Fo tempu atu prepara an

 

Domingo Daruak Adventu nian

1a. Leitura:Isa. 40: 1-5,9-11

2a. Leitura: 2Ped. 3:8-14

Evangelho Marcus: 1:1-8

 

Iha ita nia moris dala barak ita “sibuk” ho ita nia moris ho actividade oi-oin. Liu-liu besik ona tempu natal. Familia sira comesa ona halo plano oinsa atu celebra festa natal hamutuk.

Iha escritura sira ba Segundo Domingo tempu adevento nian ajuda ita atu focus fila fali kona ba sentido no finalidade husi tempu ida ne’e no oinsa atu enriqueça ita nia moris. Saun Marcus cita liafuan profeta Isaias nian husi primeira leitura, ““Ha‟u haruka Ha‟u nia anju la‟o iha Ó nia oin, atu hadia dalan ba Ó. 3Lia ida ne‟ebé hakilar iha rai fuik maran, „Hadia dalan ba Na‟i, halos dalan ki‟ik sira ba Nia.‟

Saun João rasik hatudu ejemplo oinsa atu prepara an.  Nia uza nia tempu ho silencio iha rai fuik maran atu halo dicernimento ba saida mak Maromak hakarak ba nia atu  halo.

Nunee mai ita ida -idak mos bele halo hanesan, liu husi pasa ita nia tempu iha silencio iha fatin mak ajuda ita reflete kona ba ita nia moris no bele husik ita nia Nai Jesus atu tama iha ita ida- idak nia fuan.

Husu ita nia an ho perguntas sira tuir mai ne’e:

·         Obtaculo saida hau precisa hasai husi hau nia moris atu simu Jesus?

·         Oinsa hau prepara dalan ida atu Na’I bele serbisu iha ema seluk nia moris liu husi hau?

·         Hau pronto atu sai mensajero da paz iha hau nia familia, ba belun sira ne’ebé lakon nia fiar iha igreja, no iha mundo ida nakonu ho violencia oi-oin?

 

Atu nune’e  imi nia orasaun no reflesaun bele iha fuan no lori imi prepara dalan ba imi no ba ema seluk atu hasoru Cristo iha tempu natal.

 

Reflesaun Husi: Irmã Goretti Almeida, OP