“O TUIR HAU MAI”

 

Domingo XIII Tempu Baibain Nian

 

1a. Leitura: 1 Rs. 19: 16b, 19-21

2a. Leitura: Gal 4: 31b-5,1 13-18

Evangelho.: Lc 9: 51-62

 

Evangelho ohin loron nian Jesus desafia ba ema hirak ne’ebé atu tuir Nia significa saida? Ou atu sai Cristo nia saseluk nia katak sa? Ita nudar ema sarani ita hotu la’o iha dalan ida deit, dalan ba tuir Jesus. Jesus bolu no convida ita atu tuir Nia no hatudu mai ita dalan oinsa atu tuir Nia.

Iha primeira leitura, hatudu mai ita kona ba chamada Eliseu nian, no iha segunda leitura Saun Paulo explica katak Maromak espera ba ita hanesan Cristaun ne’ebé la’o tuir Espirito basa Isin ho Espirito la han malu. Iha evangelho dehan mai ita katak Jesus bolu ema ne’ebé hakarak tuir Nia ou fo vokasaun ne’e ba ema balun, iha mos ema ne’ebé mak laiha vokasaun mas sira decide atu ofrese sira nia an.

Vokasaun ne’e sai hanesan grasa ida; lian nebe bolu ita “Mai Tuir Hau” hein ita ida- idak nia resposta. Pergunta ba ita mak: Hau hakarak duni ho fuan atu tuir ida be convida hau ne’e? Vantagem sa mak hau hetan iha dalan ba tuir Nia ne’e? Hau pronto duni ka lae atu husik buat hotu hodi tuir Jesus?

 

Reflesaun Husi: Irmã Nelia Pinheiro, OP

 

 

Kontinua Le'e

CORPUS CHRISTI

 

                                  

                            Kristu nia Futar Isin no Ran

1a. Leitura: Gen 14:18-20

2a. Leitura: 1 Cor 11:23-26

 Evanjelho: Lukas 9:11B-17

 

     Iha Domingo kotuk Santa kreda celebra festa boot Solenidade da Santíssima Trindade, Domingo Ohin loron nian Santa kreda celebra festa  Solenidade Santissimo Corpo e Sangue de Christo( Jesus Futar Isin no Ran). Iha sekulo XIII(1264) hauhu husi Amu Papa Urbano IV sai nudar forma ida atu sasin kona ba Jesus nia prezensa real iha Eukaristia. Tan ne’e, ohin sai hanesan Domingo ksolok ba ita hotu atu celebra Jesus nia futar isin no ran, liu husi  sacrifisio boot liu hotu mak Eukarista. Iha kalan kinta feira Santa, ita aprende katak Jesus molok tama ba nia misterio paskua nian: terus, mate no moris hias, Nia hari’i ona iha Eukaristia liu husi han kalan ikus hamutuk ho nia eskolante sira. Ne mak aliansa ne’ebé Jesus rai hela mai ita hotu.

   Buat importante tebes atu ita hatene no reflete didiak iha Eucaristia mak premeiro: ita mai fo agradese no adora Nia mesak, segundu: ho misterio fiar nian no devosaun haleu Eucaristia, terseiro: hanorin ita atu apresia no simu grasa iha sagrada Eucaristia. Nune’e, it abele dehan katak  Eucaristia mak boot liu hutu- hotu.

  Hanesan mos iha evanjelho Sao Lukas 9:11B-17 ohin nian hatudu mai ita oinsa ema lubuk bot sira  tuir Jesus? Wainhira sira hamlaha saida mak acontense ba sira?  Iha evagelho ne’e hatudu momos mai ita  oinsa Jesus hatudu ninia domin no campaixaun ba sira ne’ebé tuir nia. Jesus hatene sira nia precisa, Jesus hatene saida mak ema lubun boot sira nia hakarak. Tamba ne’e Jesus halo milagre  paun ho ikan hodi fo  han ema lubun bot sira nebe tuir nia.  Jesus mos hatene katak sira hanesan bibi ne’ebé laiha bibi atan. Jesus halo buat ne’e hotu ba sira tamba Nia hakarak mos hatudu ba sira katak salvasaun ne’ebé sira buka mak  ida ne’e atu nune’e sira bele fiar mos iha Nia.

