Domingo 31 Tempu Comun
1a. Leitura: Deu. 6:2-6
2a. Leitura: Heb. 7:23-28
Evangelho: Mc 12:28b–34.
Evangelho ohin ita rona Jesus hanorin mai ita kona “hadomi maromak ho fuan no laran tomak no hadomi ita nia maluk sira hanesan ita an rasik.” Ita nia domin ba malu mak indikador ida kona ba fatin ne’ebé Maromak kaer iha ita nia fuan. Nune’e, wainhira ita hadomi no serbi ita nia maluk sira, tamba domin ba Maromak, Maromak sei fo premiu barak liu tan ba ita.
Definisaun lolos kona ba domin mak sakrisiu ba ema seluk nia diak. Ita nia domin ba ema seluk mai husi ita nia domin ba Maromak, atu hadomi maromak mak HADOMI BUAT NE’EBÉ NIA HADOMI.
Hau hakarak konvida ita hotu atu observa ema Santu/a sira ne’ebé ajuda lori koñesimentu no komprensaun ba ita-nia viajen jornada nian. Iha grau oioin, ema santu/a sira haka'as-an atu iha uniaun espirituál ho Maromak. Hakarak uniaun espirituál ida-ne'e kesi metin ita-nia integridade ida ne’ebé la haketak ita hosi HANOIN, ISIN no KLAMAR.
Orasaun no domin ne’ebé rohan laek sei la hadook ita hosi Maromak nia reinu. Sempre iha esperansa ba moris-hi'as ba klamar sira ne'ebé namlaek ho Maromak nia domin no ita-nia tulun. Mai ita reza ema hotu aprende oinsa partisipa ho Maromak hodi hadomi nia maluk sira . Amen.
Reflesaun Husi: Irmã Cacilda de Fátima, OP
0 comments:
Post a Comment