DOMINGO BA DALA IV TEMPU QUARESMA
1a. Leitura: 1 Sam.16:1.6-7:10-13
2a. Leitura: Efeso 5:8-14
Evanjelho: Jo. 9:1-41
Naroman importante tebes mai ita. Maibe dala barak ita la hatene apresia ahi ka naroman wainhira buat hotu lakan. Tamba ne’e iha nakukun deit mak ita sei buka tuir naroman sei mai los husi ne’ebé?
Jesus kura ema ida matan delek maibe ida ne’e foin mak comesa. Depois de hetan kura husi Jesus, Fariseu balun husu nia atu koalia kona ba Jesus. Nia comesa bolu Jesus “Mane ida”. Mane diak ida halo buat diak ne’e ba nia. Depois husu fali nia, nia bolu Jesus “ profeta ida”. Ikus mai nia hatan katak Jesus mak Maromak Oan, nia dehan: “ Hau fiar, Na’i.
Jesus hasai husi nia nakukun, nune’e nia bele hare buat hotu. Jesus mak naroman mundo nian, lori ema ne’e husi matan delek ba vijaun, no improtante liu, husi vijaun ba cumprensaun klean kona ba naroman ida ne’e.
Matenek nain ida fo hanoin ba ita katak: “iha momentu sira nakukun liu mak ita focus atu hare naroman”( Aristole). Wainhira ita moris iha nakukun laran, focus atu buka tuir naroman. Mundo ofrese ita naroman oi-oin maibe buka tuir lolos Naroman lolos nian. Naroman Jesus nia mak halo ita kumprende didiak kona ba ita nia moris. Saun Paulo fo hanoin ita atu moris hanesan naroman nia oan sira( Ef. 5:1)
Dejeju husi fuan atu buka naroman lolos mak loke dalan ba ita atu hakonu dejeju fuan nian tan Na’I Maromak haré liu ba ita nia fuan( 1 Sam. 16:7). Husik naroman Jesus nian mosu husi ita fuan. Maya Angelou dehan katak “ laiha buat ida atu halakon naroman ne’ebé mosu husi ita nia laran”
Iha tempu quaresma ida ne'e mai ita focus ba naroman Jesus nian. Naroman ida sei leno ita nia dalan lor-loron no ba nafatin.
Reflesaun Husi: Irmã Maria de Fatima Pui, OP
0 comments:
Post a Comment