IDA NEBEÉ KANEK LORI PAZ MAI

SEGUNDU DOMINGO DA PASCOA

 

Primeira Leitura: Apos. 4:32-35

Segunda Leitura: 1 Jo. 5:1-6

Evanjelho  João:  20:19-31

 

     Ohin ita tama ba Segundu Domingo da Páscoa.  Jesus hatudu ninia an ba eskolante sira hodi husik atu ema hare hodi fo sasin fiar nian katak Nia iha, reafirma fali ita nia duvidas no halakon tauk basá Nia dehan: “Hau moris hias fali ona; reprezenta husi finalidade Jesus Jesus Kristu nia mate no moris hias.  Katak Liu tiha Ninia moris Hias durante loron walu nia laran Jesus hatudu Ninia An ho forma oin oin ho situasaun nebe la hanesan. 

        Ohin iha pontus rua nebe mak Jesus hatoó mai ita, ba dala uluk kona ba ‘’Dame no daruak kona ba Fiar”; Iha evanjelhu saun João nian haktuir mai ita katak uma nebé eskolante sira hela taka metin tan sira tauk Judeu sira, Jesus mosu mai hamriik iha sira leet hodi dehan” dame hela ho imi(Joao 20:19).

    Dame ka Paz iha terminolijia biblia katak buat hotu lao diak, kapas, harmonia iha uma laran no iha sorin – sorin harmonia ho ita an no natureza, paz ida nebe lori konhesimentu natón no kompriensaun klean atu tau ita an forte ho práktika paz nudar esperensia ida konhese ita an hodi hasoru difikuldades.

   Difikuldades nebé timoroan hasoru ohin loron mak pandémia C-19 no dezastre naturais; buat rua nee mak hafalun hela ita an hodi sente tauk hanesan eskolante sira. Maibe nu’udar ema sarani nebe tuir Kristu no sarani nebe fiar metin iha devosaun boot ita halakon tauk ida neé basá ita konsiente nafatin katak Hau nia Maromak boot liu no hau bele hakat liu hau nia sentiment tauk ida neé basá hau nia Maromak la hela deit iha terus no mate maibe “vitória’’ no ho moris hias mak abut ba fiar no salvasaun, ita nia fiar ba Kristu la hotu ho fiar deit maibe buka atu moris tuir, buat hotu nebe ita rona no aprende, katak ita aprende husi dezastre nee hodi hafanun fali ita atu hadame malu ho ita nia ambiente katak tau matan ba ambiente no respeita mos nia.

    Paz la’os realidade nebe taka metin mas sempre book ita nia an atu sente buat hotu basá neé fo aten brani hodi foka hasoru disturbasaun, Jesus ho ninia manan hasoru sala no mate fo dame ba eskolante sira nebe taka an no hanoin an deit tan neé Jesus mosu ba sira nebe taka metin no hanoin ba an deit nuneé derepente rona lian nebe’e mosu no tauk nebe sira iha lakon tiha; Jesus lia tun “dame hela ho imi’’ {Jn. 14:27}: dame Hau fo ba imi Hau nia dame Hau fo ba imi; laos hanean mundo fo mak Hau fo ba imi; Keta laran susar, ba keta tauk.

    Ema hotu konsiente katak dame neé precisa tebes maibe ita nia saudades ba dame no realidade la hanesan tamba ita an rasik presisa kontribui ba dame ida nee hanesan bain bain iha Eucaristia missa laran ita hotu fo sinal ho oin midar hamnasa no hateke matan ho matan atu hadame malu ho Kristu nia paz no buka malu atu dame; ita fo paz tebes duni ba maun alin? Hanoin klean tan; Nia mak ita nia dame (Ef. 2:14)

    Tuir mai FIAR. Fiar mak garante divina nian iha revelasaun basá Maromak ho Nia autoridade revela mai ta(dogma fiar nian). Jesus ninia hatudu an ba Tomas importante tebes laos ba Tomas deit maibe mos ba ita hirak nebe tuir Kristu. Basá ho esperensia Tomas nian nebe mak nia rasik deklara sai iha evanjelhu Saun Joao 20:25 sai mos ita nia esperensia, ita susar atu fiar lalais, dúvidas no lahatene ida nebe mak los wainhira ita halo orasaun mak la sai realidade tuir ita hakarak, esperensia lakon oportunidade no la

