TAMBA SA TAUK?

 

DOMINGO BA DALA HAAT TEMPU ADVENTO

Primeira Leitura: 2S 7:1-5,8b-12,14a,16

Segunda Leitura : Rom 16:25-27

Evanjelho : LK 1:26-38

 

Durante semana haat ba adventu  ita prepara ita nia an hodi simu ita Nai Jesus Cristu iha ita ida idak nia moris, tuir lilin nebe ita halakan mak hanesan Esperanca, Domin, ksolok no paz.

Iha primeiro domingo Maromak hato’o ba ita hotu atu hader husi nakukun nomos nakonu ho esperansa  hodi simu naroman nebe ita hein. Iha Segundo Domingo Maromak nia domin ba ita ida idak la iha condisaun nee hatudu ba ita hotu atu hadomi malu no fo laran ba malu hodi  hadia ita nia dalan hodi simu nia nebe sei mai, nomos iha terceiro domingo ho domingo ikus ba advento  hameno ba ita hotu  atu haksolok ho fuan kman ho  hadame malu hodi prepara ita nia fuan no laran atu simu ita nia nain liu rai Jesus Christo.

 Ohin Evanjelho mos fo hanoin fila fali ba  ita katak, planu maromak nian ba salvasaun ita ema ninian nee ho nia inis iativa rasik. Ho ida nee nia haruka nia oan mane mesak mai iha mundu  iha fatin no tempu nebe especial tebes. Nia hili no prepara antes feto ran ida hori uluk kedan atu hala’o nia misaun nu’udar inan ba ita nia Salvasaun, misaun ida neebe nia simu ho liberdade liu husi nia Fiar. “KETA TAUK MARIA”.

 Ita ida idak iha sentimento  tauk, ita tauk kona ba planu saida deit mak nai haraik mai ita, ita tauk kona ba ita nia limitasaun ou kondisaun nebe ita hasoru loro- loron nian, kondisaunn nebe lori ita atu forma ita nia an nuudar cristaun ida. Ita tauk atu hasoru difikuldade nebe ita simu iha ita moris nu’udar disipulo cristaun nian.

Ida nee importante mos ba ita atu foti exemplu husi ita nia inan Maria, atu hakat liu husi ita nia tauk, hodi hakuak deit Nai nia hakarak ho fiar no domin tomak. Hau fiar katak wainhira ita tau ita nia konfiansa ba Maromak ita nia tauk sei namlele iha Nai nia grasa hanesan Maria, bainhira ita nia fuan nakonu ho maromak nia domin  ita nia tauk sei lakon. “NEE SA NAI NIA ATAN OAN MAK NEE HALO TUIR ITA NIA LIAFUAN BA” ita simu no hare ita nia salvasaun lolos, nomos liu husi Maria nia resposta, nebe nia hatan ho liberdade ba Maromak.

Maria nia “RESPOSTA” ba maromak hatudu mai ita no haforsa ita atu hili maromak nia dalan ho liberdade hodi  tuir Jesus no haklaken Maromak nia lia fuan ba mundo tomak liu husi ita nia ejemplo moris nian lor-loron.   

 

                                               Reflesaun Husi: Irma Cacilda de Fatima

         

Kontinua Le'e

HAPARA VIOLENSIA HASORU FETO NO LABARIK

 

HAPARA VIOLENSIA HASORU FETO NO LABARIK.

Oe-cusse ambeno sai hanesan rai ketan ida husi Nasaun RDTL nia laran.

Iha tinan hirak liu ba liu husi rejultadu survei dadus sira ne’ebe tama iha NGO servisu kona ba violensia hasoru feto no labarik iha Oe-cusse mak a’as liu Distritu sira seluk, Tanba ne’e maneira ida atu hapara Violensia hasoru feto no labarik mak liu husi“ kampanye” atu fanu ema nia konsensia hodi hapara violencia iha manera oi-oin.

      Aktividade ne’e partisipa husi Estudantes Eskola Secundario, Pre-secundario no labarik feto husi colegio Dominikana iha Oe-cusse, Autoridade  sira iha RAEOA hamutuk ho NGO ne’ebe hala’o sira nia kna’ar  hanesan Rede  protesaun ba feto no labarik.

