Domingo Dahaat Tempu Pascoa
1a. Leitura: Acts 13:14, 43-52
2a. Leitura: Reve.7:9,14b-17
Evangelho: Jo.10:27-30
Domingo dahaat tempu pascoa sai hanesan Domingo Bibi Atan Diak.
Bibi atan ida nia serbisu kiik liu iha sociedade maibe nia dedika an tomak no sakrifika an atu tau matan ba bibi sira.
Ohin ita rona iha Liafuan Diak, ita Nai Jesus Kristo dehan “Hau nia bibi sira rona hau nia lian, Hau hatane sira no sira tuir Hau.” Kristu mak ita nia bibi atan no ita mak nia bibi sira. Nu’udar bibi hatene no konhese no rona ba nia Nain. Nain atu ba ne’ebé sira tuir.
Kristu hatudu mai ita nia domin no tau matan ba ita ida idak. Nia la abandona ita ka husik ita mesak. Bibi balun lakon, lao sala dalan nia buka tuir no lori mai tau hamutuk iha fatin ida ka luhan ida.
Nu’udar sarani ita hotu bolu atu lori malu ba dalan los hanesan Kristu ne’ebé sai nudar ita nia Bibi Atan Diak no lori ita atu moris tuir lialos no atu servi ita nia maun alin sira ho domin. Nunee, ema seluk mos bele hare Kristu nia prezensa liu husi ita.
Konvida ita hotu nudar sarani ka Igreza atu banati tuir nafatin ita nia Salvador ka ita nia Bibi atan nia ezemplu diak sira. Liu liu atu fo testemunha ba ema kona ba Kristu. Bibi Atan Diak hatene rona, fo an, cuidado, no buka tuir nia bibi sira ne’ebé halai lakon.
Atu moris tuir ejemplo Bibi Atan Diak nian ne la’os facil no ita sei enfrenta dificuldade oioin maibe Kristu sempre iha neba hamutuk ho ita. Nia la husik ita mesak. Tamba domin nia servi, fo nia an tomak ba ita too terus no mate iha krus, no liu loron tolu nia moris hias fali.
Domin Maromak nian ne’ebé fo mai ita boot tebes liu husi ita Nain Jesus Cristu. Ba ita idadak mak kontinua nafatin atu fahe domin ne’ebé ita simu husi Nai. Ita nia colaborasaun mak atu servi ho fuan no domin liu husi buat kiik ka boot ba familia, comunidade, no sociedade. Importante mak halo buat hotu ho domin. Servi ho domin.
Ksolok Domingu nian ba ita hotu.
Reflesaun Husi: Irmã Camelia de Clito, OP
0 comments:
Post a Comment