BAINHIRA LOS NIA SEI TO’O MAI?

 

 

DOMINGO BA DALA TOLUNULU RESIN RUA TEMPU BAIBAIN

1a. Leitura: Sab. 6:12-16

2a. Leitura:1 Tes. 4:13-18

Evangelho: Mt. 25:1-13

 

 

Iha momentu hau reflete kona ba aiknanoik husi evangelista Saun Mateus  kona ba feto ran nain sanulu  iha nain lima matenek no nain lima seluk beik ne’ebé hein hela noivo atu to’o mai , Hau hanoin kona ba kananuk ida baibian ita rona: “ Hau sura loron, sura tinan hodi hein o, wainhira loron to’o. O fila mai hamutuk ho hau…” Kestaun atu hein ema importante ou ema ne’ebé ita hadomi ne’e laos atu sura deit loron ho tinan bainhira loron to’o maibe ita halo saida los enquanto ita hein ema ne’e?

Iha Aiknanoik loron ohin nian fo hanoin mai ita atu matan moris nafatin basá ita la hatene bainhira los mak Na’I sei to’o mai.  Sei ita hare ba aiknanoik ida ne’e, ita mos bele husu tamba sa mak sira nain lima matenek labele fahe ba sira nia feto maluk nain lima seluk?

Jesus fo hanoin nia discipulo sira no ba ita hotu kona ita nia responsabilidade moris sarani nian atu prepara an lor-loron nune’e wainhira Noivo to’o sira pronto ona atu hasoru Nia. Nia convida ita atu sai ema matenek espiritualmente no iha disposição interior atu simu noivo mak sei mai. Matan moris significa iha roman fiar nian, ne’ebé lakan nafatin ho mina domin nian, haktuir Papa Francisco.

Nune’e maluk doben sira, Ita husu ita ida-idak nia an se ita sura deit loron ka fulan ka tinan maibe ita prepara an didiak ka lae atu hasoru Noivo sei mai? No Oinsa ita prepara an ba sorumuto ida ne’e?

Mai ita banati tuir feto ran matenek sira atu Na’I to’o, sei la dehan mai ita ‘Haʼu hatete loloos ba imi katak haʼu la koñese imi.’ “Tan neʼe, matan-moris nafatin bá, tanba imi la hatene loron no oras.

Ikus mai iha knananuk ne’e dehan katak: “ biar ba sei kleur karik, hau hein nafatin o, naran katak keta iha liafuan fahe malu”.

Tan ne’e maluk doben sira, enquanato ita hein Jesus atu mai, matan moris no koko  nafatin atu la haketak an husi Nia. Ho Jesus no iha Jesus ita ita sei hetan ksolok, paz no domin.

Reflesaun Husi: Irmã Maria de Fatima Pui, OP