ITA NIA BOM PASTOR MAK CRISTU NAI LIURAI

 

SOLENIDADE  JESUS CRISTU, NAI LIURAI

1a. Leitura: Ez 34:11-12, 15-17

2a. Leitura: 1 Cor 15:20-26, 28

Evangelho: Mt 25:31-46

 

Wainhira ita rona liafuan liurai, ita hatene ema ne’e famosu, matenek, riku, iha poder atu ukun. Nia sai hanesan leader boot ida ba ita. Ema barak rona, respeita no hamtauk nia.

Iha reflesaun ohin loron nian hau hakarak dehan liurai mos bele sai hanesan bibi atan diak. Karik ita sei dehan oinsa atu conecta bibi atan diak ho liurai ida?Existe diferenças boot iha sira nia moris no ocupação.

Maibe ita nia Bibi Atan Diak ho Cristu Na’I Liurai existe semelhanças barak. Jesus la’os Pastor-Rei ba dala uluk. David wainhira nia sei joven hili nia sai bibi atan no eventualmente sai liurai Israel nian. Wainhira ita le’e salmo sira David nian frequetemente bele recunhese bibi tan ida nia fuan liu fali liurai ida nia ukun.

Caracteristica husi bibi atan diak ida mak nia ema diak, hatene proteje, guia, nutre no fo nia an ba ema seluk bele moris.

É ainda mais ho ita nia Bom Pastor. Pesquisa iha escritura sira, estuda Jesus nia moris, no rona Jesus nia liafuan sira. Ita sei hare momos katak Cristu, liurai boot ida mai servi hanesan Bibi Atan Diak ida.  

            Iha festa ohin loron nian atu fo hanoin mai ita katak hanesan liurai ida, Jesus mai servi no ukun ho domin. Tan ne’e, hanesan ninia bibi sira precisa aprende husi Bibi Atan Diak oinsa atu hadomi.

Manera ida atu hadomi mak Nia hanorin mai ita hotu katak: “Hau hamlaha, imi fó han Ha‟u; Ha‟u hamrook, imi fó hemu Ha‟u; Ha‟u la‟o rai, imi simu Ha‟u; Ha‟u isin tanan, imi fó hatais Ha‟u; Ha‟u moras, imi ba haree Ha‟u; Ha‟u iha dadur laran, imi ba haree Ha‟u. (Mt. 25: 35-36).

Portanto, iha loron ikus Nia sei mai fali no sei husu ba ita ida-idak: Ita hadomi to’o iha ne’ebé?

Reflesaun Husi: Irmã Maria de Fatima Pui, OP

 

 

Kontinua Le'e

Sai ema badinas, creativo, no responsavel iha moris

 

DOMINGO BA DALA TOLUNULU RESIN TOLU TEMPU BAIBAIN

1a. Leitura: Pro. 31:10-13,19-20,30-31

2a. Leitura: 1 Tes. : 5:1-6

Evangelho: Mt. 25:14-30

 

Iha istoria Liafuan diak husi Evangelista Saun Mateus fo hanoin mai ita kona ita nia responsabilidade ba talento ne’ebé ita simu Husi Nai. Aiknanoik osan talena sira nian comesa ho istoria katak iha ema ida molok atu la’o rai bolu nia atan sira hodi husik nia rikusoi ba sira (Mt. 25:14). Nia fo ba sira rikusoi ho montante ne’ebé la hanesan.

Ita nudar atan ne’ebé serbisu ba Na’I nia to’os nia fo ba ita rikusoin tuir ida-idak nia bele maibe depende ona ita atu halo saida los ho rikusoi ne’ebé ita simu.

Atan nain rua tan sira iha responsabilidade, badinas, no creativo nune’e sira bele multipla rikusoin sira simu. Atan ida tanba deit nia baruk  no tauk, nia la manan buat ida. Maibe  tansa tauk? No tauk manan saida?Pe. Timothy Radcliffe, OP fo hanoin mai ita katak: O unico tauk mak ita tenki tauk mak tauk ne’e rasik. Tan sei ita tauk ita labele halo buat ida no labele hetan sucesso iha moris.

