SAI INSTRUMENTO MAROMAK NIAN BA EMA HOTU

 

            Durante semana santa tinan ida ne’e nian hau akompanha Juventude Dominicana Beto ba iha Convento Padre Dominicano sira nian iha Hera hamutuk ho Juventude Dominicana sira husi fatin selseluk. Padres Dominicanos no Irmãs Dominicanas iha Timor Leste hala’o encontro ida ne’e tinan ida dala ida ho Joven Dominicana sira hanesan formasaun spiritual nian ba sira.

          Oportunidade loron ha’at hamutuk ho Jovem sira halo hau kontenti no entusiasmu los tamba hau bele lori sira sae ba foho leten reflesaun nian hodi kria ambiente silensiu nian, reza no reflete hamutuk ho Jesus nia Terus, Mate no Moris hias.

           Tamba Jovem sira ohin loron ne’e presija los akompanhamentu liu-liu iha parte espiritual nian tamba jovem barak mak lakon vontade atu hasoru laloran moris nia siak no simu realidade husi moris ne’e rasik. Nune’e mak jovem sira presija haforsa sira nia vida espiritual nian atu sira bele hetan esperansa hodi lere rasik sira nia dalan hodi forma sira nia a’an sai jovem nebe hatene valoriza moris ne’e ho lolos no dignu.

           Akompanha jovem ha’atnulu resin ualu (48) ne’e la fasil tamba ida ida mai ho ninia karakter rasik maibe esperensia ne’e nakonu ho sentido klean, halo hau konsiente katak hau nia profesa ne’ebé wainhira hau halo iha ema hotu nia oin hodi hatan SIM ba Maromak nia bolu ne’e la’os deit indikasaun ho hakarak rasik ou dejeijo maibe ho mos hau nia compromisso atu hamrik no hamutuk ho Maromak no igreja hodi servi ho domin lolos.

         Nune’e mak desafiu bo’ot ida mai ita ema ida ida liu-liu iha vida religiosa mak “atu sai Jesus nia oin, liman no ain ba ema hotu nebe mak ita servi la’os atu sai razaun tamba sa mak ema lakon sira nia fiar iha Maromak tamba religiosa ida  mak feto  ba ema hotu la’os ba ema ida deit ou familia ida deit.

     Hakerek Husi: Irmã Rosita Carvalho da Costa, OP

 

 

Kontinua Le'e

KRISTU NIA DAME FO KBI’IT BA ITA HODI FO SASIN

 

SEGUNDO DOMINGO DA PASCUA

 

1a. Leitura: Atos 5,12-16

2a. Leitura: Apok 1:9-11a,12-13 17-19

Evangelho:  Jo. 20:19- 31

 

   Maluk sarani sira hotu mak Kristu hadomi, Domingo ida ne’e ita sei remata oitava pascua nian.  S. João Paul II  dedika Segundo domingo da Pascua nu’udar domingo da divina misercordia, sai hanesan  kanek ne’ebé mai husi KRISTU nia moris hias.

  Evangelho loron ohin nian, Saun Markus  haktuir kona ba Jesus nia moris hias. Primeiru kona ba don pascua nian mak PAZ, ALEGRIA no ESPIRITU SANTU. Segundo kona ba narasaun prosesu fe ou fiar são Tomas nian. Eskolante ida ne’ebé iha dificuldade atu fiar kona Jesus nia moris hias. Kristo rasik  hatudu  An no husu ita atu halo tuir buat hirak ne’e: RONA MAROMAK NIA LIA FUAN, FO TESTEMUNHA, NO FORMA MORIS  IHA COMUNIDADE NIAN.

   Maromak moris  hias no kontinua hatudu An no hela iha ita nia le’et no fo dame, haksolok, e haraik ou haruka nia Espiritu ba ita ida idak atu sai testemunha hodi haklaken Nia liafuan diak.