     Kampanye ne’e hala’o iha RAEOA durante loron 16 hamutuk ho Autoridade local sira, komesa husi 25 novembru to’o 10 dezembru 2020 liu ba. Objectivu husi kampanhene’e mak atu kria ambiente hakmatek ida hodi halo mane sira realija no konsiente katak feto no labarik laos atu sai fatin ba mane sira  hodi hatudu sira nia forsa  negativu liu husi baku, kastigu no ikus mai halakon feto no labarik sira nia vida. Maibe uja maneira hanorin ne’ebe professional no pojitivu; fahe servisu ho parsial, reja hamutuk  no iha aktividade sira seluk hodi bele kria ambiente ida ne’ebe Harmonia, dame no hakmatek iha familia,sosiedade, Nasaun no iha Mundu tomak.

            Ikus mai iha loron 10 fulan Dezembru hala’o aktividade “kampanye hapara violensia hasoru feto no labarik” iha Raeoa Prezidente Autoridade ho nia Strutura mane sira mak prepara hahan ba partisipante sira hotu, hodi rekoinese feto no labarik sira ninia prejensia iha aktividade refere no promove igualdade generu.

Tuir carisma ami nia congregasaun nian atu foti dignidade feto sira nian, ami  apoio ba actividade sira hanesan ne'e tan ami fiar katak Feto mak sai naroman ba familia, sociedade no ba kreda. Nune'e ami hakribi violencia oi-oin liu liu ba feto no labarik sira. Ami mos agradese ba autoridade sira husi REAOA nebe foti inisiativa atu hala'o kampany ida ne'e.

 

Hakerek Husi:

Irma Sabina Mota, OP

Kontinua Le'e

ESKOLA DOMINIKANA HERA HALA’O GRADUASAUN EXERCICIO BA DALA 5 ANO LETIVO 2020 HO NIA LEMA: "HAU NIA FUTURU MAK HAU NIA VITÓRIA"

 

Iha fulan Dezembro dia 12 de 2020 marka tan momento istorico iha eskola Dominikana Hera, Timor-Leste. Eventu ida ne'e Selebra loron graduasaun ba pre-Escolar ba sira ne'ebe remata tinan Lima. Ho numero tatal estudante graduados hamutuk 55.  Mane nain 25 no feto nain  30  ho sira nia mehi ne'ebe as bele realiza dunik sira nia mehi iha loron ida ohin hodi hakat tan ba pasu tuir mai.

Ema me'ebe presente iha ceremonia ida ne'e mak familia husi graduados sira, religiosa sira, autoridade local sira, estudante primaria, Irma sira husi comunidade tolu, amu Dominicano sira no konvidadus esensial sira  inklui Diretor National Edukasaun Pre-Escolar, Diretor HANDS ne'ebe serbisu hamutuk ho ministerio Edukasaun hodi suporta formasaun ba manorin sira iha Timor laran tomak kona ba Dezenvolvimento labarik nian. Sira nebe hato'o orador ba mak Diretor Nacional, Diretor HANDS, Diretor Eskola Dominikana Irma Elsie Bagaypo, OP.  Eventu ida ne'e fo signifikante tebes ba labarik, no sira haksolok tebes.

Graduados sira sente serteza ho oin ne'ebe midar, marça ho sira nia toga mutin no akompana ho musica graduasaun. Audensia no sira nia maun alin primaria fo sira nia basa liman maka'as ba sira nia alin graduados, halo inan aman sente orgulho no kontente hare sira nia oan hakat ho ropa mutin mai iha palku leten hodi hatudu katak ne mak ami inan aman nia sucesu ba ami nia oan sira.

Mensagem husi Director Pre-Escolar dehan:Inan aman sira rona didiak mai "Fundasaun mak imi nia oan sira". Sira mak abut ba futuru no sei lori Timor nia naran ba oin bainhira ita sira ne'e laiha ona. Mensagem furak tebes halo inan aman sira hotu nonok no admira oinsa sira nia oan sira aprende iha escolar ida ne’e.

