JESUS NIA FAMILIA: RONA NO HALO TUIR MAROMAK NIA LIAFUAN.

 

DOMINGO BA DALA SANULU TEMPU BAIBAIN NIAN

Primeira Leitura: 3:9-11

Segunda Leitura: 2Cor 4: 13- 5:1

Evanjelho. Mk. 3:20-35

 

   Maun alin bin feton no sarani doben sira, iha passage evangélico ida nee hau fahe ba parte tolu: Primeira parte, oinsa mak ita hare Jesus nia Família sira preocupa ho Jesus eh buka Jesus. Segunda parte oinsa Jesus ho kbiit lalehan nian halakon kbiit mundo nian no terceiro parte: see mak bele sai Jesus nia Maun alin no Feton sira? Ka Família?

Uluk knanain ita sei hare hamutuk oinsa ita hare Jesus Nia maun alin sira preocupa ho Nia. Iha pontu ida hau hakarak dehan Jesus ho ninia misecordia rohan laek sempre acolha ema hotu nebe la kolen atu buka Nia, no, Nia sempre iha ba ema nebe hakarak atu hakbesik ba Nia. Maibe, tamba sei iha ema balu nebe la fiar, tamba Jesus nee husi geração Judaica, ikus mai barak mos hakarak atu lao dok husi Jesus. Maibe Jesus nafatin ho ninia misericordia hodi acolha nafatin ema hotu hodi fo nia ann completo iha Crus tutun. (Cfr. 1 Jo. 1:7) Ho Jesus nia ran hanesan Maromak oan mane, nia hamos ema hotu nia sala. No simu nafatin ema hotu nebe fila ba uma hodi han hamutuk iha Nai nia mesa.

Tuir mai, Jesus ho kbiit lalehan nian halakon kbi’it mundo nian. Jesus hanesan Salvador nebe Aman Maromak rasik mak haruka mai mundo hodi salva ema hotu husi sala, salva ema hotu husi mate sira leet.  Ho kbiit lalehan nian Jesus kura ema moras: matan a’at bele hare fali, tilun diuk bele rona fali, ain kudeik bele lao fali, isin maten bele bok ann fali, ema mate bele moris fali. No ho kbiit lalehan nian Nia halakon kbiit mundo nian, katak nia duni sai Espirito att husi fatin nebe deit. Iha tempo nebe Jesus duni sai Espirito a’at ka demonio, ema lubun boot hakilar dehan “kbiit Belzebu nian iha nia” no seluk tan hakilar dehan “husi ulun boot demonio sira nian nia duni sai demonio sira”.

  Ita hatene see mak Belzebu? Belzebu nee famous iha Antigo Testamento, ema sira husi Cananeu no Filiteus sira considera hanesan Maromak ida ba gentiu sira. Naran Belzebu nee sira forma husi liafuan rua Ball katak Senhor ou Nai no Zebul katak As ba ou fatin nebe a’as ba, maibe sira hanaran uma nebe a’as liu. Nune’e Belzebu nee katak “Nai husi fatin a’as sira”. Tanba Nia mos bele buat hotu nebe mundo halo nee maibe nia haluha tiha katak poder lalehan nian makas liu ninian. Maibe depois iha Fali Novo Testamento ema matenek nain sira, hahu descobre katak Belzebu nee derivada husi lingua grega katak Beelzboul. Katak ne’e servisu Satanas nian significa Demonio hahu husi nia (cfr. Mat. 12:24, 10:25, 9:34) principio dos demonios.

Então tanba nee mak wainhira Jesus duni sai Espirito a’at husi fatin ida mak ema dehan nia ho kbiit belzebu nian. maibe Jesus hahu dehan ho aiknanoik “oinsa satanas duni sai satanas” significa Jesus hakarak dehan so ema seluk deit mak bele funu hasoru nia inimigo sira. Tanba nee Jesus la’os husi Belzebu nian maibe nia contra belzebu hodi poder lalehan nian. Nune’e Jesus dehan liu tan ema se mak halo sala ba nia a’an husi liafuan a’at sira nia sei hetan perdão maibe ema nebe halo sala contra Espirito nia sei lahetan perdão.