    Saun Tomas nia testemunho hanesan eskolante ida libre no  ida ne’e desafia ita no sai asunto importante tebes ba ita nu’udar eskolante ou ema sarani. Maibe  ho don Espíritu santo, Maromak haraik ba  ita nudar ema sarani e fiar nain, tenki rona no halo tuir Maromak nia lia fuan, hanesan paun moris nian, ne’ebé fo kbiit no forsa ba ita.

  Ita nu’udar ema bai bain ita fiar bainhira hare ho matan rasik, ou ita iha esperensia rasik.  Ita sentí la to’o bainhira ita rona deit historia. Iha evangelho ohin loron nian bele hametin ita nia fiar. Katak Jesus moris hias ona no Nia moris hias lori dame mai ita.

   Ita husu ba Maromak nune’e ho Jesus nia moris hias bele fo kbiit no haforsa nafatin ita atu sai sarani diak hodi fo testemunha ba Jesus nia moris hias.

FELIZ PASCUA ba ita hotu.

 

Reflesaun Husi: Irmã Natalia Fouk, OP

 

Kontinua Le'e

NOTISIA KSOLOK

 

DOMINGO DE PÁSCOA DA RESSURREIÇÃO DO SENHOR

1a. Leitura: Atos. 10:34a,37-43

2a. Leitura: Col 3:1-4

Evangelho: Lk. 24:13-35

 

    " Iha Loron uluk semana nian, rai hun mutin, feto nain tolu ba to rate hodi lori mina morin ne'ebé Sira iha. Besik iha rate  Sira hare fatuk duir tiha husi rate ne'e. Tama tiha iha laran, Sira la hetan Jesus Nia isin. Derepente Mane klosan nain rua ho unuk nabilan mosu ba Sira hodi Dehan, Tansa imi buka Ema Moris husi mate Sira le'et? Nia laiha ne'e Nia Moris hias ona". (Lukas 24:1-6)

     See mak la kontente wainhira rona nia ema ida ne'ebé nia hadomi tebes, mate tiha no nia simu notisia katak Ema ne’e Moris hias fali! Automaticamente ema ne’e truka kedan Nia sentimentu triste hodi hamrik dansa kedan. No ida nee los no tebes duni katak ksolok nakonu iha fuan, hamnasa midar  mosu iha ita nia oin ho hanoin ne'ebé kman no ho laran ne'ebé malirin hamrik hodi dansa no basa liman hodi simu moris foun. Moris foun ida ne'ebé nakonu ho esperansa no fiar metin katak MATE La’os Ita Nia viagem ikus maibe MORIS.

 Notisia Kona ba Cristo Nia Moris hias fo hanoin ba ema wain atu aprende atu HADOMI no HAKUAK buat Hotu ne'ebé Ema hasoru iha Mundu nee no komprende klean tebes katak KSOLOK la acontese Sem TERUS no Moris sei la acontese Sem MATE.

   Nee Duni hau konvida ita hotu atu consiente nafatin iha ita nia viagem lor- loron katak Cristo Nia PAIXAUN Mak Ita SARANI Sira hotu Nia Paixaun. Nunee lalika lakon esperansa kontinua haburas fiar kiik neebé Ita iha, kontinua fahe no fahe mos ita nia diak Sira, atu nune’e to’o loron ne’ebé ita mate ita mos bele fiar an hodi Dehan ba Nai katak Hau hakonu ona Hau Nia misaun.

BOAS FESTAS DO SANTO PASCUA BA ITA HOTU!

Reflesaun Husi: Irmã Sara Mendonça, OP

Kontinua Le'e

DOMINGO DE RAMOS DA PAIXĀO DO SENHOR

        TAN HADOMI JESUS TERUS, MATE NO MORIS HIAS

 1a. Leitura: Is. 50:4-7

2a. Leitura: Fil. 2:6-11

Evangelho: Lk. 23:1-49

 

 Selebrasaun Domingo Ramos hodi relembra Na'i Jesus Kristus tama hu iha sidade Jerusalem molok terus no mate iha Kruz.