     Susesu esperensia lakon familia ita dehan Nai iha nebe? Maromak mai lalais tulun ami ba! Wainhira ita buka namanas buat los iha ita an no ita nafatin buka to’o iha nebe deit no husu nafatin kona ba ita nia fiar buka nafatin kona ba fiar neé mak dalan atu haklean liu tan fiar no husu Nai haboot hau nia fiar. Ita nia duvidas no la fiar hanesan Tomas nuneé ho Tomas nia esperensia nebe nia hetan ita mos hetan resposta iha duvidas nia laran katak Maromak moris iha neé sempre mosu no prezente iha Espiritu Santu nebe haraik mai ita. Jesus reafirma tan: o keta dehan tan hau la fiar maibe FIAR BA basá bele deit ba sira nebe fiar no tau laran metin iha Nia.

Mai Ita harohan: Nai hau fiar haboot hau nia fiar.  Nai hau Fiar!

 

Hakerek Husi: Irma Lucia do Carmo, OP

 

Kontinua Le'e

KRISTU MORIS HIAS ONA

 

                        

                   DOMINGO DE PÁSCOA DA RESSUREIÇÃO DE JESUS

Primeira Leitura: Apos, 10:34a,37-43

Segunda Leitura: Kol. 3:1-4 

Evanjelho:Jo. 20:1-9   

                                           

    Moris Hias husi Mate mak dalan salvasaun nian ne’ebe Maromak plano ona ba nia oan mane Jesus Kristu, tan humanidade nia sala. Kristu nia Mate la’os tamba Nia halo Krime bo’ot maibe  tamba Nia “Hadomi” no iha obidencia, fidelidade ba Nia Aman Maromak Nia projeito ka plano ba mundo nia sala sira ne’ebe nakonu ho Egoismo, arogante, no sala sira seluk nebe ita nudar ema halo. Sim klaramente katak ita labele julga ema ida ba ema ida nia sala maibe nudar ema presiza mos uja ita nia konsensia humana nian hodi labele monu tan ba sala.

     Maromak  iha nia plano nebe bo’ot tebes ba ita ema tamba Maromak Hadomi ita nia lakoi hare mundo terus ho hahalok a’at sira tan ne’e nia haruka nia oan mane mai hodi salva ita.  Kristu nia mate halo ita ida-idak atu husu ba ita nian’an rasik katak Hau ne’e se los mak Kristu mate tamba hau? Hau pronto atu muda hau nia’an iha Kristu nia moris hias?koko ba no reflete ba pregunta hirak ne’e, maske simples maibe fo valor ba ita nia a’an.  Moris hias ida ne’e  signifika katak atu trasforma ita nia  atitude sira ne’ebe falta no dala ruma lafo valor bai ta nia moris tamba ne’e koko neneik maibe bebeik hodi halo diak iha Ressureisaun tempo paskoa ida ne’e.

    Ressureisaun oferece mai ita ida-idak naroman moris foun ida ba ita atu bele komprende didiak oinsa Cristu nia Mate. Tempo ne’ebe hanesan, atu halo ka lori komunidade sira bele transforma a’an ba atitude ida ne’ebe diak no fo esperansa ba malu katak buat diak sei mai se bainhira ita iha unidade ho fuan no hanoin tomak. Tan ne’e paskoa hamoris no fo moris foun ba ita hotu tuir dalan los no moris tuir Maromak nia hakarak.

   Iha primeira leitura husi apostulo sira nia hahalok 10:34-43 fo hanoin mai ita idak-idak  oinsa atu “ Pedro hamri’ik hodi koalia nune’e: liu tia João Baptista nia Baptismo imi hatene ona sá lós mak mosu iha rai Judeia tomak, hahu husi Galiliea”. Ida ne’e sinal nebe forte tebes ba humanidade atu hatene defende lia los tuir Kristu nia hanorin. Maromak haraik kbi’it ba Jesus hodi lao lemo rai no hodi halo diak no fo matenek bam undo tomak, fog rasa isin diak ba ema tomak. Tamba ne’e nafatin fiel iha Jesus ne’ebe foin moris hias hodi salva ita.

