ENCONTRO IHA WE MATAN IDA NE’EBÉ FO SATISFAZ BA DESEJO FUAN NIAN

 

DOMINGO BA DALA TOLU TEMPU QUARESMA

1a. Leitura: Exodus 17:3-7

2a. Leitura: Rom. 5:1-2:5-8

Evangelho: Jo. 4:5-42

 

Iha   moris ita iha diversos encontros ho ema oi-oin, iha fatin la hanesan ho experensia diferente. Iha encontro sira ne’e ita iha sentimento no satisfasaun la hanesan mos. Iha encontro balun ita bele haluha lalais deit no iha encontro balun susar ita atu haluha no ita sei hanoin nafatin no rai iha ita nia fuan tan ita aprende buat foun no significativo husi encontru sira ne’e iha moris.

Iha Evanjelho ohin nian haktuir mai ita kona ba sorumuto ka hasoru malu entre Jesus  ho Feto Samaritana iha we matan Jacob nian. Feto ida ne’ebé laiha naran buka nafatin ema ida atu fo satisfasaun ba ninia fuan.  Ikus mai, nia hasoru Ida ne’ebé transforma nia moris.

Hasoru malu entre  ema Judeu no Samaria ida ne’ebe quebra barrera  entre sira tan ema Judeu ho Samaritano sira labele koalia ba malu tuir sira nia lisan tan iha diferensa oi-oin.

Husi istoria ne’e haktuir mai ita kona ba:

1.       Sorumutu ka Hasoru malu: Jesus la’o kole, tur iha we matan no feto ne’e mai atu kuru be’e. Sira hasoru malu iha we matan ida.  .

2.      Conversação:  Jesus dehan ba feto ne’e:  fo be mai Hau atu hemu. Feto hakfodak tan Judeu ida labele koalia ho Samaritana sira. Tan Jesus hase nia, entaun nia komesa koalia ho Jesus.

3.      Mudança iha fuan: Jesus hatene kona ba feto ne’e inclui nia laen sira. Jesus la hare ba nia sala maibe nia hakarak hakbesik ba nia. Jesus hatudu ninia domin ba nia atu fo ba nia we ne’ebe sei la hamrook tan. Nune’e Feto converte an.

4.      Haklaken Liafuan Diak: Nia halai kedas ba haklaken ba ema sira iha vila tomak no ema Samaritano sira fiar katak Jesus mak we matan moris. Jesus mak Messias.

Iha tempu quaresma ne’e nia laran convida ita atu keta tauk buka Jesus. Nia hein nafatin ita mesmu dala barak ita la’o ses. Nia cunhese ita inclui ita nia sala sira maibe Nia hadomi nafatin ita. Nia hakarak ita hemu husi we matan lolos nian atu ita la hamrook tan.

Iha Salmo 42 haktuir katak: Nudar rusa buka we matan moris, nune’e mos hau klamar buka Ita Na’i. Buka nafatin Nia, tan se ita nia hakarak lolos mak Maromak ita la hakarak tan buat seluk ida.

Reflesaun husi; Irmã Maria de Fatima Pui,OP