Ikus mai,  Jesus dehan See mak hau nia Inan, see mak hau nia maun alin no feton sira? Maibe depois Jesus dehan ema rona Maromak no halo tuir NIA liafuan nee hau nia maluk no hau nia maun Alin sira. Ita hare husi questão nebe Jesus coloca nune’e ita hare liu kona ba Maria, Maria mak Feto ida nebe kmook rona maromak nia liafuan hodi entrega ann total ba Maromak hodi realiza plano salvação mai iha mundo. Nia maun alin sira mak ema nebe hatene haksolok no terus hamutuk ho Nia hanesan João nebe hamtuk ho Maria iha Calvario. Tanba nee ema nebe pertençe ba Jesus nia familia make ma hirak nebe Pronto atu terus, no ema nebe brani haklaken lia los no ema ne’ebe laran luak no domin Nain, basá Jesus mate iha Cruz tamba hadomi mundo.

RAI SEI TANE, LALEHAN SADIA. AMEN

Reflesaun Husi: Irmã Rosentina Ana de Deus, OP

 

 

Kontinua Le'e

IMI SEI BA FATIN HOTU-HOTU NO SARANI SIRA HODI AMAN, HODI OAN NO HODI ESPRITU SANTU SIRA NARAN

 

SOLENIDADE DA SANTISSIMA TRINDADE

 

Primeira Leitura: Deut. 4, 32-34. 39-40

Segunda leitura Rom. 8, 14-17

Evangelho Mat. 28, 16-20

 

Maluk sarani doben sira,

    Ohin ksolok bo'ot, loron kmanek, ita celebra Solenidade da Santissima Trindade. Na'i Maromak halo buat mesak diak ba ita ema. Ohin loron la'os atu ita agradese de'it ba grasa ne'ebe ita simu maibe ita mós presiza hahi hanai nafatin Maromak nia naran iha ita nia moris lor-loron.

   Tuir dourina kona ba Trindade ida ne'e mak fiar kristaun nian katak: Maromak Aman, Maromak Oan no Maromak Espritu Santu. Maske sira nain tolu ketak-ketak maibe sira Maromak ida deit. Ida-Idak ho nia sebisu.

    Aman nudar kriador, Oan nudar salvador no Espritu Santu atu hasantu ita nia moris. Maromak ita bele dehan katak nia mós hanesan familia ida. Maromak ida maibe sira nain tolu. Ida nemak ita dehan Misterio ita labele esplika ho ita nia matenek ita ema nian.

    Iha primeira leitura, Maromak nia futar liafuan fo hanoin mai ita liu husi livro Deuteronómio katak, Ó sei halo tuir nia ukun-fuan, ó sei moris tuir Nia hakaran ne'ebe ohin Ha'u sei fo hatene sai ba ó. Liu husi lifuan hirak ne'e, hori tempo uluk Maromak halo moruk ho ita ema maibe tan Maromak nia domin boot tebes mai ita hodi hakotu nia ita nudar povo moruk tuan nian ba rohan laek ho Jesus Kristu nia prezensa.

   Iha segunda leitura São Paulo nia lia haktuir kona ba Ema hotu ne'ebe la'o tuir Maromak nia roman, sira ne'e Maromak nia oan duni. Atu for hanoin mai ita katak ita nudar sarani presiza moris no halo tuir nia ukun fuan sira hodi nune'e ita mós bele moris iha roman laran.

  Nune'e mós iha Evangelho, Evangelista São Mateus haktuir mai ita katak, Ne'e duni, imi sei ba fatin hotu-hotu, atu hanourin reino-reino rai-klaran nian, no sarani sira hodi Aman, hodi  Oan no hodi Espritu Santu sira naran. Molok Jesus sae ba lalehan, Jesus fo ona instrusaun ba ninia apostulo sira atu ba fatin- fatin hodi haklaken konaba lia-fuan diak.

