Matan Moris

Matan Moris!

By: Sr. Fatima Pui, OP

 

  Kreda fo tempu ba ita fiar nain sira, tempu especial atu prepara an. Tempu ida ne’e  ita bolu tempu Advento. Liafuan ida nebe ita rona husi liafuan diak iha primeiro domingo tempu advent husi evangelho saun Mateus nian  mak “Matan Moris”.  

    Matan moris!  iha lian ingles katak” stay awake. Matan moris fo hanoin mai hau atu fo valor no aprecia tempu hot-hotu. Tempu horseik liu tiha ona, tempu abanbairua nian seidauk to’o no tempu ohin loron nian iha ninia folin boot, tenki aproveita ho diak. Koko uza tempu ohin loron nian hodi halo buat nebe  iha folin ba ita nia moris.  Tempu ohin loron nian wainhira  liu nia  sei la fila fali mai.

     

     Jesus moris iha rai Belen iha  tinan rihun rua liu ba, Nia moris iha ita le’et, no Nia sei mai fali iha loron ikus. Matan moris halo ita descobre ninia prezensa iha ita nia moris lor-loron atu loron ida sei to’o mai toman ita prepara an nafatin.

     

      Tempu advento fo hanoin fali mai ita atu matan moris hodi prepara an. Prepara an oinsa? Maluk barak prepara an hodi sosa sasan foun ba tempu natal, halo dosi, prepara hahan midar, sosa kareta, hamos uma, balun halo uma foun, halo belen iha uma oin no prepara buat seluk tan maibe la’os deit ida ne’e.

    

    Tempu ida  ne’e precisa  fo tempu ba Jesus, hametin ita nia relasaun ho nia liu husi ita nia orasaun no halo diak ba ema seluk. Gasta ita nia tempu iha tempu ida ne’e atu halo diak no hatudu ita nia domin ba ema seluk atu sira moris bele senti katak Maromak hadomi sira.

    Karik maluk balun hirus malu  familia uma laran no la gosta malu  ho ninia vizinho no  maluk ruma,  tempu ida ne’e koko atu bele buka malu koalia ba malu nune’e bele iha fuan nebe hakmatek haksolok hodi simu Jesus.

   Iha tempu ida ne’e gasta ita nia tempu ba buat nebe esensial no importante iha ita nia moris. La precisa tauk gasta tempu atu halo diak no hadomi ema seluk.

Matan moris nafatin hodi hein Nia mai!Hein ho esperansa, domin, ksolok no hakmatek.