Ceremonia da graduasaun remata ho Bensaun Dominicano nian presidido husi Padre Santiago Saiz,OP ba hot- hotu nebe hola parte iha ceremonia graduasaun. Especialmente ba graduados hodi fo obrigado ba Domin no spiritu ne'ebe sulin ba sira durante sira sira nia aprendisagem hahu husi inisu to ohin sira remata sira nia graduasaun. Bensaun ida ne'e hanesan simblu kultura Dominicano nian bain hira ita termina serbisu sira iha tinan tomak.

Ho oportunidade ida ne hau mos hakarak hato'o hau nia agradecementu ba manorin sira hotu, staff no  estrutura tomak ho imi nia esforso hodi tulun no suporta ita nia oan sira.

 

Hakerek Husi:

Irma Alzira dos Reis, O.P.

Kontinua Le'e

Ho ksolok hein ita Maksoin nebe atu mai ho laran mos, paz no dame iha ita Nia fuan.

 Ho ksolok Mai ita hotu, Hein ita Nia maksoin nebe atu mai ho laran mos, paz no dame iha ita nia fuan.

Reflesaun husi Irma Madalena De Deus Maia

 

Domingo ba dala tolu tempu adventu

Primeira Leitura: Is 61:1-2a,10-11

Segunda Leitura: 1Tes 5:16-24.

Evangelho: Jo. 1:6-8,19-28

 

Evangelho ba ohin Domingo nian fo hanoin Mai ita katak, ita haksolok nafatin hodi prepara ita nia neon ho laran, fuan, isin no klamar atu simu ita Nia Mahein nebe sei Mai. Nia Mai atu Soi ita no liberta ita, dada sai ita husi nakukun laran ba naroman. No evangelho ohin nian hateten Mai ita katak, prepara ita nia an, haksolok no hein o fiar metin iha Jesus nebe atu Mai. Fe no esperansa nebe ita iha, haforsa ita atu sai hanesan profeta Ida hanesan Joao Batista nebe hakilar iha Rai fuik Maran, hadia Mai Nia dalan atu nune Nia bele hit aan Mai horik iha ita fuan. Saida mak ita Halo hodi prepara atu Hein no simu ita nia liurai atu mai? 1. Buka atu fo tempu ba ita Nia aan atu reflete ita Nia moris Durante ita exsite iha mundu Ida ne. 2. Buka atu perdua ita nia aan, dalaruma ita halo sala uitoan ita sempre tau todan ba ita nia aan. 3. Buka atu fo perdua ba malu, liu- Liu ba ema sira nebe durante ne sai hanesan ita nia inimigo. 4. Konverte no buka Halo rekonsiliasaun entre ita ho Maromak no ema seluk. 

Buat hirak ne mak sai hanesan fatuk, ai tarak, rai koak nebe iha hela ita nia moris , ne'e duni ita precisa hadia, liu husi ita nia orasaun no konfessa. 

Buat hirak ne mak Joao Batista haklaken Mai ita katak ita rasik precisa hadia, la'os ema seluk mak mai hadia maibe ita aan rasik duni mak hadia buat hirak ne, atu nune'e Jesus mai nia bele fo naroman mai ita. Atu sai ema nebe nakonu ho espiritu no aten barani hanesan Joao Batista, Mai ita ema ida- idak haburas ita eia spiritu moris nian ho domin no orasaun atu nune ita mos bele sai matadalan ba ema seluk. Ho ksolok Mai ita hotu, Hein ita Nia maksoin nebe atu Mai ho laran mos Paz no dame iha ita Nia fuan.

Kontinua Le'e

Graduasaun exercicio iha Pre Eskolar Saun Domingos de Gusmao, ba dala 14. Loron 5 de Dezembro de 2020 ho lema: “O nosso Futuru é Brilhante”

 

Graduasaun exercicio  iha Pre Eskolar Saun Domingos de Gusmao, ba dala 14 halao iha loron Sabadu, 5 de Dezembro de 2020 ho lema: “O nosso Futuru  é Brilhante”

Graduasaun nee hahu ho simu Bainaka husi Estudantes Drumband (Eskola Dominikana Hera), hodi akompanha bainaka husi Ministerio Edukasaun Nasional, Ministerio Edukasaun Municipio, delegada Provincial Irma Milagros Guarte no reprezentante Dir. Edukasaun Dominikana hafoin estudantes no inan aman akompanha hodi lori sira ba Salaun de Saun Domingos.

