Prepara dalan ba Nia

Prepara Dalan ba Nia

     

                    Tempu advento mos tempu ida atu prepara dalan ba Na’i.

     Moris ne’e hanesan dalan ida. Dalan ida nebe ema hotu liu. Liu husi dalan ida ita La’o  husi fatin ida ba fatin seluk. Lor-loron ema barak la’o. Balun la’o ain, balun sa’e kareta, balun sa’e ro, balun sa’e aviaun maibe importante liu antes atu la’o ba fatin ida precisa hatene tansa hau la’o,  hau atu la’o ba nebe ?no  hau nia dalan mak ida nebe’e los? Wainhira ita husu perguntas sira  iha leten, ita iha entusiasmo no hakarak lalais atu  la’o no to’o  ba fatin nebe ita hakarak ba. Atu to’o ho diak antes ita la’o, ita mos precisa prepara an.

     Semana ida ne’e, ita tama iha semana ba dala tolu tempu advento nian,  hamutuk ho saun Jose no Nain feto nebe la’o ba Belem nune’e Jesus bele moris ba. La’o ho haksolok, fo savor ba dalan nebe ita liu atu nune’e ita bele prepara ita nia fuan atu nune’e bele sai Jesus ninia Belen.

    Dalan dook liu no importante nebe ita atu la’o ba mak dalan atu descobre murak mean iha ita nia laran. Buat nebe furak liu it abele hetan iha ita nia fuan, tan iha neba ita descobre Maromak ninia hakarak mai ita ida-idak.

    La’o ba! Ida-idak la’o tuir nia dalan rasik Maibe hanoin nafatin saida mak importante iha dalan  moris nian. Hadomi no tau matan ba familia liu-liu ba inan aman, halo diak ba ema seluk, ajuda ema seluk, haka’as an hatudu domin ba sira nebe halo a’at mai ita no koko nafatin atu sai instrumento Maromak nia domin iha ita le’et. 

Prepara dalan ba Nia, atu husik ita nia fuan sai Jesus ninia Belen, husik Jesus moris iha ita ida-idak nia fuan nune’e ita iha fuan ida nebe hatene agradese, hatene haksolok, hatene cria paz no hatene hadomi lolos hanesan Nia hadomi ita.

By: Sr. FatimaPui