MORIS NE'E HANESAN VIAGEM IDA

 

DOMINGO BA XII TEMPO BAI-BAIN NIAN

           

 

Primeira Leitura:  Job 38, 1. 8-11

Segunda Leitura: 2 Corinto  5, 14-17

Evangelho: Marcos 4, 35-40 (35-41)

 

     Loro kraik tiha ona, Jesus liatun ba nia escolante sira dehan: “Ita hakur liu tiha ba tasi sorin.” Sira husik ema lubun boot, lori deit mak Jesus nebe iha ró laran. Anin boot, laloran baku maka’as ró, halo wé tama nakonu dadaun ró laran. Sira fanu nia hodi dehan: “Mestre la hare katak ita atu mate dadaunona?” Nia Liatun ba sira “Tansa imi hakfodak hanesan ne’e? Nusa imi la fiar hanesan ne,e?”

            Moris hanesan viagem ida mai ita ida-idak, dala barak ita hasoru buat nebe diak no furak iha ita nia viagem, halo ita la sente tauk, la sente kolen atu halao viagem ne ba bei-beik, tamba ita tau konfiansa boot ba buat diak nebe mak ita hasoru iha ita nia moris. Dala barak ho buat diak sira nebe ita hetan bebeik iha ita nia viagem moris nian, halo ita haluhan tiha ida nebe mak halo ita moris no halo buat diak  iha mundu. Dala barak mos ita haluhan tiha ita nia identidade nebe hanesan ema Cristaun, hodi simu deit buat nebe diak iha ita nia moris.

    Tamba ne’e Evangelho ohin nian fo hanoin fila fali mai ita kona ba ita ida-idak nia fiar, liu husi provas oi-oin hanesan, anin boot, laloran baku maka’as ró, halo wé tama dadaun ró laran. Dala ruma  esperencia  sira ne'e acontese mai ita, atu ita bele loke ita nia matan, loke ita nia laran no loke ita nia hanoin hodi tau fiar metin iha Nia, katak Nia mak mata dalan, Nia mak buat hotu nia hun.

            Refleta fila fali ba ita ida-idak nia moris ohin loron, ita hotu hakfodak ho situasaun pandemia iha mundu, ita tauk ho duvidas oi-oin iha ita nia moris, balun lakon sira nia vida, balun lakon sira nia familia e balun mos haketak a’an husi sira nia familia.

    Joventude barak mak lakon fiar, lakon esperanҫa no mos lakon sira nia estudu iha sira nia moris. Mosu pergunta boot mai ita ida-idak kona ba situasaun sira nebe ita hasoru. Maibe Jesus rasik dehan: “Tansa imi hakfodak hanesan ne’e?” “Nusa imi la fiar hanesan ne’e”? Ho ida ne’e, mai ita ida-idak tau fiar iha Jesus labele lakon fiar no labele lakon esperanҫa iha ita nia viagem moris. Viagem ba hasoru Jesus liu husi ita nia maluk sira nebe presiza tebes ita nia tulun, viagem lori Jesus nia domin no liafuan midar ba fahe ba ita nia maluk sira nebe presiza Jesus nia domin no tulun iha sira nia moris.

 

 

Reflesaun Husi: Irmã Isabel dos Santos Gomes, OP