Ita labele sai diak iha mundo nebe’e mak moras hela. Irma Natalia konta nia esperensia iha tempu pandemia husi Barañain, Navarra Espanha

 

Esperensia iha (enfermeria Baranain) iha tempo Pandemia.

 

Ita labele  moris ho diak, iha mundo nebee mak moras hela? Ho realidade mosu pandemia halo ema hotu panico, tauk, preocupa no la hakmatek. Ita iha Crisis mundial, ita hotu iha risco laran no bele dehan katak laiha ema ida, escapa o halai o hases ann husi crisi ida ne’e..

Hau atu konta hau nia  experensia oinsa serbisu iha enfermeria, ajuda hare Irma sira nebee mak moras. Iha tinan kotu fulan  febreru  bainhira comesa hahu moras virus covid 19, senti hanesan bai-bain tanba hare  e rona husi notisia televizaun deit no la senti katak covid 19 semu mai  to’o nee. Bainhira virus comesa daet ba bei-beik ona foin senti tauk tanba amiasa ida, risco boot ou perigoso  liu-liu ema sira nebe mak moras   no isin fraku.

Quarentena comesa hahu ...virus mos daet bei-beik....ema hotu sai panico tebes...mundu  hotu silencio no hakmatek.

  Iha comunidade no enfermeria nia laran atidades sira hotu lao tuir protocolu no  loron ba loron tempo lao nafatin maibe  hau senti katak loron sira  sai hanesan deit tanba lasenti hoirsehik loron saida, ohin loron saida, aban loron saida, actividade no programa hanesan deit. Sa tan la reza  no laiha missa aumenta sai hanesan ema gentiu. Iha sentimento oi-oin mak mosu hanesan triste, nervozo, contenti  nune’e  mosu preguntas bar-barak iha ulun ida ne’e los kalae ou Covid-19 tebes duni ka lae? tanba seidauk senti , hetan, experensia kona ba moras nee, tanba rona deit...maibe luta continua nafatin hodi hases ann husi moras  nee.

Iha mos regra oi-oin atu halo tuir hodi nune’e labele hetan da’et husi virus ida.....regra mak complicado liu nee mak uza masker tanba la'os uza iha liur deit maibe ami uza iha uma laran bainhira atu toba mak foin hasai husi ibun.

Senti deficil no sai complicado liu-liu bainhira iha comunicasaun  husi lia fuan sira no comprensaun la klaro  tan ibun taka metin ho masker. Koalia mos lia fuan la klaro, rona la mos sorte boot matan  la taka nune’e  aprende koalia ho matan deit husi matan mak foin bele hatene saida mak nia dehan.

Loron ida  colega serbisu ida  hetan positivo husi moras ne’e ema hotu iha comunidade comesa tauk, ami hotu hahu  test PCR hodi hatene ema nain hira mak hetan contagio maibe graças a Deus  ema ida seidauk hetan contagio husi moras ne’e. Tempo la’o nafatin, loron troka ba fulan  virus comesa da’et no serbisu nei-neik maibe ita labele hare ho matan.

Hakfodak mai irmas  balun mos hetan ona  resultado positivo liu husi PCR test. Ami comesa rame- rame halo test kada semana, ami balun iha resultado sai negativo.

Bainhira rona  iha ona vacina ami senti hakmatek no kontenti katak bele libre ona husi virus  ida liu-liu ba Irma sira nebe mak iha moras maibe Maromak nia plano oin seluk.

Virus comesa serbisu maka’as no daet ba nafatin maibe ami  iha ona esperansa katak ami bele livre tanba sura deit loron no hein oras atu vacina.  Esperansa nee la realiza  tanba derepende deit Irma  ida tan hetan positivo no continua daet ba sira seluk  no daet colega serbisu sira mos significa katak ema ida labele escapa o hases an husi virus ne’e.Oras ne'e dadauk irmas lubuk ida no colega serbisu lubuk ida mak hetan moras ida ne'e.

Tauk ne’e comesa aumenta, maibe  situasaun ida ne’e la halakon hau nia esperansa , hau nia  fiar tomak ba  Maromak deit  tanba Nia mak cria no sai nain ba mundo ida, hatene oinsa atu hapara moras ida ne’e hanesan iha evangelho (Joao 14:27) haktuir Maromak hamutuk ho ita no hela iha ita leet.

 Mesmu la reza lor-loron ou laiha ona missa maibe hau nia fiar sai maka’as liu tan. Hau senti Maromak besik liu hau. Nia la husik hau mesak, Nia continua luta nafatin ho hau, buat hotu entrega ba Nia.  

Nune’e maluk sira mai ita cuidadu an no tau matan nafatin ba ita nia saude tanba ema ida sei la  ses an husi moras ida ne’e. Lalais o kleur virus ne’e sei to’o. Ema ida la hetene so Maromak deit mak hatene. Maromak fo haraik bensa ba ita hotu no ita reza ba malu. Muchas Gracias!

Ita labele sai diak, iha mundo nebe’e mak moras hela.