Continua kedas Marcha husi Graduantes,ho Total graduantes 56 feto 26 mane 30. 

Mestra sira nebe hanorin mak iha ano escolar 2020 mak Mestra Elda Elda Soares, Mestra Saturnina da Silva no Irma Fatima Sequeira ho sira nia diretora escola nian mak Irma Lucia do Carmo.

Kongregasaun Missionarias Dominicanas do Rosario  serbi maun alin sira liu husi edukasaun Bazika tan nee ami fasilita edukasaun kualidade bazeia ba ami nia karizma  hodi opta ba direito moris no dignidade hodi assumi lema: Ciencia, virtude no aksaun sinteze fiar, cultura no moris;

Ciencia: Dezenvolvimentu matenek integrada ho fuan hodi lao too iha lialos liu husi investigasaun     cientifika 

Virtude: konstrui no adopta eskala valores nebe orienta sira nia etika moral hodi moris iha     dignidade

Aksaun: sai labarik dinamika, aktivu hodi dezenvolve nia hanoin atu sai produtivo nokreativo.

Graduasaun exercicio ida ne'e nakonu ho ksolok no ambiente familiar tan iha participasaun masima husi inan aman, aluno sira, professoras no convidado sira. 

Representante husi Irmas Dominicanas, Irma Alda Soares, iha ninia mensajen fo emfasis ba  Papel professores nian liu-liu foca ba area importante tolu:

1.      Oinsa maka profesores sira bele ajuda, dezenvolve estudante sira nia matenek liu husi procesu aprendezazen nian.

2.      Profesores sira laos deit atu hanorin materia deit maibe atu transforma mos estudante sira nia an liu husi procesu aprendezazen

3.      Professores mos sai mata dalan ba estudante sira hodi descobre kona saida maka ba lialos.

Tamba ne’e ita iha Timor presiza hasae liu tan capacidade professores sira nian atu bele iha capacidade diak hodi influencia estudante sira.

Nia hatutan  katak  atu sai professores nebe diak tenke iha objectivo ne’ebe klaru no nia tenke domina ninia lisaun, tenke preparado molok ba iha aula laran, no iha responsabilidade  boot ba studante sira, Hodi nune’e bele encoraza estudante sira iha procesu aprendezazen.

Irma Alda mos agradese ba professores sira ne’ebe fo an tomak  hodi hanorin iha escola sao domingo de guzma. Ha’u hatene professores ne’ebe hanorin iha infantil ou TK ne’e la fasil tamba atu acompanha ou hanorin ita nia alin kiik ho idade 4, 5 ou 6 ne’e presiza pasensia barak, no domin ne’ebe boot.

Hanesan agradesemento ba profesores sira estudante  ida ho naran Milena da Silva dedika Puizia ida  ba sira ho titulo:

LIAN OSAN MEAN

Professora…

Rai Nakaran Destina Imi Nia Deskansa

Maske Imi Matan Kolen Atu Hateke

Laiha Opsaun Atu Hapara

Haksumik Imi Husi Toba Fatin.

 

Hanesan Loro Matan Dader Nian

Harahun Nakukun Iha Lidun Lalehan

Husi Mahoben Domin Iha Imi Fuan

Hatutan Ba Ami  Orasaun ho Haksolok.

 

Professora...

Husi Oras ba Loron, Semana Hakat ba Fulan

To’o Tinan Besik Remata, Imi Lian Nafatin Halerik

Dalen ho Lian Mamar,  Hatudu dalan Futuru Nian.

Imi Lasenti kolen Atu Hakbiit Ami,

Dada Ami Liman, Marka Dalan Moris

ABC no 123, Mak Sentidu Moris nian

Hau Belun Sira…

Kesi ba Ho Korenti Domin

Lian Menon Husi Professora

Hodi Kuda iha Ita Nia Hanoin

                                                                          Basa.....

Sira Lian Mak Osan Mean

Obrigada.

 

Hakerek husi:

Irma Lucia do Carmo, OP

Kontinua Le'e