”Fo ba Cesar buat ne’ebé Cesar nian no fo ba Maromak buat ne’ebé Maromak nian.”

 

DOMINGO BA DALA XXIX TEMPU BAIBAIN

1a. Leitura: Is. 45:1,4-6

2a. Leitura: 1 Tes. 1:1-5b

Evanjelho: Mt. 22:15-21

 

Tuir historia haktuir katak Cesar nee emperador Romano nian ida iha tempo uluk, antes Jesus mai mundu. Claro katak Cesar nee laos naran deit maibe ema humanu hanesan mos ita, ne’ebé iha hanoin no conciensia; hatene saida mak los no sala.

Iha livro Genesis capitulo 1:26 ita lee, iha neeba Nai Maromak dehan “mai ita kria ema tuir Ita Nia Ilas; atu ukun ou tau matan ba criatura sira seluk”. Husi versaun ida nee atu dehan deit katak; ema kria husi DOMIN atu hadomi. Em realidade ema kontra DOMIN nia hakarak.

                                    Evangelio ohin loron nian husi Evangelista Saun Mateus 22:15-21 haktuir mai ita katak ema Farizeu sira husu ba Jesus bele eh labele selu imposto ba Cesar? Jesus la husik liu duvida ne’ebé Farizeu sira iha. Tan ne’e Jesus hatan dehan :”fo ba Cesar buat neebe Cesar nian no fo ba Maromak buat neebe Maromak nian”. Iha punto ida nee halo hau hanoin no reflete kona ba acontecemento real ne’ebé ita rona acontese dadaun iha iha rai Israel (rai santa, fatin histórico Catolica nian). Acontesemento funu iha tempo badak nia laran haterus no halakon ema kiik no kiak sira nia vida. Noticia triste ida nee hafanun hau nia neon hodi lamenta cada dia, Nai ita iha ne’ebé? Ita la hare ka ema kiik no kiak sira terus los ne?  justisa nee iha ne’ebé? Maibe ikus mai hau convence katak; Nai Maromak kria ema ho domin atu ukun ho domin, maibe ema foti an liu, hanoin deit ba an haluha ema seluk hodi kria mundo tuir sira nia desejo.

                                    Ohin ita celebra “DOMUM” DOMINGO MUNDIAL DA MISSÃO, liu husi halerik no hakilar ne’ebé ita rona iha familia no iha sosiedade. oinsa ho ita nia reasaun personal nomos comunidade ? pronto no brani atu hatan ou lae?Jesus wainhira nia bolu nia apostulo sira ba haklaken, Nia la fihir ba profesaun no qualidade, maibe Nia fihir liu ba hirak neebe iha entusiasmo, hakarak ne’ebé profundo no voluntario atu fo liman hodi tulun. Ema hirak nee iha responsabilidade ba kiik no kiak sira nia situasaun moruk, nakukun no halerik ne’ebé mak hakilar ho lian oioin husi sorin los no karuk no husi oin no kotuk.

                                    Fila fali ba Jesus nia resposta ne’ebé nia dehan ba Fariseu sira:”fo ba Cesar buat neebe Cesar nian no fo ba Maromak buat neebe Maromak nian”. Karik ita ne’ebé rona Jesus nia resposta nee dalaruma  mosu duvida oitoan mos katak: entaun Nai Maromak ejije mos sasan ruma husi ita atu fo nia ka? Nia mos husu osan ka? ….Maibe ita tenki tur hodi hanoin no reflete ba Jesus nia liafuan ne’ebé dehan: “hadomi ema seluk hanesan o an rasik”. Ida nee mak Aman Maromak husu ita atu selu ba Nia, la’os osan ho sasan.

Liu husi pessoa ida-idak  oferese an ba misaun Nai nian, ho Maromak nia Grasa, espera mundu bele  iha domin, liberdade no paz.

 

Reflesaun Husi:

Irmã Sara Mendonça

 

.

