JESUS MAK HAU NIA BIBI-ATAN DIAK NO MATADALAN BA SALVASAUN

 

DOMINGO BA DALA IV TEMPO PASCUA

Primeira Leitura – Apos. 4: 8-12

Segunda Leitura – 1 Jo. 3: 1-2

Evangelho – Jo. 10: 11-18

 

Domingo ba dala ha’at tempo páscoa, sai hanesan  sempre Domingo “BOM PASTOR” nian.  Tinan-tinan ita hotu rona Jesus nia lia- menon no promesa katak Jesus mak ita nia Bom Pastor(Bibi-atan diak).  Iha evangelho saun João Jesus rasik  koalia ba ita ida-idak hodi dehan katak:  Ha’u mak Bibi-atan diak no bibi-atan lolos  tamba nudar bibi-atan diak lori nia bibi ba du’ut matak no ba bee-matan moos iha nebe suli moris nakonu, bibi-atan diak sempre hamaluk nafatin nia bibi sira iha qualquer situação.

 Jesus mak ita nia bibi-atan lolos tamba Jesus lori ita ba dalan los no fo moris tomak ba ita nia salvasaun. Nia kunhese nia bibi sira ida-idak, iha relasaun pesoal klean ho ita, hadomi ita,  hatene ita nia terus, ita nia mehi no esperansa sira.

Relasaun ida ne’e especial liu to’o Jesus compara ho relasaun domin no intimidade nian nebe nia iha ho nia Aman Maromak rasik. Domin ida ne’e mak lori Jesus atu oferese nia moris rasik atu nunee ita hotu bele hetan moris no moris rohan laek.

Hau gosta liu  imajen Jesus nu’udar Bom Pastor tamba imajen nee fo hanoin ba hau  katak Jesus hadomi hau, salva hau husi sala laran, hamutuk ho hau iha tempo nebe mak difisil. Nune’e  hau la ta’uk wainhira hasoru dificuldade oi-oin tamba hau fiar katak Jesus pronto atu ajuda hau no hakman hau iha susar laran.

 Jesus buka tuir  sira nebe  lakon dalan, lakon esperansa, lakon fe liu-liu sira nebe lakon hodi hadook-an husi igreja  no Nia kuidadu ita ho laran kontente nomos nakonu ho domin.

Nune’e dalan ba salvasaun mak Jesus rasik laiha dalan seluk ba Aman Maromak.  Jesus fo kna’ar ba Ita hotu nebe simu be’e bautismo iha igreja católico hodi  banati tuir  Nia nu’udar ita nia bom pastor iha  ita nia moris lor-loron nian, ba ita nia  familia, ba belun sira  nomos ba sira nebe mak presija los ita nia tulun. Nia sai guia no  matadalan ba sira nebe mak la rona  nia lia fuan sira, sira nebe’e  lakon fe no esperansa nomos hadook- an husi igreja.

 Ita hotu buka tempo hodi le’e biblia no fo tempu ba  silencio hodi nune’e ita  bele rona Jesus nia lian wainhira nia bolu ita,  no ho aten brani  tuir Jesus hanesan Maromak nia Oan mane mesak nebé sai nu’udar ita nia Bibi atan diak.

 

Hakerek Husi: Irmã Julieta da Costa, OP

 

 

 

 

Kontinua Le'e

RAMON ZUBIETA: MISSIONÁRIO NO FUNDADOR

 

 

Continuasaun ba Parte Terceira:

 

PARTE III.  Ramon nia vida missionario no sai nudar fundador congregasaun Misionarias Dominicanas do Rosario.

     Nia halo hotu tia ninia profesaun ikus nian, nia  hala’o ninia servisu(missaun)iha Filipina. Iha Neba mos nia ordena  sai padre iha tinan 1889 iha igreja Saun Domingos Manila.

   Rai Filipinas mos sai hanesan rai ida nebe Ramon hala’o ninia esperencia misionario ba dala uluk iha rai ida naran Solano.

    Tamba iha tempu neba, situasaun politica ladun diak nune’e padre Zubieta hamutuk ho misionário sira seluk, ema kaer sira no hatama iha  komarka(kadeia) nia hetan sufremento barak  tamba ema a’at sira halo  terus no kastigo sira.

   Besik tinan ida sira hela iha cadeia no ikus mai ema hasai sira husi komarka no sai  livre iha loron 30 fulan dezembro tinan1899 no sira fila fali ba Manila.