   Jesus Kristus tama iha sidade Sakral Jerusalem nudar momentu importante tamba akontece molok Jesus Kristus mate iha Kruz no moris hias hodi Salva ema maksalak sira. Tamba ne’e wainhira ita hahu tempu kuaresma, ita hahú hadia a’an hodi halo penitensia no karidade hamutuk ho kreda tomak.

   Nai Jesus Kristus tama iha Jerusalem atu halo misterio Paskua nian ne'e, ohin loron ita ho laran nakloke atu hanoin tuir loron ida ne'e nia hanorin katak  ita  la’o tuir Na'i Jesus Kristus nia ain fatin hodi terus no mate ho Nia atu loron ida moris hias ho Nia ba nafatin.

   Semana Santa mak semana ida ne’ebé sarani sira prepara an no reflete kona ba Nai Jesus Kristus nia terus no mate iha kruz no moris hias.

    Nudar sarani saida mak ita presija halo iha semana santa?ita ida-idak presija  prepara an ho fuan mos laran mos no hakribi salan hot- hotu ,sala hasoru Maromak, sala hasoru ita nia maluk sira no fila fali ba Maromak.

   No Iha semana santa ne'e,ita ida-idak halo Reflesaun ba ita ida-idak ninia a’an,reflete saida mak ita halo tiha ona no mos aproveita semana Santa ne halo penitensia no karidade.

  Ho buat sira ne’e deit mak halo ita hatene katak Jesus Kristus ninia mate no moris hias, Jesus Kristus nia mate iha Kruz atu Salva Ita, Jesus Kristus mate iha Kruz atu soy Ita.

 

Reflesaun Husi: Irmã Flavia Mendonça, OP

Kontinua Le'e

HARE ITA NIA SALA RASIK DUKE HARE LIU EMA NIA SALA

 

DOMINGO BA DALA LIMA TEMPU QUARESMA

1a. Leitura: Isa. 43:16-21

2a. Leitura: Fil.  3:8-14

Evangelho: Jo. 8:1-11

 

      Lia fuan diak sira ohin nian liu-liu iha evangelho ohin nian haktuir mai ita istoria ema balun lori ba Jesus feto ida sira toman halo sala ho mane seluk. Sira hakarak Jesus atu fo castigo ba feto ne’e tan tuir sira nia lisan hahalok hanesan feto halo ne’e tenki tuda ho fatuk to’o mate.

     Primeiro Jesus la dehan buat ida maibe Nia hatudu ho gesto significante ida: Nia hakru’uk iha rai hakerek ho nia liman fuan, winhira nia foti matan nia hateke ba sira dehan: se mak sala laiha bele foti fatuk tuda ba. No Nia continue hakruuk hakerek fali ba rai. Maibe evangelista  haktuir mai ita katak sira la consege tuda fatuk ba feto ne’e. Sira hotu lakon ida-idak nian.

   Maromak nia Oan Mane  mai iha mundo atu liberta ita husi sala no terus. Nia la mai atu fo terus ba ita ema. Maromak mai atu salva ita, la’os atu castigo ita.

    Ita ema ho ita nia hahalok balun mak dala ruma ita gosta castigo malu, ita mos gosta du’un matak ema seluk tan ita haluha katak ema hotu iha valor. Ita hot-hotu sagrado iha Maromak futar oin tan Nia cria ita tuir Nia ilas rasik no Nia hadomi tebes ita. Nune’e Nia haruka Nia Oan Mane Jesus mai atu soi ita husi sala. Nia sacrifica  An, terus, mate no moris hias tan Nia hadomi ita.

     Ne’e duni hanesan tempu preparasaun ba celebrasaun festa Pascua nian, mai ita ida-idak em vesde hare ba ema seluk nia hahalok a’at no sala sira, ita fo tempu atu  reflete, hare no hakribit ita nia sala rasik. Ita laiha direito atu julga ita nia maluk sira. Maromak ho Nia laran sadia hatene tau matan no hadomi ita hotu hanesan ita an rasik.

 

Reflesaun Husi: Irmã Maria Soares Babo, OP

 

Kontinua Le'e