HAKMATEK HELA HO IMI!

DOMINGO PENTECOSTES

1a. Leitura: Apos. 2:1-11

2a. Leitura: 1 Cor. 12:3b-7,12-13 

Evangelio: Jo. 20:19-23

 

Tauk mak emosaun ne’ebé halo ita taka an metin katak: ita lakoi atu hasoru moris nia moruk. Dalawain ita sai atan ba tauk tamba ita nia odamatan fiar nian taka metin ona. Ita tauk atu koko realidade moris ne’ebé moruk no nakukun. Nakukun taka metin ita nia dalan, ita nia hanoin, no ita nia capacidade atu foti desizaun. Ida ne’e mak evento ne’ebé apostolo sira nia esperiencia iha momento neba hanesan ita rona iha Evanjelho ohin loron nian. Evangelista Saun João convida ita atu reflete iha ponto hirak tuir mai hanesan: Odamatan taka metin vs hakmatek hela ho imi; Apostolo sira tauk vs apostolo sira haksolok tebes; hau haruka imi ba – simu Espirito Santo ba!

    Nudar ema, dalawain ita monu ba sala; no sala lori ita lao sees husi Maromak. Sala hanesan bloku ida ne’ebé taka metin ita matan no fuan atu ita labele hare’e no sente Maromak nia prezensa iha ita nia moris. Ita nia haketak an husi Maromak ikus mai lori ita ba tauk. Tauk domina ita tan ita lakon Maromak iha ita nia moris.

    Apostolo sira nia odamatan taka metin, laos deit tamba sira tauk ema judeo sira, maibe mos tamba sira nia fuan kanek tan sira nia insucesso, sira moe tan sira halai sees husi Cruz Jesus nian, sira nia fuan rahun tan lakon sira nia mestre diak. Entretanto, iha sira nia tauk no fuan tarido nia laran, Jesus mosu mai hodi hamriik iha sira nia le’et dehan: hakmatek hela ho imi. Jesus nia liafuan nee fo forsa tebes ba sira hodi kura sira husi sira nia kanek sira. Jesus nia prezensa lori ksolok bo’ot ba sira.

    Mundo ohin loron ofrese mai ita buat mesak murak no kmanek deit, maibe laiha buat sira nee ida mak lori hakmatek ne’ebé lolos ba ita nia moris. Dalawain, ita nia moris tanto iha comunidade ou iha ita nia missaun buat barak mak halo ita la hakmatek. Ita sente barulho ho lian barak nebe disturba ita. Ita nia preukupasaun sira hotu cadavez halo ita sente kolen. Ita lakon esperanca ba ita nia insucesso sira.

     Jesus mos ohin encoraja ita ho Ninia liafuan nebe hanesan nia fo hatene ba apostolu sira: Hakmatek hela ho imi! Hakmatek ne’e mak buat nebe’e mundo ohin loron presisa tebes. Maluk barak mak hamro’ok tebes ba hakmatek ida ne’e. Nai nia presensa lori ksolok ba ita moris; no hakmatek iha momento nebe’e tauk domina ita. Odamatan nebe’e taka metin hela nakloke fila fali ho grasa no Maromak nian.

    Nakukun ne’ebé taka metin ita nia fuan, neon no hanoin nakloke an fila fali ona tamba Maromak nia domin boot bai ta ema. Los duni katak transformasaun hirak nee so bele realiza wainhira ita iha fiar ne’ebé klean iha Maromak. Maibe dalabarak ho ita nia fraquesa sira, ita lakon confiansa no duvida ho buat barak nebe’e mak ita hasoru iha moris. To dalaruma mos ita husu pergunta ida nee: Maromak existe duni ou lae?

    Ita simu informasaun barak tebes maibe dalaruma ita nafatin la comprende misterio bo’ot Maromak nian iha ita moris. Tamba ne’e ohin Santa Creda celebra loron bo’ot no loron santo, Domingo Pentecostes nian. Jesus rasik mosu ba Apostolo sira hodi dehan: Simu ba Espirito Santo. Jesus hatene ita nia fraqueza sira hotu tan ne’e nia hamutuk ho Aman Maromak hodi haruka Nai Espirito Santo mai atu guia no santifica ita.

    Ho loron Pentecoste Igreja hahu’u moris iha mundo rai klaran. Igreja moris to mai iha momento nee no hamriik firme ne laos tan ita ema nia kbi’it, maibe nee obra Espirito Santo nian. Nune’e Evangelio ohin convida no lori ita ba uma nebe’e taka metin, atu experiencia no simu kbiit Espirito nian ne’e hodi hametin ita nia fiar. Nai Espirito Santo nia obra mak lori ita atu comprende misterio Maromak nian ba ita ema nia moris.

    Nai Espirito Santo mak dalan esperansa nian ne’ebé anima ita atu bele lao ba oin nafatin ho fuan bo’ot no neon metin e firme iha ita nia fiar ba Maromak. Hanesan Apostolo sira wainhira Nai Espirito Santo tun ba sira, sira nia tauk hetan aten brani no sira nia kanek hetan kura. Kbi’it Espirito Santo nian muda sira nia moris no hanoin no ikus mai fo sira aten brani hodi haklaken no fo sasin kona ba Nai Jesus.

    Ita hatene katak mundo ohin loron nakonu ho laran mamuk, fuan laran tarido, moris laiha certeza, familia barak lakon esperansa tamba esperencia moruk ne’ebé sira sente, nsst. Maske nune’e, Nai ho nia domin tomak no laran sadia bolu nafatin ita hotu atu hamutuk iha Ninia kreda. Ninia domin hakoak fila fali ita hanesan nia oan doben ne’ebé folin boot tebes.

    Hi’it an mai Maromak Espirito Santo, hodi halakan no hamoris ita nia ahi domin nian iha ami nia fuan. Halo ami sai ita nia instrumento domin nian, no sasin dame nian ba maluk sira ne’ebé mak sei moris iha nakukun. Amen!

 

Reflesaun Husi:

Irmã Leonarda Da C. Evangelista, OP.