    Mestre geral  Dominicano sira nian, fo fiar ba  provincia Santo Rosario atu tau matan ba prelatura Saun Domingos iha Urubamba no Madre de Dios. Sira precisa padre ida atu ba neba, padre ida nebe iha ona esperencia misionário nune’e sira fo fiar ba Ramon atu ba iha neba.

    Padre Ramon simu ninia kna’ar no nia ba Peru sai hanesan prefect apostolica dahuluk. Ikus mai amu papa Pio X hili nia sai amu bispo.

    Bispu  Ramon zubieta sente/hanoin katak nia presija lori relijioza(madre sira)ba Peru  iha foho atu suporta nia hodi  hanorin no eduka rai na’in sira iha Peru nian. Liu-liu atu promove feto sira nia moris no sira nia dignidade.

    Nune’e  nia aproveita ninia viagem ba Espanha no ba Roma ba nia ordenasaun atu sai Bispo nia koalia ho amu papa katak nia precisa madre sira atu bele serbisu ho nia.  Nia consege hetan duni madre sira nebe hakarak ba ho nia iha misaun iha Peru.

       Madre sira mak  MADRE ASCENSION NICOL GONI no madre nain tolu seluk tan.

 Ho ninia esperensia hanesan missionário ida, iha misaun foun ida ne’e nia hakarak atu dezenvolve ema sira nia moris. Serbisu hamutuk ho madre sira ikus mai sira nain rua hari’i congregasaun foun ida. Congregasaun ne’e nia naran mak Irmãs Missionárias Dominicanas do Rosario. Congregasaun ne’e hari’i iha Maldonado, Peru iha loron 5 fulan Outubro tinan 1918.

     Mgsr. Ramon Zubieta, serbisu barak liu, dedica nia an tomak to’o nia hakotu nia I’is. Tan Nia serbisu ladun descansa, loron ida nia moras no ikus mai nia mate. Nia mate iha Huacho, iha loron 19 fulan novembro iha tinan 1921 no hakoi nia iha santuario santa Rosa de Lima, Peru. Nia mate ho tinan 57 deit. Moris badak maibe Nia gasta nia vida hodi lori ema besik liu ba Maromak. Nia domin boot liu ba Jesus nebe bolu Nia atu ba hodi haklaken lia fuan diak.

    Msgr.  Ramon Zubieta husik hela memoria diak liu nune’e  continue fo inspirasaun ba ema sira nia moris liu-liu ba Irmãs missionárias Dominicanas do Rosario iha nebe’e deit. Ninia espiritu acompanha nafatin iha fatin misaun sira hotu to’o ohin loron.

    Prosesu ba  canonizasaun Msgr. Zubieta nian comesa  iha tinan 2000,iha Lima- Peru. Iha  celebrasaun tinan atus ida fundasaun vicaria nian. Ita continua husu nafatin nia atu bele tau matan ba ita hotu.

 

 mdrtl

 

 

 

 

 

Kontinua Le'e

ESPÍRITU RESUREISAUN INSPIRA ITA ATU LUTA BA DIGNIDADE MORIS EMA NIAN

 

DOMINGO BA DALA III TEMPO PASCUA

Premeiro leitura : Apos. 3, 13-15. 17-19

Segunda leitura:  1 João 2,1-5ª

Evangelho : Lc.24, 35-48

      Ohin ita tama ba domingo da III tempo Pascua nian. Aparisaun Jesús  nian depois de Resureisaun atu transmite mai ita kristaun katak Jesús Moris, katak Aman Maroamak halo Nia moris hias fali husi mate. Atu fo mos confirmasaun mai ita katak se Nia hatudu Nia-An ne’e signifika Nia Moris.

      Ninian hatudu-An ba apostolus  no mos husu sira atu hare ba Nia liman no ain no haruka sira atu kaer Nia isin no sei dehan tan ba Sira katak mateklamar laiha isin no ruin . Tan sira sei hakfodak no la fiar ho buat hirak nebe sira hare. Jesús husu se sira iha buat ruma atu han. Ikus mai, Jesus mos fo hanoin fali sira kona ba Escritura buat hotu nebe profeta sira dehan kona ba Nia.   

    Iha Evangelho são Lucas nian ohin atu lori Apostolos sira halakon sira nia dúvidas kona ba Resureisaun Jesus Cristo nian. Jesús han hamutuk ho sira (Lk 24,41-43)hatudu ba sira Ninia Kanek sira(24,39-40) convida sira atu kaer Nia isin(24,39).

