NOTISIA KSOLOK

 

DOMINGO DE PÁSCOA DA RESSURREIÇÃO DO SENHOR

1a. Leitura: Atos. 10:34a,37-43

2a. Leitura: Col 3:1-4

Evangelho: Lk. 24:13-35

 

    " Iha Loron uluk semana nian, rai hun mutin, feto nain tolu ba to rate hodi lori mina morin ne'ebé Sira iha. Besik iha rate  Sira hare fatuk duir tiha husi rate ne'e. Tama tiha iha laran, Sira la hetan Jesus Nia isin. Derepente Mane klosan nain rua ho unuk nabilan mosu ba Sira hodi Dehan, Tansa imi buka Ema Moris husi mate Sira le'et? Nia laiha ne'e Nia Moris hias ona". (Lukas 24:1-6)

     See mak la kontente wainhira rona nia ema ida ne'ebé nia hadomi tebes, mate tiha no nia simu notisia katak Ema ne’e Moris hias fali! Automaticamente ema ne’e truka kedan Nia sentimentu triste hodi hamrik dansa kedan. No ida nee los no tebes duni katak ksolok nakonu iha fuan, hamnasa midar  mosu iha ita nia oin ho hanoin ne'ebé kman no ho laran ne'ebé malirin hamrik hodi dansa no basa liman hodi simu moris foun. Moris foun ida ne'ebé nakonu ho esperansa no fiar metin katak MATE La’os Ita Nia viagem ikus maibe MORIS.

 Notisia Kona ba Cristo Nia Moris hias fo hanoin ba ema wain atu aprende atu HADOMI no HAKUAK buat Hotu ne'ebé Ema hasoru iha Mundu nee no komprende klean tebes katak KSOLOK la acontese Sem TERUS no Moris sei la acontese Sem MATE.

   Nee Duni hau konvida ita hotu atu consiente nafatin iha ita nia viagem lor- loron katak Cristo Nia PAIXAUN Mak Ita SARANI Sira hotu Nia Paixaun. Nunee lalika lakon esperansa kontinua haburas fiar kiik neebé Ita iha, kontinua fahe no fahe mos ita nia diak Sira, atu nune’e to’o loron ne’ebé ita mate ita mos bele fiar an hodi Dehan ba Nai katak Hau hakonu ona Hau Nia misaun.

BOAS FESTAS DO SANTO PASCUA BA ITA HOTU!

Reflesaun Husi: Irmã Sara Mendonça, OP

Kontinua Le'e

DOMINGO DE RAMOS DA PAIXĀO DO SENHOR

        TAN HADOMI JESUS TERUS, MATE NO MORIS HIAS

 1a. Leitura: Is. 50:4-7

2a. Leitura: Fil. 2:6-11

Evangelho: Lk. 23:1-49

 

 Selebrasaun Domingo Ramos hodi relembra Na'i Jesus Kristus tama hu iha sidade Jerusalem molok terus no mate iha Kruz.

   Jesus Kristus tama iha sidade Sakral Jerusalem nudar momentu importante tamba akontece molok Jesus Kristus mate iha Kruz no moris hias hodi Salva ema maksalak sira. Tamba ne’e wainhira ita hahu tempu kuaresma, ita hahú hadia a’an hodi halo penitensia no karidade hamutuk ho kreda tomak.

   Nai Jesus Kristus tama iha Jerusalem atu halo misterio Paskua nian ne'e, ohin loron ita ho laran nakloke atu hanoin tuir loron ida ne'e nia hanorin katak  ita  la’o tuir Na'i Jesus Kristus nia ain fatin hodi terus no mate ho Nia atu loron ida moris hias ho Nia ba nafatin.

   Semana Santa mak semana ida ne’ebé sarani sira prepara an no reflete kona ba Nai Jesus Kristus nia terus no mate iha kruz no moris hias.

    Nudar sarani saida mak ita presija halo iha semana santa?ita ida-idak presija  prepara an ho fuan mos laran mos no hakribi salan hot- hotu ,sala hasoru Maromak, sala hasoru ita nia maluk sira no fila fali ba Maromak.

   No Iha semana santa ne'e,ita ida-idak halo Reflesaun ba ita ida-idak ninia a’an,reflete saida mak ita halo tiha ona no mos aproveita semana Santa ne halo penitensia no karidade.

  Ho buat sira ne’e deit mak halo ita hatene katak Jesus Kristus ninia mate no moris hias, Jesus Kristus nia mate iha Kruz atu Salva Ita, Jesus Kristus mate iha Kruz atu soy Ita.

