda tebes hau iha hau nia formasaun nudar juniora e liliu halo hau realiza liu tan moris nudar misionaria nee nia significa nebe que bot tebes duni.

Experiencia hirak ne’e mos haboot hau nia fiar iha Maromak no liliu haklean hau nia relasaun nebee intima ho Nia. Hau mos aprende buat barak iha hau nia Apostolado hirak nee, e liliu iha comunidade nebee mak hau hela ba. Agradece ba hau nia madre sira nia domin no suporta nebe halo hau forte hodi continua dalan sagrado ida nee. Maromak nia domin nee boot tebes duni mai hau,  liliu iha ema hirak nebee mak hau hasoru loron loron halo hau realiza domin nee. 

Ho fiar katak hau nia presensa hamutuk ho maluk hirak nee,  bele mos hafanun sira iha sira nia fiar no halo sira realiza Maromak nia domin iha sira nia moris.