 

Irma Natalia Fouk, OP

Barañain, Navarra Espanha

Janeru,  2021

Kontinua Le'e

Estuda Hamutuk: Haklean Kunhesementu kona ba Saun Tomas de Aquino.

 

Familia Dominicana iha Timor continua hala'o formasaun hamutuk. Ba dala ida ne'e, Pe. Santiago Saiz, OP lori irmas no irmaos sira atu kumprende liutan airin imporatante ida iha espiritualidade Dominicana nian mak: Estudo.

Iha formasaun ida ne'e foka  liu  ba Saun Tomas de Aquino ninia moria no sai inspirasaun no modelo nebe’e nakonu ho Roman matenek nian ba familia dominicana.

Hanesan irma Dominicana ida kontente no orgulho atu hatene diak liu tan kona ba saun Tomas de Aquino nebe cunhesido hanesan doutor da igreja ho ninia Summa Teologia nebe sai fundamento ba estudo filosofia no teologia.   

Igreja selebra festa saun Tomas de Aquino iha loron 28 de Janero. Husu nafatin nia harohan daet atu tau matan ba estudante sira hotu liu-liu ba irmas no irmaos Dominicana sira liu-liu ba sira nebe sei iha formasaun.  

 

Ir. Cecilia Imaculada S. de Araujo, OP

Kontinua Le'e

“O MAK HAU NIA OAN DOBEN”.

 

FESTA BATISMO NAI NIAN

Primeira Leitura (Is 42:1-4,6-7 ou Is 55:1:11)

Segunda Leitura (Acts 10:34-38 ou 1 Jn 5:1-9)

Evangelho ( Mk 1:7-11)

  

“O MAK HAU NIA OAN DOBEN”.

Dala barak ita rona Inan-Aman  hateten ba oan sira “Hau Hadomi O.” Nune'e mos entre maun alin, belun sira mos hatene liafuan nebe hanesan. Liafuan Hau hadomi O  fo  afirmasaun ba ita katak ita iha valor, ita importante no ita   iha confiansa  katak ema ne'e sei tau matan ba ita no sei la husik ita mesak. Ita iha ninia hanoin no ninia fuan.

 Hanesan mos liafuan diak ohin nian nebe hateten mai ita katak Jesus mak Aman Maromak nia oan Doben. 

São João Batista haklaken katak “ Ida ne’ebe mak boot liu hau, nia mai ona tuir hau.” Jesus nu’udar Maromak nia oan la precisa simu batismo maibe ho ninia batismo hatudu katak NIA mai atu salva ita sala nain sira, atu husik ita sai livre husi sala ne’ebe mak domina ona ita.

           Jesus nia batismo acontece iha momentu nebe  nia rona lian husi Aman Maromak katak Jesus mak Aman maromak nia murak “ O mak hau nia oan doben iha O hau sente hakmatek.” Hare ba Jesus, Aman Maromak sente laran hakmatek no satisfaz. Ida e’e mos signifika  ita nia batismo.

          Festa ohin loron nian convida ita atu hola parte iha nia domin no fo hanoin ba ita hotu katak ita hotu Maromak nia oan doben, Aman maromak nia domin ba ita idak-idak la iha nia sasukat. Tan Aman Maromak hadomi ona ita, nune’e mos ita idak-idak mos sei haka’as an atu  hadomi malu ho fuan ne’ebe moos nakonu ho domin.

          Iha Jesus nia batismo, Aman Maromak afirma katak “Jesus mak Amam Maromak nia oan doben, iha Jesus aman sente hakmatek.” Liafuan ida ne’e hateten mos mai ita hotu-hotu. Aman Maromak kria ita hanesan oan Feto ho mane liu husi ita nia batismo, ita sai familia foun Jesus nian. Espirito Santo tun ba Jesus iha momento ne’ebe nia simu batismo, Espirito Santo ida ne’e mos tun mai ita ita idak-idak iha tempo ne’ebe mak ita simu batismo. Jesus Kristo nia moris sai ida deit ho Aman liu husi Espirito Santo. Ita moris metin ho Kristo tamba liu husi Espirito Santo nia kbi’it.

          Wainhira ita simu batismo,  iha tempo ne’eba kedas Maromak promote ona nia an ba ita, hamutuk ho domin husi Inan-Aman ho familias sira.

Batismo mak sai dalan dahuluk, atu hakat ba Jesus Kristo. Hanesan Jesus hala’o nia misaun no moris public nian hahu iha mota Jordaun, fo hanoin mai ita  atu labele haluhan katak ema ne’ebe mak simu ona sacramento batismo nia sai ema ida ne’ebe diferente, tan iha marka ne’ebe mak uniku, la hanesan ho ema seluk. Ita mate ona ho Kristo iha momento ne’ebe Nai Lulik tau be iha ita nia ulun. Ita sai kriasaun foun iha Kristo. Ita moris foun fila fali. Buat hotu hahu foun. Husu atu ita moris tuir promesa ne’ebe ita halo ona iha ita nia batismo atu sai nu’udar Profeta, Liurai, no nai Lulik ba Reino Lalehan nian. 

 

Reflesaun Husi: Irma Nelia Pinhero, OP

Kontinua Le'e