 

Reflesaun Husi: Irmã Flavia Mendonça, OP

Kontinua Le'e

HARE ITA NIA SALA RASIK DUKE HARE LIU EMA NIA SALA

 

DOMINGO BA DALA LIMA TEMPU QUARESMA

1a. Leitura: Isa. 43:16-21

2a. Leitura: Fil.  3:8-14

Evangelho: Jo. 8:1-11

 

      Lia fuan diak sira ohin nian liu-liu iha evangelho ohin nian haktuir mai ita istoria ema balun lori ba Jesus feto ida sira toman halo sala ho mane seluk. Sira hakarak Jesus atu fo castigo ba feto ne’e tan tuir sira nia lisan hahalok hanesan feto halo ne’e tenki tuda ho fatuk to’o mate.

     Primeiro Jesus la dehan buat ida maibe Nia hatudu ho gesto significante ida: Nia hakru’uk iha rai hakerek ho nia liman fuan, winhira nia foti matan nia hateke ba sira dehan: se mak sala laiha bele foti fatuk tuda ba. No Nia continue hakruuk hakerek fali ba rai. Maibe evangelista  haktuir mai ita katak sira la consege tuda fatuk ba feto ne’e. Sira hotu lakon ida-idak nian.

   Maromak nia Oan Mane  mai iha mundo atu liberta ita husi sala no terus. Nia la mai atu fo terus ba ita ema. Maromak mai atu salva ita, la’os atu castigo ita.

    Ita ema ho ita nia hahalok balun mak dala ruma ita gosta castigo malu, ita mos gosta du’un matak ema seluk tan ita haluha katak ema hotu iha valor. Ita hot-hotu sagrado iha Maromak futar oin tan Nia cria ita tuir Nia ilas rasik no Nia hadomi tebes ita. Nune’e Nia haruka Nia Oan Mane Jesus mai atu soi ita husi sala. Nia sacrifica  An, terus, mate no moris hias tan Nia hadomi ita.

     Ne’e duni hanesan tempu preparasaun ba celebrasaun festa Pascua nian, mai ita ida-idak em vesde hare ba ema seluk nia hahalok a’at no sala sira, ita fo tempu atu  reflete, hare no hakribit ita nia sala rasik. Ita laiha direito atu julga ita nia maluk sira. Maromak ho Nia laran sadia hatene tau matan no hadomi ita hotu hanesan ita an rasik.

 

Reflesaun Husi: Irmã Maria Soares Babo, OP

 

Kontinua Le'e

AMAN LARAN LUAK, DOMIN NAIN, HATENE PERDUA

 

 

DOMINGO BA DALA HA’AT TEMPU QUARESMA NIAN

Primeira Leitura : Jos. 5: 9a,10-12

Segunda Leitura : 2 Cor. 5: 17-21

Evangelho : Lucas 15: 1-3,11-32

 

Iha Domingu ne’e, ita ko’alia liu kona ba ai-knanoik “oan ne’ebé husik hela uma”. Dala ruma ita mos bolu Ai-knanoik ida ne’e kona ba Aman nia laran luak hodi fo perdua , nomos Ai-knanoik nee iha buat Barak atu hanorin ita kona ba ita nia moris liu-liu kona ba oinsa ita rasik  mak lakohi ita nia Aman nia domin no buat ne’ebé nia fo.

Wainhira ita hanoin fali Ai-knanoik nee, ita hanoin liu-liu kona ba oan ikun, ita sei koalia kona ba ninia sala sira, katak nia arrepende an ho hanoin katak nia halo Aman nia laran kanek, no ninia desizaun atu fila fali ba nia Aman no nia mos prontu atu ema trata nia nu’udar atan duke sai oan-mane.

Liu husi Ai-knanaoik ida nee ita bele hatete katak oan mane ikun fila fali ba Aman.  Primeiro no importante liu, tamba nia hatene  no sentí Aman nia domin no laran luak husi fuan katak ninia Aman nia laran-luak no laran diak teb-tebes. Aman ida  ne’ebé sempre hadomi  ho klean no loos maskin oan gasta hotu rikusoin no halo sala Barak hasoru Aman mais wanhira nia arrepende hodi fila mai uma Aman ho laran luak hodi simu nia ho domin nebe lasukat ba sasan.

 “Lalais ba  foti ropa nebee diak liu hodi foo hatais nia: tau kadeli ba nia liman, i tau sandalias ba nia ain, ba dada karau vaka oan bokur ida mai oho, tuirmai ita celebra festa ida tamba hau nia oan mane nee mate ona , maibe agora nia moris fila fali. Nia lakon tiha ona, maibe agora hau hetan fali” (Lucas 15:22-24).  Kuandu ita hanoin liu kona ba Aman oinsa ita halo nia sente triste no laran kanek maibe nia haluha buat sira nee hodi hanoin deit mak ba oan nia diak nebe lakon husi Aman nia mundu, maibe wanhira nia haksolok liu bainhira nia hare’e ninia oan hakbesik-an ba Aman no husu perdua. Ita hotu admira teb-tebes ba Aman nia karakter  natural ida, domin divina, no loron kalan hein hela ita atu fila fali ba uma tamba fatin nebe Aman hela ba nee mak ita nia uma rasik nebe nakonu ho domin i paz.

