UITOAN MAIBE NATÓN

 

             

DOMINGO BA DALA XVII TEMPU BAIBAIN NIAN

 

                           1a. Leitura:2Re. 4:42-44

                           2a. Leitura: Ef. 4:1-6

                           Evanjelho: Jo. 6:1-15

 

     Laifuan diak ohin loron nian ba hau hanesan istória fiar nian ne’ebé furak no interesante tebes. Uluk knanain husi istória ida ne’e,  ita hare ba diálogo entre Jesus ho ninia discípulo sira antes acontese multiplicação de pão.

    Wainhira Jesus foti matan hodi hare katak ema lubun boot mai hasoru Nia, Nia dehan ba Filipe, Ita sei sosa hahan iha ne’ebé naton ba ema sira ne’e atu han?Nia koalia nune’e atu koko nia, basá Nia hatene ona saida mak Nia atu halo. Ita sosa hahan naton ba sira atu han.  Jesus fo garantia katak sei iha hahan natón ba hot-hotu.

    Filipe hatan ba Nia: pão osan atus rua mos sei la to’o mesmu  ema ida-idak sei simu uitoan. Filipe  ninia hatan hatudu katak nia iha dúvida, mesmu iha natón mos sei falta, sei la to’o nafatin.

  Discípulo ida tan ho naran André, Simão Pedro nia alin hateten ba Nia: Iha ne’e iha labarik oan ida ho pão fuan lima ho ikan rua maibe ne’e sei to’o oinsa los ema barak liu? Simão Pedro hakarak dehan iha uitoan deit sei la to’o  ba ema hotu.

      Mai ita haré no rona didiak ba sira ninia liafuan sira. Jesus: sei iha natón ba ema hotu. Filipe: Sei iha  natón ba ema hotu basa ita iha uitoan deit? Simao Pedro: iha uitoan deit no sei la to’o.

  Lógica humana hanoin katak iha uitoan deit atu fo ba ema barak maibe Ninia discípulo sira haluha dala ida tan katak Jesus iha sira le’et. Jesus hakarak hatudu ba sira katak iha uitoan maibe natón  ba hothotu liu husi fahe ba malu uitoan ne’ebe sira iha. Jesus mak Humano no Divino.

   Iha Eucaristia, ita mai hamutuk hanesan comunidade ida atu fahe ba malu Cristu ninia Isin no Ran iha meja ida deit no ita iha responsabilidade atu fahe saida mak ita simu ona husi  Na’i.

  Ita tenki hatene compartir uitoan ne’ebe ita iha ho ema seluk no fiar katak iha fahe ba malu entre ita, ema hotu sei hetan uitoan maibe naton ona. Hanoin katak uitaon nebe ita fahe ba malu sei fo Ksolok ba ema barak. "Winnie the Pooh" haktuir nune’e:  Dala ruma buat nebe kiikoan sei hakonu ita na fuan no Dala ruma buat ne’ebe utioan sei halo diferencia boot, Nino Varsimasvili dehan.

   Istória seidauk hotu, mai ita  continua lai. Tuir mai,  Jesus dehan: haruka sira tur hotu, quase ema rihun lima. Nune’e Jesus foti pão, fó agradese no fahe ba ema sira ne’ebe tur iha neba. Nia halo nune’e mos ho ikan sira. O restu da história, ema hotu han no iha natón no liu tan ba ema rihun lima.

    Antes milagre acorrido, Jesus foti pão no fó agradese. Liafuan Jesus nia ne’ebe familiar ba ita iha celebrasaun Eucarísitica. Liafuan Eucaristia foti husi lian grego no describe iha assaun katak: fó agradese.

   Ikus mai, fim husi istória  mak: Ita hotu hanesan ema eucaristia nian, precisa aprende fo agradese, hatene fahe ba malu saida mak ita iha, no iha fiar metin. Iha Eucaristia, Jesus fo Nia isin rasik ba ita, no Nia haruka ita ba atu servi ema seluk.

    Enquanto ita hasoru hela virus ida ne’ebe ita la hatene bainhira mak sei lakon, keta lakon esperansa. Mai ita fo agradese tan ita sei bele moris, koko fahe buat uitoan ne’ebe ita iha ho maluk sira ne’ebe precisa, husik Nia halo milagre. Mai ita habo’ot ita nia fiar iha Nia no ho fiar ida ne'e bele dehan katak uitoan maibe natón ba ema hotu ho Jesus iha ita le'et.

Hakerek husi: Irmã Maria de Fatima Pui, OP