Ita hotu iha tauk maibe ita hotu Maromak cria ho missaun ida no fo talent hotu mai ita. Ita koko esforso an atu iha coragem hodi hasoru moris ne’e ho brani nune’e it abele halo buat diak ruma ba ita nia mundo liu-liu cria mundo sai diak liu tan. Atu ema hotu bele hetan mundo ne;e hanesan uma ida be ema hotu.

Ita nia mundo precisa ema brani no badinas atu serbisu para hadia ita nia familia, ita nia igreja, sociadade, no mundo ne’e rasik. La’os tur tur osan mosu rasik iha uma laran hanesan istoria ne’ebe espalha iha media. Osan la mosu deit. Ita tenki serbisu maka’as, iha disciplina, la soe ita nia tempu, no badinas atu hala’o serbisu.

Iha bispo Dominicano ida Mons. Ramon Zubiate, fundador congregasaun Missionárias Dominicanas do Rosario, serbisu maka’as, la hatene kole,  fo an to’o mate atu servi no foti sa’e dignidade ema nativo Amazonia Peru liu tinan atu ida liu ba.

Nia simu talento husi Nai Maromak hatene agradese, multiplika ninia talento sira ikus mai fahe ba maluk sira seluk no sira mos bele hetan moris digno no sira nia moris sai diak liu tan liu husi edukasaun no formasaun humana no sarani nian.

Ita husu ba ita ida-idak nia an: Hau’ halo saida ho rikusoi no talento ne’ebé hau simu husi Na’i?

Istoria Evangelho nian ohin loron offresse mai ita lisaun klean nebe desafia ita atu moris criativa, hatene fahe, hatene fo an, iha coragem, laran luak, no ativa. Chamada ida mai ita atu recunhese no dezenvolve ita nia talento sira, foti iniciativa,ser responsavel, conquista ita nia tauk sira, fahe ho laran luak, maintain perspectiva comunitaria. Sei ita hakuak lisaun sira ne’e, ita bele haka’as an atu alinha ita nia moris besik liu tan ho Jesus Cristu ninia hanorin sira no contribui ba Maromak Nia reina iha ne’e no agora.

Reflesaun husi: Irmã Maria de Fatima Pui, OP

 

 

Kontinua Le'e

BAINHIRA LOS NIA SEI TO’O MAI?

 

 

DOMINGO BA DALA TOLUNULU RESIN RUA TEMPU BAIBAIN

1a. Leitura: Sab. 6:12-16

2a. Leitura:1 Tes. 4:13-18

Evangelho: Mt. 25:1-13

 

 

Iha momentu hau reflete kona ba aiknanoik husi evangelista Saun Mateus  kona ba feto ran nain sanulu  iha nain lima matenek no nain lima seluk beik ne’ebé hein hela noivo atu to’o mai , Hau hanoin kona ba kananuk ida baibian ita rona: “ Hau sura loron, sura tinan hodi hein o, wainhira loron to’o. O fila mai hamutuk ho hau…” Kestaun atu hein ema importante ou ema ne’ebé ita hadomi ne’e laos atu sura deit loron ho tinan bainhira loron to’o maibe ita halo saida los enquanto ita hein ema ne’e?

Iha Aiknanoik loron ohin nian fo hanoin mai ita atu matan moris nafatin basá ita la hatene bainhira los mak Na’I sei to’o mai.  Sei ita hare ba aiknanoik ida ne’e, ita mos bele husu tamba sa mak sira nain lima matenek labele fahe ba sira nia feto maluk nain lima seluk?

Jesus fo hanoin nia discipulo sira no ba ita hotu kona ita nia responsabilidade moris sarani nian atu prepara an lor-loron nune’e wainhira Noivo to’o sira pronto ona atu hasoru Nia. Nia convida ita atu sai ema matenek espiritualmente no iha disposição interior atu simu noivo mak sei mai. Matan moris significa iha roman fiar nian, ne’ebé lakan nafatin ho mina domin nian, haktuir Papa Francisco.

Nune’e maluk doben sira, Ita husu ita ida-idak nia an se ita sura deit loron ka fulan ka tinan maibe ita prepara an didiak ka lae atu hasoru Noivo sei mai? No Oinsa ita prepara an ba sorumuto ida ne’e?