 

 

Kontinua Le'e

Loke fuan hodi sente Nai nia prejensa

 

Domingo XXVII Comum

1a. Leitura: Is 5:1-7

2a. Leitura: Flp 4:6-9

Evangelho: Mt 21:33-43

  

Evangelho Saun Mateus Jesus fo hanoin mai ita katak ita presija aprende no rekonse Nai nia prejense iha ita nia moris loron loron nian liu husi ema seluk nia domin, no ba buat hotu ne’ebé mak ema halo mai ita. Ita tenke loke fuan hodi sente no loke matan hodi hare katak buat hirak ne’ebé mak mosu liu husi ema seluk ne’e tan grasa Maromak ninian tan ne’e aprecia no agradese ba grasa no bensaun hirak ne’ebé maka ita simu husi Nia.

Ita nudar humanu dala barak ita falha husi ita nia parte, dala barak ita haluha katak Nai nia prejensa sempre iha ita nia moris ho nune’e  dala ruma ita sente triste no nervoju hodi halo saida deit ba ema seluk wainhira hetan difikuldade ka problema iha ita nia moris.

Jesus sempre fo hanoin mai ita dehan nia sempre iha ita nia le’et iha situasaun saida deit, dala ruma ita maka arogante liu hosoru  Nia liu husi ita nia hahalok a’at  hasoru ema seluk.

Iha Evangelho Saun Mateus hatete maske nia haruka ema atu mai halo buat diak ba ita mos tan ita nia egoismo, entaun ita haluha ema seluk hodi fokus ita nia an rasik, ho nune ita bele halo aat ba ema seluk hanesan atan oan sira ne’ebé maka haruka husi Toos Nain mos ema sira mak tau matan ba toos ne’e baku sira no balun oho tamba la sente Nai nia prejensa ho buat hirak ne’ebé mak sira halo ne’e sira rejeita Toos Nain, ho nune’e mai ita aprende hodi loke ita nia matan hodi hare no sente saida maka akontese iha mundu.

 

Reflesaun Husi: Irmã Felizarde dos Santos, OP

 

 

Kontinua Le'e

RONA NO HALO TUIR BA!

 

DOMINGO BA DALA XXVI TEMPU BAIBAIN

1a. Leitura: Ezk 18:25-28

2a. Leitura: Phil. 2:1-11

Evangelho: Mt. 21:28-32

 

Maun alin doben sira, iha evangelho ba loron  ohin nian  koalia kona ba hahalok no fiar iha ita ema nian liu husi aiknanoik kona ba maun alin na’in rua nian.

Ho sira nain rua nia hahalok bele ajuda ita atu komprede kona ba oinsa mak hadomi, no oinsa mak servisu ho responsabilade   no pasencia. Ho aiknanoik nee, maun alin nain rua sai ejemplo diak ba ita hotu. Rona ba no halo tuir ba.

Maun alin nain rua  hahalok la hanesan, ohin rona katak, sira nain rua nia aman ba husu  ida por ida ba ida boot, oan ohin o ba servico iha toos uvas nian ga lae, nia hatan nia la ba , maibe nia ba, ida seluk fali hatan ba maibe la ba. Entaun husi sira nain rua nee, Jesus husu fila fali ba ema lubun boot hirak ne’ebé mak hamutuk ho Jesus katak, sira nain rua nee, ida ne’ebé mak diak liu, sira hatan ida boot nee, tamba nia dehan la ba maibe to ikus nia muda nia hanoin hodi ba hodi obedese ba nia aman nia lia fuan.

Ho ida maun alin sira labele hare deit ba ema nia a’at no labele julga deit ema, maibe koko atu hare katak ema hotu diak. Hanesan Jesus dehan ema sala nain sira sei ba uluk. Ida nee atu dehan deit katak, Reino lalehan la’os ba ema diak deit maibe ba ema hotu.

 Mensagen ba ita hotu mak koko atu halo sa ida mak ita bele, no halo tuir ba sa ida mak ita Aman  haruka. Jesus hanorin ita atu halo tuir sa ida mak Nia haruka, no Nia hakarak ita hotu halo buat nebe mak diak  ho domin.