Iha ai-knanoik ida ne’e Jesus aseguro katak Aman ida  ne’ebé laran luak no fo perdua ba nia oan sira hanesan Aman maromak iha lalehan tamba nia domin divina no fo perdua ba ita nia sala hotu nomos sempre iha ita nia moris. Ida ne’e konsolasaun boot ida mai ita basa se ita koko nafatin hodi hadomi Maromak no banate tuir Maromak nia ukun fuan, Nain rasik sei acompanha nafatin iha ita nia kresimentu sira to’o rohan.

Domin la hare no lasura nia folin hanesan ita aprende husi Ai-knanoik ida nee oinsa Maromak hatudu ninia domin no laran luak ba ita hotu nunca conta i dala hira ita hasees an husi nia maibe Maromak hakarak atu ita hotu hadomi nia nomos permite ita nia an hodi simu Maromak nia domin maskin ita la merese. Ita hotu nudar oan mane kah oan feto hodi arrepende wanhira ita hakbesik an ba nain nia altar. Aman Maromak mak ita nia Aman ne’ebe hadomi ita, no ita hatene no fiar katak nia fo perdua duni ba ita, nomos hakasa’an no comprometido hodi banate tuir Aman Maromak nia laran luak hodi perdua mos ema seluk nebe halo sala hasoru ita, Ida-ne'e hatudu katak domin ne'ebé loos sempre halo buat ne'ebé loos. Sempre lori rezultadu di'ak. Maski ema ruma la simu domin Santu ne'ebé ita fó, maibé ida-ne'e sempre lori impaktu ba sira, Domin ne'ebé loos susar ba ita atu la halo tuir, no susar ba ita atu hasees an. Oan ne'e hatene lisaun ne'e no nia mós tenke hanorin ita atu buka tempo hodi fila fali ba uma.

Ai-knanoik ne'e mos hanorin ita katak Maromak kontente teb-tebes ho ema sala-na'in ne'ebé fila kotuk ba nia. maibe hodi haraik-an no arrepende-an, hanesan ne'e mós ho oan ne'ebé husik hela uma. Wanhira nia iha susar oi-oin nia hodi arrepende-an ho fuan tomak hodi husik hela ninia hahalok-aat, sala, no nia fila ba uma hodi husu perdua no laran-sadia husi ninia aman. Aman, ne'ebé reprezenta Maromak, haksolok hodi simu fali nia, tanba "iha lalehan sei haksolok liu fali ema sala-na'in ida-ne'ebé hakribi nia sala duke ema laran-loos sianulu-resin-sia ne'ebé la presiza hakribi sala" (Lucas 15: 7). Ne'e mak Maromak ne'ebé laran-sadia. Ida-ne'e fó esperansa no fiar mai ita katak maski ita la simu domin no buat ne'ebé aman fó, nia sempre prontu atu fó perdua ba ita se ita arrepende-an ho laran no fila fali ba nia.

Tuir mai, ai-knanoik nee ramata ho Aman  ne’ebé husu nia oan mane boot atu tama uma laran no hola parte iha selebrasaun.  Iha evangelho laiha indikasaun ruma kona ba oan mane boot nia resposta, oan mane kiik fila mai uma ona, sei oan mane boot iha vontade tama uma no fahe ksolok neebe Aman no ninia uma kain tomak sente kontente ne’e kalae? Jesus nia liafuan nee konvida ita iha tempo quarezma nee hodi hakbesik an ba igreja hodi rona maromak nia liafuan diak ho hakribi sala sira nebe ita halo nomos  husik hela ita nia hahalok a’at sira no arrepende no husu perdua ba ita nia Aman maromak iha lalehan  ne’ebé prontu atu simu ita hodi tama fali uma no hamutuk ho nia tamba nudar Aman neebe hadomi ita. Nia sempre fo liberdade atu ita hili nomos oportunidade hodi hadia ita nia moris, no atu la’o ho dalan loos tamba ita fiar no promete hodi halo tuir Nain nia hakarak Nia sei prontu hodi lao hamutuk ho ita too rohan laek hanesan san paulo hatete ba sarani sira iha Corinto “ Ema nebe moris ho Cristo, ema nee ema foun duni buat uluk nian liu ona: buat hotu hola ilas foun ona, buat hotu mai husi maromak, hodi Cristo nia naran.

 

Reflesaun Husi: Irmã Julieta da Costa, OP

 

Kontinua Le'e