   Iha segunda leitura husi saun Paulo nia surat ba sarani sira iha Colose 3:1-4 mos nafatin fo hanoin mai ita katak; ita moris hias ona ho Cristo, tan ne’e ita sei tau matan ba sasan Lalehan nian, tamba Jesus Kristu moris hias ona tur iha Aman Maromak nia sorin kuana. Nafatin kristu konvida ita idak-idak atu laran monu (fall in love) deit ba buat nebe diak hodi valoriza  sasan lalehan nian, maibe keta fo valor liu ba sasan mundo rai klaran nian.

  Evangelho husi evangelista saun João 20:1-9 koalia mai ita kona ba  dadersan deit rai sei nakukun hela feto ida nebe aten brani ho naran Maria Madadlena ba to’o Nai nia rate no nia hare fatuk bot iha rate nia oin duir hela. Ida ne’e hatudu katak, nudar ema fiar nain ida la’os atu fiar le’et deit maibe mos fiar ho Espiritu hodi aten brani bele defende ba ita nia fiar nudar ema Kristaun lolos.

 

                              FELIZ  PÁSCOA DA RESSUREIÇÃO DE JESUS BA HOT-HOTU!

   

Reflesaun Husi: Irmã Saturnina Goveia, OP

Kontinua Le'e

HA'U NIA MAROMAK, HA'U NIA MAROMAK, TAN SÀ HEWAI HA'U?

 

DOMINGO RAMOS NA'I NIA PAIXÃO.

1a. Leitura Is. 50,4-7

2a. Leitura Flp. 2, 6-11

   Evangelho  Jo. 14,1-15

   Ohin ita tama ba Domingo Ramos Na'i nia paixão tan ne'e hosi Leitura no Evangelho ohin  ne'e  nian hafahe tiha iha oin rua, primeiru  Koalia mai ita kona ba manan kmanek no gloria, segundo koalia mai ita kona ba terus no mate. Jesus nia futar iilas, iha Nia iilas nu'udar Liurai Maksoyn, no mos "Na'i nia atan." Tebs duni, tama ho ksolok kmanek  wa'in tebes mai iha Jerusalem lori ba paixaõ Maksoyn  nian, maibe, housi hanoin seluk ida atu hatene lolos, sà mak paixaõ ne'e, ema sira nebe hatene tebes duni ona,moris Maksoyn Jesus Kristu nian, mak sei simu.

   Tan ne'e hahu housi ohin loron, ita hatene katak, Misterio pascoa nian, mak hamos sala nian no hadame malu ho Maromak,  Iha oin rua ida mak  terus , ida seluk mak gloria. Mate mak dalan mesak Misterio pascoa nian: Laos to'o ona rohan, maibe atu tama ba moris, dalan nebe "Na'i Nia atan " hodi liu ba atu to'o iha Jerusalem. Tebes duni, hetan ona nabilan roman boot moris  Hi'as nian.

    Hamutuk ho Jesus nebe oras ne'e terus  tan ba ita ema nia sala,  ha' u konvida mos  ita idak -idak atu  hare ba ita nia An ho preguntas rua ne'e hodi husu: Dala hira mak ha'u koko atu  sai traidor ba ha'u nia belun ida? No mos dala hira mk hau  sai ona ema  traidor ba ha'u nia belun nebe diak mai ha'u?

   Preguntas rua ne'e lori ita atu halo refleksaun badak ba ita nia journada moris nian  dala barak hahalok sira hanesan ne'e akontese iha ita nia moris, liu hosi ita nia  laran moras, foti An ho atetude  sira nebe hakarak atu ha'u nia An mak diak liu ema seluk, Gosta hatun malu  iha kompetensia balun  no  gosta  halo terus malu, lalaok sira ne'e  dala ruma ita la espera atu akontese maibe nia mosu iha ita, tan ba ita ema nudar humana la ses housi sala, saida mak  ema seluk nia hare mai ita nia An.katak ita ema la perfeito iha Maromak nia matan. maibe iha tempo atu tama ba semana santa ida ne'e Jesus fo nafatin mai ita corajem atu hadia buat nebe naksalak iha ita nia An .

      Hanesan saida mak Judas tau iha nia hanoin sai traidor  ba Jesus laiha ema ida mak hatene kona ba ida ne'e,  buat hotu fo sai iha loron ikus mak ita hatene katak ema nebe sai traidor ba Jesus ne mak Judas escariotes maibe saida mak akontese ba Judas no Jesus fo hanoin mos mai ita katak maske ita  iha relasaun ho kolega nebe diak maibe hahalok nudar traidor ne'e sempre mosu iha ita.