   Reflete fila fali ba ita nia an mos , oinsa ita bele conhese didiak Jesus iha ita nia moris hodi tuir Nia ? Wainhira Ita ba tuir Misa lolon loron no iha Domingo ita ba simu Jesus nia futar isin no ran,  ita fiar Nia hanesan ita nia maksoin? Wainhira ita ba tuir Misa (Eucaritia) ita ba simu nia Nia isin no ran, ita ba atu agradese, ita ba atu adora nia, ita ba rona Maromak nia lian?

,Ba ita sira fiar nain, Eukaristia mak fonte no sentru ita nia moris. Jesus fo nia isin no ran nudar karan atu soi ita ema. Tan ne, iha Eukaristia  alimenta ita nia isin no klamar no ho Jesus nia Futar Isin no ran  ita mos proklama katak ita fiar iha prezensa real Jesus Kristo nian iha sagrada Eukaristia.

 

Sr. Roberta Moniz Soares OP

 

 

Kontinua Le'e

DOMIN IHA COMUNHÃO

 

Solenidade da Santíssima Trindade

1a. Leitura: Pro. 8:22-31

2a. Leitura: Rom. 5:1-5

Evanjelho: Jo. 16:12-15

 

       Ohin loron Santa kreda celebra festa Solenidade da Santíssima Trindade, celebrasaun misterio fiar nian. Mistériu ne’ebé haksumik iha “Maromak ida deit ho Ema Na’in tolu” ketakketak ; Aman, Oan, no Espirito Santo. Solenidade ida nee bolu ita atu contempla kona ba Maromak nia domin. Oinsa Maromak constitui domin ida ne’e no Oinsa Maromak hakarak ita atu hadomi.

   Santíssima Trindade hatudu mai ita katak Maromak mak Domin perfeito iha comunhaun. Husi Domin ne’e mak Nia cria buat hotu. Buat hotu nebe existe sulin mai husi domin ida nee.

Maromak cria ita ema ida idak, ho Ninia imagem no semelhança rasik, nee katak, ita hotu ne’ebé  Maromak cria, bolu mos ita atu moris, haburas no hametin iha dinamika domin ne’be establese baseia iha relasaun/comunaun ho Maromak, ema seluk, no ho criasaun hotu.

   Iha Evanjelhu ohin loron nian, Jesus reconhese buat hotu nebe ita iha, hahu’u no mai husi Aman-Maromak fo ba Nia Oan Mane no husi Oan Mane ba Epirito Santo. Jesus descreve conkretamente Maromak nia natureza hahu’u kedas iha komunaun no iha relasaun. Relasaun entre Aman, Oan ho Espirito Santo, Jesus hakrak ita hakarak hatene katak, Maromak  ne’e Maromak nebe Unido, Maromak ne’be social, Maromak ne’ebé colabora hamutuk, Maromak ne’ebé família, Maromak ne’ebé komunidade, Nia hakiak no bolu ita hotu atu hola parte iha mistériu domin ida-ne’e.

 “Domin ida  ne’ebé hola parte absolutamente iha comunhão no iha relasaun”

Reflesaun Husi: Irmã Mariana Dos Santos Barreto, OP

 

 

 

Kontinua Le'e

SIMU ESPIRITO SANTO BA (Jo. 20:22)

 

 

DOMINGO PENTECOSTES

1a. Leitura: Act 2: 1-11

2a. Leitura: 1Cor 12: 3-7.12-13

Evangelho: Jo 20.19-23

 