   Jesus Nia resureisaun la hanesan resureisaun nebe relata iha evangelho sira (Lazarus, feto faluk nia oan no Zairo nia oan Feto) sira nian moris hanesan historia ita humana nian nebe sei mate fali iha loron ikus.  Maibe Jesús Nia Resureisaun contrario, Jesús pasa ba vida foun nebe la partense mai ita nia Historia. Ita nia vida limita ho tempo no espaço maibe Jesús nia laiha limitasaun ba tempo no espaço.

     Ohin loron iha ita nia mundo buat oi-oin mosu,buat diak no buat at funu hasoru malu. Aproveita ho situasaun Pandemia buat injusticia barak mosu maibe ita la bele lakon esperança , fila fali ba Escritura hanesan Jesús fo hanoin Apostolos sira iha Evangelho Ohin.

   Ita nia Fe iha Resuresaun mak  sai hanesan be matan ba ita nia esperança ba libertasaun no ksolok, mesmu mundo nakonu ho injusticia. Ita nia Fiar iha Resureisaun mak tenke fo animasaun iha vida fraterna e comunidade Cristaun.

     Evento nebe foin dadaun akontese iha Timor semana ne’e hatudu momos oinsa Espirito Resureisaun nian convoca ita hotu atu iha orasaun hodi combate injusticia nebe akontese iha Rai laran.  Senhor Xanana luta hodi koalia no actua ho lialos no la tauk e laiha duvida, Nia fiar katak buat hotu sei sai los hodi fo libertasaun espiritual ba povo nebe kesi metin hela ho mentira political konaba Pandemia. Ida ne’e mak espiritu Resureisaun nian nebe inspira ema atu foti asaun no fo sira nia moris ba ema barak atu hetan moris.

 

Hekerek Husi:

Irma Olandina Baptista, OP

 

Kontinua Le'e

HO DOMIN NO KSOLOK AJUDA TUIR AMI NIA KBIIT

 

      Beata Asencion dehan katak “ la to’o atu halo diak, halo didiak” . Ho inspirasaun ida ne'e, ohin loron Joventude Dominicana Timor-Leste (JDTL) acompanha husi irmas sira ho laran kma'an no domin bo’ot ho  sira  nia inisiativa rasik  ba visita no fahe nesecidade basika ba comunidade Beduku nebe hetan Inundasaun iha dia 4/04/2021 semana kotuk liu ba.  

    Nudar Joven,  sira lakoi hare maun alin, inan feton sira nia halerik ba nesecidade moris nian, tamba ne’e sira dehan : ami nudar Joven futuro ba Nasaun hakarak fahe buat ida nebe ami iha, no fo tuir ami nia kapasidade maske ituan maibe nudar joventude dominicana fo ho Domin. JDTL fo ajuda la signifika katak ami iha barak liu, maibe ami fo tuir ami nia kbi’it hanesan Beata Asencion dehan halo diak ba ema mak kbit laek sira mak dalan salvasaun nian atu hare Jesus iha esperencia moris lor- loron nian.

    Bairro  Beduku komunidade refere nia dalan kotu, no transporte hanesan kareta, motor labele liu ba tamba ne’e JDTL nia aktividade aksaun Karidade iha deit mota laran nebe haleu ho foho. Maske loron manas maibe komunidade sira ho laran haksolok no entusiasmo tebes hakarak hasoru ami iha fatin nebe refere. Sira hotu hatene katak ami fo la barak maske ituan maibe ho grasa Maromak nian sira bele sente esperansa ba moris ohin loron nian sei iha netik , ho liafuan pasaran ema dehan aifarina baluk ida hodi tahan netik ami nia kabun. Asaun Karitativa mak aksaun ida nebe atu tulun ema seluk nia presiza, la'os atu halo buat bo’ot ida maibe halo ka hatudu buat ida nebe kiik maibe hatudu ho Domin no la sura ba ema seluk.

       Ohin loron ema barak  halerik, terus,tanis ho situasaun no kondisaun iha ita nia rai laran nakonu ho tristeza no sufrimento tan Inundasaun no Covid19 estraga ema barak nia moris. Ema barak senti lahaksolok tamba sira nia moris  iha nakukun nia laran tamba nakonu ho tauk ba sitausaun ida ne'e.  Mai ita husu tulun ba Na'i Maromak liu husi ita nia fundadores sira nia orasaun nafatin tulun ita hotu liu-liu sira nebe moris iha sufrimento nia laran.

 

  Husi:  Irma Saturnina Gouveia,OP

( Coordenadora  Joventude Dominicana)

 

 

Kontinua Le'e