   Temi ho ita nia ibun fasil kona ba halao serbisu ruma hanesan mos Jesus ninia apostulo sira, sira mós sente laiha vontade atu hala’o sira nia misaun maibe Jesus sempre enkoraja nafatin sira atu ba rai-rai hodi halao sira nia kna’ar. Atu fo hanoin mai ita Ida-Idak katak ita ho ita nia kbi’it rasik labele maibe  ita presiza Maromak nia intervensaun ba ita nia knaar sira hotu.

 

By: Irmã Maria de Fatima Sequeira, OP

 

 

Kontinua Le'e

Palavras de Pessoas Extraordiarias

 

Kontinua Le'e

EMA IDA-IDAK SIMU ESPIRITU NIA KMANEK ATU HALO DIAK RUMA

 

SOLENIDADE DE PENTECOSTES

 

1a. Leitura: Apos. 2:1-11

2a. Leitura: 1Cor. 12:3b-7

Evanjelho: Jo. 20:19-23

 

     Iha loron Pentecostes   moris foun ida mosu na  povu Maromak nian tan Espiritu Santo  hi’it an mai, tama  ita ema nia laran, hanesan buat kmanek ida be nakfilak ema sira nebe simu ona baptismo no  nakonu ho Espiritu Santo  sai we matan moris no Maksoin nian.

    Ita nebe hola parte iha Nia meja Santo,  ita atu bele to’o iha Aman Maromak liu husi Cristo, Espiritu Ida Mesak, Nia Mak Espiritu Moris nian, eh we matan nebe Suli ba Moris Rohan laek; husi Ida nebe Aman Maromak halo Moris Ema hotu be mate tan sala, to’o  moris hias iha Cristo.

    Espiritu Santo  mosu hanesan " Ahi lakan " nebe hamanas sira nia fuan hodi haklaken Liafuan diak.  Lia fuan diak ida ne’e n sei muda ema nia moris no hamosu fraternidade iha fatin tomak, ema husi nasaun hot- hotu. Katak liu husi Espiritu Santo bele lori ita moris iha unidade hanesan maun/bin alin no  ema ida-idak simu Espiritu nia kmanek atu bela halo diak ruma.

   Jesus fo Espiritu Santo ba nia apostolu  sira atu ba  haklaken Maromak Nia Lia fuan diak ida ne’e.

   Ita hotu hanesan sarani iha mos missaun ida atu hala’o. Continua haklaken Liafuan diak Maromak nian ho Espiritu santo nia Kbiit nune’e Liafuan diak nebe ita haklaken  bele lori domin, dame, justisa, liberdade no fo koslok ba ema hotu.

 

Hakerek Husi: Irmã Maria Soares Babo, OP

 

 

Kontinua Le'e

ATEN BRANI BA HODI HAKLAKEN EVANJELHO

 

SOLENIDADE DA ASCENSĀO DO SENHOR

1a. Leitura: Atos. 1:1-11

2a. Leitura: Ef.1:17-23

Evanjelho: Mk. 16:15-20

 

Domingo ida ne'e, Igreja celebra Solenidade da Ascensão Nai nian. Jesus sa’e rasik ba lalehan.

Iha leituras sira Domingo Ascensão nian ne’e hato’o mai ita katak,depois de moris hias tiha hosi mate,Jesus durante loron hatnulu,hatudo an dala barak ba Apostolo sira nudár prova moris hias nian hodi fortifica Apostolo sira nia fiar, no depois de fo tiha ordem ba Apostolo sira hodi haklaken Jesus ba ema hotu,Jesus sa’e rasik ba lalehan.

Jesus depois de tinan tolu hatudo Aman Maromak iha nia an liu hosi doctrina no milagre sira, Nia terus, mate,no moris hias.   Apostolo sira depois de moris hamutuk ho Jesus,hare ho matan rasik, rona ho tilun rasik durante tinan tolu nia laran durante Jesus hala’o ninia missão no hare ho matan rasik rona ho tilun rasik durante loron hatnulu nia laran Jesus hatudu an ba sira,  to’o ona tempo atu Jesus fila fali ba nia Aman Maromak. Oras ne’e   sira mak tenki ba rai-rai hodi haklaken kona ba Jesus  ba ema hotu.