     Ho refleksaun simples ida ne'e, hein katak bele fo nafatin inspirasaun foun mai ita iha  semana santa ida  ne'e oinsa  ita iha coragem fiar metin  nafatin ba  Nia  hodi husu Nia tulun no perdaun  ajuda  ita  iha dalan ida ne'e  hodi hadia buat nebe falha hosi ita la presija atu hare ba ema seluk maibe presija mos hare ba ita nia An,  hodi sente nafatin Jesus ninia presenja hamutuk ho Nia iha Nia terus.

 

Reflesaun Husi:

Irmã Sabina Gonzaga, OP

 

 

 

Kontinua Le'e

ORAS TO'O ONA

 

DOMINGO V DA QUARESMA

1a. Leitura: Jer.31:31-34

2a. Leitura: Heb 5:7-9

Evanjelho: Jo. 12:20-33

 

FINI NEE MONU BA RAI NO MATE, NIA SEI FO FUAN BARAK

 

 

    Leitura sira Domingo ohin ne'e nian hosi profeta Jeremias fo hanoin mai ita "Imi buka hatene Na'i.", Saun Paulo nia surat ba Hebreu sira hanorin mos ita katak maski Oan, ho terus oin-oin, Nia hatene duni oin sa halo tuir deit Aman nia hakarak no Iha evangelho haktuir katak: Oras to'o ona atu Oan Mane simu nia Gloria. (Jo. 12:23)

    Belun sira, Jesus kristu fo sai mai ita katak Nia hatene no konsiente didiak kona ba Aman Maromak nia planu ba Nia atu soi no salva humanidade tomak. Nai Jesus hatene didiak sa ida mak Nia sei hasoru iha mundo ne'e. Ohin Nai Jesus afirma dala ida tan mai ita katak Nia tempo besik dau-daun ona atu ba to'o iha Aman, Nia tenke liu hosi terus, mate no moris hias.

     Jesus kristu hases an hosi kalis ne'e nudar ema ida dala ruma ita bele husu se Kristu konsiente didiak Aman Maromak nia planu , tan sa Nia hakarak husik Nia Ilas nudar Maromak no mai moris hanesan ema? Nia Maromak Oan no Maromak mos tan sa nia  tenke tuir Maromak? Maibe Kristu hatan katak lae, Nia hatan lae tamba Nia hatene dalan ne mak Nia tenke liu, no ida nee nia objectivo hodi mai iha mundo atu salva ita hotu. “Oras nee hau laran taridu, hau sei dehan sa los? Aman hasai tiha hau oras nee? Lae, tan nee duni mak hau ba to'o oras ne'e." (Jo.12:27 )

    Belun sira hanesan ema bai-bain ida, mate buat ida nebe halo ita laran taridu no tauk, sa tan wainhira ita seidauk prontu atu mate no husik ema hirak nebe ita hadomi. Situasaun nee mos akontese ba kristu, los duni katak mate halo ema tauk no laran triste, maibe ita tenke tau iha ita nia konsiensia katak buat hotu nebe Maromak tau no hafutar mundo ne'e la ses hosi mate no sei la ses inklui ita ema.

   Wainhira ita rona notisia ruma kona ba ema nebe besik ona atu mate, konserteza ita nia matan ben suli, no wainhira ita nia parente balu moras ou baixa iha hospital, Doutor dehan katak nia moris sei la naruk ita imazina ema nee ita nia laran moras no oin sa familia nia sentimentu? ba ita nebe hasoru situasaun hanesan nee, iha leten Jesus Kristu dehan mai ita atu la laran taridu no laran susar atu hasoru ita nia mate. " Tebes fini nebe la monu ba rai no la mate ,nia hela nafatin hanesan fini. Maibe karik fini nee monu ba rai no mate,nia sei fo fuan barak."

    Ho refleksaun simples ida nee hein katak bele fo nafatin inspirasaun mai ita iha tempo Quaresma nee.  Ita precisa aten brani atu moris no  simu ita nia mate, tamba liu deit hosi mate ita sei ba hetan moris nebe rohan laek hamutuk ho Kristu.

 

Reflesaun Husi: Irmã Zelia dos Reis, OP

 

Kontinua Le'e