FO SASIN BA LIALOS

 

SOLENIDADE DE JESUS CRISTO, REI e SENHOR DO UNIVERSO

 

PRIMEIRA LEITURA: DANIEL 7: 14-14

SEGUNDA LEITURA: APOCALIPSE 1: 5-8

EVANGELHO : JOĀO 18: 33b-37

            

     “Los! Ha’u liurai duni! Tamba ida ne’e mak Ha’u moris, tamba ida ne’e mak Ha’u mai iha rai klaran atu sasin lialos! Ema nebe moris tuir lialos , rona duni Ha’u lian ¡”.

    Jesus fo sasin ba Nia-An iha Pilatos nia oin katak Nia liurai duni , iha conversaun entre Jesus ho Pilatos lian la tuir malu entaun Pilatos la consege kapta sasin lialos nian ne’ebé Jesus hakarak hato'o  ba nia, ho ne’e Pilatos saran Jesus ba mate. Ho revelasaun Jesus nian iha Pilatos nia oin ne’e ikus mai halo mundo matan nakloke, ain tur sira tuku tur hodi hanai Jesus nudar Liurai hotu sira nia liurai.

    Ohin loron ita moris iha mundo ida ne’ebé susar atu hasoru lialos. Iha estudo barak hatudu katak lia bosok sai  hanesan buat nebe baibain tiha iha moris sociedade nian, mesmo atu hatan deit kona ba ita  nia an rasik deit ita la dehan buat nebe real, exemplo: cuando ita hasoru malu  hase ho liafuan” Diak ka lae? Mosu resposta  espontania” Diak, mesmo ita hotu hatene ita la sentí diak. Noticias hirak nebe ita haré e rona iha media social dala barak falsa no realidade hatudu konfusaun  barak maibe ita mos ba ho ritmo realidade mundo nian ne’e ne’ebé ita konsiente katak afekta ita nia nasaun,comunidade, povo nian, no ita nia convivencia iha vida comunitaria.  Mai ita luta hasoru falsidade  mundo ohin nian atu ita la monu ba tentasaun hodi hola parte iha falsidade hirak ne’e.

    Mai ita loke ita nia fuan husik Jesus ukun ita nia hanoin,liafuan no hahalok sira, entrega ita nia an  hodi moris iha lialos, honestidade no humildade. Ita simu ita nia frakesa katak ita ema sala nain ho haraik an husu perdaun, luta atu ita sincera ho ita nia an no ita nia relasaun ho ita nia maluk sira. Pelo menos ita desenvolve iha ita nia an corajen hodi koalia los mesmo hakanek ita fuan ho nune’e ita sai lutador ba lialos .

    Iha evangelho são João 8:32,  Jesus dehan “ lialos sei halo ita sai ema nebe libre”. Los duni cuando ita luta hodi hatudu buat ne’be’é los ita sei la sentí tauk ou moe ba ita nia an maibe ita sei kria relasaun nebe diak liu no ita halo kontribusaun boot hodi ajuda mundo establece comprensaun entre individu hodi hamenus konfusaun iha mundo. Bainhira ema hotu luta ba buat ne’ebé los Reino Maromak nian sei establese iha ema ida-idak moris.

 

Reflesaun husi: Irmã Olandina Baptista, OP