Ohin Santa Creda celebra Festa bo’ot Domingo de Pentecoste ka Espírito Santo hi’it-An mai. Festa Pentecoste sai mos loron ne’ebé Uma Creda celebra tinan moris nian. Pentecoste mak tutun ka ápice husi Páscoa, basá “La ho Espírito Santo, Maromak do’ok husi Ema, Cristo hela hanesan história ida, Evangelho hanesan letra maten ida, Creda hanesan organização folin la’ek (LG 4). Liafuan pentecostes mai husi lian grego significa loron 50. Tuir ema Judeu sira hanaran pente-kostes ho sentido lubuk ida, hanesan: Loron colheita trigo nian; loron hodi hanoin Profeta Moises iha foho Sinai; loron hodi hadi’a hikas Jerusalem foun (Ex. 34:22). Hirak ne’e mak mak sai nudar sentido pentecostes iha Antigo Testamento.  

Leituras sira ohin loron nian ita rona kona ba oinsa Espirito Santo sai hanesan presente boot ida iha ita moris. Maromak ho Nia domin bo’ot lakoi husik ita mesak iha mundo hanesan oan kiak, tamba ne’e iha loron Ascensaun Jesus nian, Nia promete no fo hatene ba Apostolo sira katak: Nia sei haruka Espirito Santo, Consolador hodi acompanha, guia, no suporta sira iha sira nia Missaun, no defende sira husi diabo nia ukun. Ita nia fiar fo sasin katak Espiritu Santo nia servisu mak ohin loron Uma Kreda sei hamriik metin.

Evangelho ohin nian fo hatene mai ita oinsa Jesus garante Hakmatek no Ksolok iha apóstolo sira hodi haruka sira ba mundo. Jesus comprende ho tauk be apóstolo sira iha tamba nee Nia “hu’u is ba sira: “simu Espírito Santo ba!” (John 20:22). Ho dons Espiritu Santo nian  ne’ebé sira simu lori kedan sira ba mundo hodi fo Sasin kona ba Jesus. Ita hotu hola parte iha missao ne’e tamba ita mos simu Espiritu Santo liu husi Sacramento hirak be ita simu. Ita mos hetan comando husi Jesus atu la’o ba mundo hodi haklaken liafuan diak. Ho fraquesa hotu be ita iha dala wain hapara ita iha ita nia evangelizasaun, maibe ita keta tauk, tamba Maromak  ne’ebé hadomi ita, Ninia Espirito Santo sei inspira, guia no ilumina ita iha buat hotu.

Tan ne’e mai ita la’o ba oin ho aten brani hodi fo sasin kona ba domin Maromak nian nee. Ho kbiit Maromak Espirito Santo nian hela ho ita, buat ida sei la kuran iha ita moris. Espirito Santo ninia servico mak lori ita loron ba loron experencia buat kmanek no foun barak. Tamba ne ita bele afirma katak: Presente boot nebe’e Jesus promessa no fo ba Uma Kreda no ba ita ida idak ohin loron realiza duni.Tamba ita iha fiar katak:  Espiritu Santo mak lori ita fo sasin kona ba Jesus nia presensa iha mundo.  Hanesan Papa Francisco dehan: Espírito Santo halo Jesus torna presente iha ita leet, liu barreiras tempo no espaço hotu, atu ita sai testemunha ba mundo / iha mundo.

Los duni, tempo ne’ebé ita iha dadaun nee hanesan tempo Espirito Santo nian. Tamba nee diak mai ita iha loron ohin atu reflete no conhese liu tan se mak Espírito Santo no Nia função atu halo saida? Ita hatene mundo agora dadaun mundo hasoru desastre boot hodi halo maluk barak moris iha nakukun. Ita harohan atu Nai nia Espirito anima nafatin ita no lori ita sai instrumento diak ba maluk sira nee, atu ho ita nia presensa sira bele hetan fila fali roman ba sira nia moris.

 

Reflesaun Husi: Irmã Leonarda Da Conceição Evangelista, OP

 

Kontinua Le'e