DOMINGO XXV TEMPU BAIBAIN
1a. leitura: Sa. 2:12,17-20
2a. Leitura: Tgo. 3:16-4:3
Evangelho: Mk. 9:30-37
Nudar saseluk Kristo nian, ita hotu-hotu iha knar atu moris no banati tuir Jesus nia lalaok nebee husik hela mai ita. Lao tuir dalan Jesus nian significa katak lao no banati tuir lalaok ou ejemplo sira hotu ne’ebé Nia hatudu mai ita; hanesan iha Evangelhp ohin nian hateten nune’e: Hau mai laos atu imi serbi hau, maibe atu hau serbi imi.
Mundo ohin loron, ema hadau malu atu compete hodi sai ukun na’in ne’e barak no facil, maibe deficil atu halo an sai atan hodi servi povo no sarani ne’e ho fuan. Attitude nune’e susar boot iha tempo ohin loron. Basá ema hotu tama iha grupo, partido no congregação uluk nanain atu hetan saida mak nia hakarak, hanesan: atu ema hahi, adora, servi no respeito, la’os atu tuir saida mak grupo, partido no congregação nia principio sira.
Evangelho ohin nian lori ita atu reflete kona ba ita nia moris liu-liu hanesan nudar consagrada ida, hau nia kna’ar lolos mak saida? Benefisio sa mak hau hetan husi misaun sira ne’ebé hau halao? Hau nia serbi hotu nebe’e durante nee, hau halao ho intensaun atu ema hahi no gaba hau ka ou hau halo tamba hau hakarak duni ho fuan atu serbi hau maluk sira?
Maromak bolu ita ida idak no fo mai ita responsabilidade atu serbi malu. Wainhira Jesus koalia ka hanorin kona ba nia an katak nia sei hetan: “tarata, baku hodi terus to’o mate” (Mc.9:31), maibe Jesus nia escolante sira hanoin hela buat seluk. Hodi hadau malu hela fatin no posição. Ho ida ne’e Jesus husu ba sira: “imi haksesuk malu kona ba saida iha dalan?” (Mc. 9:33). Sira nia intenção haksesuk malu iha dalan kona ba se mak boot liu wainhira Jesus mate, sira começa prepara estrategia atu hadau malu kadeira no ukun. Husi sira nia intenção nebe la tuir Cristo nia hakarak mak Jesus dehan hikas ba sira: “se mak hakarak sai boot liu sira seluk nia sei sai ikus liu hotu, nia sei sai hotu-hotu nia atan” (Mc.9:35). Husi Jesus nia liafuan ne’e atu hateten katak: hakarak sai ukun na’in precisa halo-an sai ki’ik hodi hamamuk an atu bele hatene rona no hadomi ema hotu.
Papa Francisco, wainhira hasoru malu ho Bispo, Nailulik, madres, frater no catequista sira iha Catedral fo hanoin mai ita dehan: “imi tenke sai perfume ka mina morin Cristo nian ba ema seluk”. Papa nia mensagem ne’e convida no fanun ita idak-idak nia fuan no ulun atu hanoin hikas wainhira Nai bolu ita iha Nia missão, liu husi modelo inan ida nian iha ita nia congregação. Husi ne’e, ita bele comprende Jesus Cristo nia missão iha mundo. Nia mai la’os deit tamba ema riku sira, maibe ba ema kiak no mukit sira no mos Nia mai ba ema hotu atu hetan salvação.
Cristo bolu ita hotu no haruka atu sai nia manu-ain mina morin nian ba ema seluk iha ita ida-idak nia moris no missão. Mai ita tuir no aprende buat hotu husi Nia. Basa hatudu liu husi nia Nia liafuan no Nia hahalok rasik. Nune’e mos visita Santo Padre Francisco nian iha Timor no celebra missa iha Tasi tolu nia dehan: “Hau hare riku soin Timor nian la’os ai-kameli maibe ninia povo”. Nune’e povo ka sarani ne’e mak diak liu. Ne’e duni, Nai Jesus hakarak atu hanorin ita consagrada no fiar na’in sira:
1. Hatene simu terus, hanesan Nia simu: “Jesus dehan se mak hakarak tuir Hau sei hakriit nia an rasik, sei simu nia kruz hodi la’o tuir Ha’u” (Mc. 8:34)
2. Sai ukun na’in ho fuan la’os ho liafuan. Hanesan Nia halo: “La iha domin ida ne’ebé boot liu ida nebe saran nia moris tan nia belun sira (Jo. 15:13).
3. Atu sai ukun nain diak significa sai atan:Hau mai la’os atu imi servi ha’u maibe atu servi imi (Mt.20:28). Amen.
Ita harohan atu ho grasa Nai ninian, ita hotu bele aten brani nafatin atu lao ba oin hodi descobre liu tan saida mak Maromak nia hakarak mai ita.
Bom Domingo ba ita hotu!
Reflesaun Husi:
Irmã Leonarda Da C. Evangelista, OP
0 comments:
Post a Comment