Ho sira nain rua nia hahalok hanorin ita atu  obedese ba Maromak no mos ba ita nia maun alin sira hotu. Mai ita hotu reflete lia fuan obidencia hodi pratika iha ita nia moris lor-loron nian nudar sarani ne’ebé diak, no joven nebe diak hodi rona no halo tuir iha ita nia responsablidade tomak ne’ebé make ema fo fiar ba ita. No koko atu halo sa ida mak los, no tuir saida mak los ho domin. Husu Nai atu tulun ita hotu, no acompanha ita hotu iha ita nia moris tomak.

Jesus mak ita hotu nia Aman, Maun no belun diak ba ita hotu, rona, halo tuir, no moris tuir ba.

Reflesaun Husi: Irmã Dionisia Salsinha Maia, OP

 

 

Kontinua Le'e

“Hau dehan ba o: la'os too dala hitu, maibe too hitu nulu dala hitu".

 

DOMINGO BA DALA XXIV TEMPU BAIBAIN

 

1a. Leitura: Sir. 27:30-28:7

2a. Leitura: Rom. 14:7-9

Evangelho: Mt. 18:21-35

 

Evangelio ba Domingo Commun dala XXIV nian, lori ita ba reflete klean liu tan kona ba oinsa atu  fo perdua ba malun.

Iha episodio ida nee  sei partilha hamutuk ho ita boot sira hotu. Iha pontu rua: Ba dahuluk: Maromak nia perdaun no daruak: Ita ema nia perdaun ne’ebé iha passagem ida ne’e Pedro nia preocupação, ita bele dehan pedro representa humanidade tomak.

Premerio: Tuir mai ita ba hare hamutuk perdua Maromak nian, husi passagem nee hatudu mai ita katak ba Maromak perdua ita  la iha limitação. Tamba ita nia Maromak, Maromak misericordioso, Maromak laran luak no domin nain, hadomi no perdua ba ema hotu la hare ita nia kor, raça, cultura,lian no naçäo. Ita nia Maromak hodi poder tomak halo buat hotu mai ita nia diak. Ate ikus nia fo Nia Oan Mane mesak mai  hodi salva humaniade tomak.

Segundo:  Ita ema nia perdua malu hatudu momos katak ita nian, iha limitação tamba tuir resposta ne’ebé Pedro lança ba Jesus nee hatudu lolos katak ita nia perdua malu iha duni limitação. Husi ponto seluk ita mos hare katak ema ohin loron nia hakarak  “balas dendam” katak hau perdua o mos, o mos tenki perdua hau. Ate ema balu tau iha sira nia hanoin katak perdua o ne’e dala ida ou bele liu dala rua mais perdua bebeik mos halo ita baruk fali. Tamba ne’e sira hili laran moras hodi hein hela karik sira nia maluk balu halo sala sira foti ida nee hanesan ponto fraco los husi sira nia maluk refere atu hasoru sira nia maluk.

Husik perdaun Maromak nian hanorin mai ita atu koko sai hanesan ita nia Aman Maroamk: laran luak no domin nain atu nune’e ita bele hatene lolos atu  perdua ita nia maluk sira.

Iha versiculo ikus husi passagem ida nee hanorin lolos mai ita katak ita la perdua ita nia maluk ho ita nia laran,Ita laos  Maromak oan. Basa  ita nia domin ba Maromak hatudu husi ita nia domin ba maluk sira.

Dala barak ita triste  tamba hau perdua bebeik ba hau nia maluk? ka kontente tamba hau nia maluk hetan perdua husi hau? Husu perdua ba, basa imi nia Aman iha lalehan mak Aman  perdua nain no laran luak.

 

BOM DOMINGO BA ITA HOTU.

REFLESAUN HUSI: IRMĀ ROBERTA MONIZ SOARES, OP

 

Kontinua Le'e