FO HO LARAN LA’OS FO ATU BUKA NARAN NO HETAN HAHI

                                                 

                                                DOMINGO XXXII TEMPO COMUM

1a. Leitura:  1 Rs. 17: 10-16

2a. Leitura:  Heb. 9: 24-28

Evangelho:  Mc. 12:38-44

      Leitura sira loron ohin nian hanorin no hato’o mai ita oinsa atu servi ema seluk iha ita nia knar sira hotu no la’os atu aproveita ema seluk iha profissão ne’ebé confia. Nune’e mak Jesus fo hanoin ba ema ki’ik no kiak sira atu matan moris no neon na’in ho escriba, saduceu no fariceu sira basa “sira kaan hatudu sira nia hatais naruk-naruk, kaan simu ema nia cumprimenta iha luron, buka fatin diak iha uma kreda, buka fatin furak iha festa, halo oração mesak naruk-naruk, to’o han mohu feto faluk sira nia sasan” ema sira be halo nune’e mak “loron ida sei hatan lia justiça todan liu” iha Maromak futar oin.

    Liafuan hirak ne’e Jesus hakarak hato’o ba ukun na’in igreja no nação nian ne’ebé mak ukun povo no ukun sarani. Significa ukun povo ba moris diak no hakmatek no ukun sarani sira ba moris santo no haksolok. Ida ne’e mak ukun na’in sira nia obrigação atu halo iha sira nia knar. ita hotu sei hatan lia justiça iha Maromak futar oin. Pergunta ba ita, Tanba saida mak Jesus temi feto faluk sai nudar alvo ba ukun na’in sira nia ukun? Feto fatuk iha tempo ohin loron hatudu ba ema sira nebe la iha tan forsa no kbiit,satan diak ba sira la iha, tan kiak no mukit hafalun hela sira iha ukun na’in sira nia ukun liu husi lei no ukun fuan. Ita hare ema ne’ebé sasan iha ita hakbesik no ema ne’bé sasan la iha ita cuek habis no la’o laliga rai. Ne’e acontece iha moris mundo ne’e nian no liliu iha ita nia rain. Hanesan knananuk furak Almerindo nian nebe hananu: “osan sei manan justiça mundo hodi osan ema sala sei ba los, maibe ba fatin seluk justiça sei la ho osan”. Ita la bele atu nega maibe ita tenke afirma ida ne’e.

    Iha primeira leitura hato’o mai ita kona ba feto faluk iha Sarepta ho nia oan. Hein atu mate de’it ona. ukun na’in sira la sibuk no preocupa maibe Maromak fihir, tau matan no bali nafatin hodi haruka nia atan Elias ba hakonu sira nia sanan no sira ninia mina: nune’e “TRIGO UT IHA SANAN LARAN SEI LA HOTU, MINA REINU IHA IHA BOTIR SEI LA MAMUK”.

     Milagre ne’e mosu tanba saida? Tanba feto faluk nia fidelidade, reconhecimento ba nia sofrimento no nia prontidão atu halo tuir saida mak profeta haruka. Ita hirak ne’e mak mosu rai hamlaha ema ida mosu mai husu nune’e karik pasti ita sei la fo. Iha laran ita sei dehan fo tiha ba o han ami han fali saida? Maibe feto faluk ida ohin sai exemplo ba ema hotu nebe sente an mukit no kiak iha mundo ne’e atu loke liman hodi fo fahe ba ema seluk nune’e wainhira o husu ba Maromak nia sei hakonu nafatin o liman. Iha Evangelho: Jesus hanorin nia escolante atu fo ho laran la’os fo atu buka naran no hetan hahi. Husi Jesus nia observão, nia nota ema riku no kiak sira nia sacrificio no buat karan. Hodi dehan: “ema riku barak mak tau osan mesak boot-boot deit. Feto faluk kiak ida to’o mai nia tau doit metan oak rua, katak osan cruzado ida”.

    Husi oferece no esmola ne’e Jesus la hare ba fo barak ka witoan husi quantidade ne’ebé hato’o no hasa’e maibe Jesus hare qualidade fiar husi buat naton ne’ebé kiak ne’e fo ba Maromak. La’os tanba nia kiak mak nia fo nune’e maibe tan husi buat hotu ne’ebé nia iha nia hasa’e hotu ba Maromak sem rezerva no ho neon no laran tomak. Ba ema balun fo buat ne’ebé naresin husi nia riku soin nebe sira iha ba Maromak. Nune’e nia la fo ho fuan maibe nia fo ho hanoin atu ema gaba nia husi buat hotu ne’ebé nia fo no hasa’e. hahalok nune’e ema barak halo iha nia moris.  Amen.

 

Reflesaun Husi: Irmã Gragiela do Nascimento, OP