Mai ita banati tuir feto ran matenek sira atu Na’I to’o, sei la dehan mai ita ‘Haʼu hatete loloos ba imi katak haʼu la koñese imi.’ “Tan neʼe, matan-moris nafatin bá, tanba imi la hatene loron no oras.

Ikus mai iha knananuk ne’e dehan katak: “ biar ba sei kleur karik, hau hein nafatin o, naran katak keta iha liafuan fahe malu”.

Tan ne’e maluk doben sira, enquanato ita hein Jesus atu mai, matan moris no koko  nafatin atu la haketak an husi Nia. Ho Jesus no iha Jesus ita ita sei hetan ksolok, paz no domin.

Reflesaun Husi: Irmã Maria de Fatima Pui, OP

 

Kontinua Le'e

HUMILDADE: ATU HARE'E ITA NIA A

 

 

                       DOMINGO BA DALA TOLUNULU RESIN IDA TEMPU BAIBAIN NIAN.

 

                                        1ª Leitura: Mal. 1:14b -2:2b, 8-10

                                        2ª Leitura: 1Tes. 2:7b-9,13

                                        Evangelho: Mt. 23:1-12

 

            Humildade maka virtude ida ne’ebé loke dalan ba ita atu hatudu hahalok ne’ebé real ou lolos, hodi rekoñese ita ida-idak nia an katak sé mak ha’u. Hahalok haraik-an la dehan katak ita fó kastigu ba ita nia an tamba ita hatudu haraik-an, maibé ita hatene ita nia an no simu ita nia an hanesan ita. Ita hare ita nia an hanesan Maromak hare’e ita. No husu ba ita nia an saida maka hau halo atu fo ksolok ba hau nia an, nune’e bele fahe ksolok ne’ebé hau iha ho hau nia maluk sira.

            Aleinde ne’e, humildade mos atu sai hanesan mos kontradisaun tamba ho hahalok egoízmu no pozisaun mundu nian: Ita hakarak hanoin katak dalan atu sai boot mak atu fó-hatene ema hotu kona-ba buat hotu ne'ebé ita halo. Ita hakarak fo atensaun ba ema seluk atu gaba ita ba saida mak ita halo, ita hakarak ema hotu tenki rona no halo tuir ita. Ho intensaun sira nee maka hodi halakon hahalok haraik-an nian.

            Maluk doben sira, ita hare iha Evanjellu ohin loron fó sai ezemplu kona-ba ema Farizeu no Eskritura sira ne'ebé la halo tuir buat ne'ebé sira haklaken. Farizeu sira hakarak simu respeitu iha fatin hotu. Hakarak ema hotu hatene tuir ba pozisaun no titulo nebe sira iha. Ho hahalok sira nee, Jesus hanorin ita kona ba oinsa moris tuir liafuan ne’ebé ita haklaken  no hatudu asaun haraik-an hodi servi ba ita nia maluk sira. Jesus fó lisaun furak ida ne'ebé susar tebes atu moris tuir. Lisaun nee fo hanoin mai ita atu iha korrespondénsia entre liafuan ne'ebé ita ko'alia no buat ne'ebé ita halo. Dala ruma fasil atu fó-hatene ba ema seluk saida mak sira tenke halo, maibé ita la halo tuir ita-nia matadalan rasik. Tamba ne’e, Jesus fo hanoin mai ita atu hatudu  asaun ne’ebe real mak xave importante tebes atu moris kontente. Nia hakarak ita atu hetan aten-barani! Nia hakarak ita-nia naroman kona-ba buat di'ak atu nabilan ba ema hotu atu haree no fo naroman ne’ebé hanesan ba ema sira ne’ebé sei iha nakukun laran. Jesus hakarak atu halo ida-ne'e ho lia-loos.

            Atu moris tuir humilidade  ne’ebé lolos, mai ita husu bensaun no grasa husi Maromak haraik mai ita espiritu aten-barani no fiar ne’ebé metin atu halo tuir ezemplu Jesus Kristu nian ne’ebé moris tuir buat ne’ebé nia haklaken. Haraik mai ita fuan nebe sensitive atu rona ba ema seluk nia halerik hodi hakbesik ba tulun sira.  

 

Reflesaun Husi: Irmã Zelina Mendonça,OP

 

 

 

Kontinua Le'e