SANTÍSSIMA TRINDADE MAK ITA NIA MODELO DE UNIDADE

 

DOMINGO DA SANTÍSSIMA TRINDADE

1a. Leitura: Deut.4,32-34.39-40

2a. Leitura: Rm.8:14-17

Evangelho: Mt.28:16-20

 

Ohin loron ita celebra um dos maiores mistérios iha ita nia fe nudar ema sarani, Santíssima Trindade. Celebrasaun ida ne fo hanoin mai ita kona ba Aman, Oan no Espírito Santo nia servisu hamutuk. Sira nunka fahe malu mesmu sira ida-ida iha distinta divina. Sira nia unidade ne’e misterio ida ne’ebé ita la komprende so bele apresia deit ho matan fiar nian.

Iha primeira leitura, Moises fo hanoin mai ita kona ba Maromak nia knaar maravilhoso. Maromak poderoso no domin nain ida ne’ebé realiza nia knar salvasaun nian. Tan ne’e mak Moises encoraja ita atu aumenta ita nia fiar ba Maromak ho maneira obedece ba Nai nia mandamento sira.

Iha segunda leitura São Paul aprezenta mai ita Santíssima Trindade nia asaun iha forma concreta: “Ho Espírito Santo nia acompanhamento ita Maromak nia oan no ita mak liman-rohan ho Cristo”.  Ho Espírito Santo ida nebe procede tanto husi Aman no Oan mak ajuda ita hodi bolu Maromak ABBA AMAN.

Iha evangelho Cristo rasik revela misterio Santíssima Trindade nian mai ita. Nia revelado ida ne’e ho mandato ida “Ba no halo discípulos iha nasaun tomak, sarani sira hodi Aman, hodi Oan no hodi Espírito Santo”.

Ohin loron Igreja fo hanoin mai ita katak Santíssima Trindade la ketak husi sira nia asaun grasa nian. Maibe sira servisu hamutuk no lao hamutuk, sira nia misaun hanesan deit, mak salvasaun mundo nian. Aman haruka Oan mai atu kasu mundo nia sala (Jn.1:1-3). No Aman no Oan haruka Espírito Santo hanesan ita nia Conselho no Advogado (Act.1:8).

Ho nune’e, Cristo nia orasaun ba nia Aman mak: “Atu sira sai ida deit hanesan ita” (Jn.12:22) ida ne’e mak orasaun ida nebe reflete Trindade nia domin.

Portanto, saida mak ita celebra ohin ne’e hanesan modelo ida ba ita nia unidade. Ita iha lisaun barak atu aprende husi Santíssima Trindade. Buat ida nebe importante liu hanesan Trindade mak, ita bele moris hamutuk no servisu hamutuk hanesan familia ida. Tamba iha ita hotu nia a’an ita lori imagen ida deit, ne’e mak imagen Maromak nian. Nune’e apesar ho ita nia personalidades individual no ita nia diferença sira UNIDADE NE POSSÍVEL NO UNIDADE NE’E OPÇÃO FUNDAMENTAL.

Nune’e, celebrasaun iha domingo Trindade nian ne’e iha buat barak tebes atu hanorin mai ita kona ba unidade iha ita nia relasaun sira, amizades, uma-kain, familia no comunidade tomak. Ida ne’e fo hanoin mos mai ita katak, apesar ho ita nia diferentes talentos sira, grasa be ita ida-ida hetan, nivel social no economía be ita ida-ida iha, ita bele fo liman ba malu hodi servisu hamutuk ba ita nia salvasaun no salvasaun mundo nian.

Finalmente, celebrasaun ne’e atu dehan mai ita katak Se ita lolo liman ba malu hamutuk ita nia diferentes personalidades sei sai ita nia forsa, laos ita nia fraqueza ou causa husi ita nia disintegração. Ba Trindade nia domin no unidade, mai ita hahi Santíssima Trindade: Gloria ba Aman, Gloria ba Oan no Gloria ba Espírito Santo, Amen

 

Reflesaun Husi: Irmã Rosita Carvalho da Costa, OP