La facil atu husik malu, Jesus fila ba nia Aman no Apostolo sira tenki husik sira nia mestri,sira nia belun,sira nia Nai, sira nia Maromak,sira nia fans/ favorito, maibe tamba Missão bo’ot salvação Jesus nian sira tenki fahe malu. Jesus fila ba Aman Maromak, Apostulo sira sei ba haklaken ba ema hotu.

Jesus la husik atu Apostolo  mesak  hanesan oan kiak.  Nia promete haruka Espírito santo mai hodi hamaluk,  acompanha,  leno,  fo forsa,  fo matenek, no  fo aten barani iha Missão ne’ebe sira sei hala’o.

Ita sarani hotu hanesan apostulo sira, tenki brani atu ba fatin hot-hotu hodi ba haklaken Liafuan diak nebe ita simu husi Jesus.

 

 

Hakerek Husi:

Irmã Flavia mendonça, OP

 

Kontinua Le'e

NU'UDAR AMAN MAROMAK HADOMI HA'U, NUNE'E MOS HAU HADOMI IMI.

 

DOMINGO BA DALA NEN TEMPU PASCOA

1a. Leitura: Apos. 10:25-26,34-35,44-48

2a. Leitura: 1Jo. 4:7-10

Evanjelho: Jo. 15:9-17

 

            Iha Leituras no Evangelho ba Domingo dala nen tempo Pascoa nian fo hanoin mai ita kona ba DOMIN. Domin ida ne’e atu sai real no la’o tuir lolos mak Maromak nia hakarak, mak ohin Cristo convida ita atu halo tuir exemplo nebe Cristo hatudu no halo. Buat nebe Cristo hatudu no halo mak ne’e “Hadomi Maromak no halo tuir Maromak nia hakarak ka ukun fuan sira” halo Tuir Maromak nia hakarak Nia saran-An, saran moris rasik. Liu husi situação dramático: ema baku, hedi ba Cruz to’o mate. No nia finalidade mak ita ema hetan salvação, hetan moris no livre husi sala nia ukun.  Ida ne’e duni mak Cristo dehan “Ha’u nia ukun-fuan mak ida ne’e: imi sei hadomi malu hanesan Ha’u hadomi imi” (Jo. 15:12). Cristo hakarak no haruka ita atu hadomi malu. Nia la dehan: imi atu funu malu, duni malu, oho malu, bosok malu, bobar malu, hasala malu no hafu’u malu. Hahalok hirak nune’e hahalok ema nian nebe mai husi ema nia kaan, ema nia egoista ema nia vontade, to’o ikus mai ema la halo tuir ona Maromak nia hakarak. Mai ita apreende nafatin husi Cristo hanesan S. João hateten “ema ida la bele hadomi liu fali ema nebe saran nia-An tan Nia belun sira (Jo. 15:13).

    Iha uma formação ita hirak nebe escolhido ka hili ne’e saran ita-an tomak ba Cristo nia missão hodi nega ita nia vontade, ita kaan, egoista sira hodi dedika-an ba belun sira seluk liu husi ita nia missão, fo buat nebe ita iha ho fuan la’os fo ho liafuan. hanesan ita rona iha primeira leitura S. Pedro hatene katak nia iha limitação no fraqueza sira. Nune’e iha nia haklaken ka missão evangelizadora nian, nia sempre reconhece-an nudar ema sala-na’in. Tamba ne’e, mak iha Cornélio nia oin nia dehan: “Hamrik tiha!Basa ha’u mos ema ida hanesan o” (Act. 10:25). 

     Reconhecimento profundo ida ne’e, halo S. Pedro hatutan liu tan Maromak nia hakarak hodi hateten “tebes duni, Maromak la fihir ema ida! Maibe iha fatin hotu-hotu ema nebe moris ho hamtauk hodi moris tuir dalan justiça, ema ne’e sei monu duni ba Maromak laran” (Act. 10:26). Ne’e duni, atu ita bele haksolok ho Jesus no ita nia ksolok ne’e boot to’o rohan nia chave mak ida ne’e: “halo tuir Maromak nia hakarak nebe Cristo haklaken no fo sai”. Wainhira ita halo tuir ona Maromak nia hakarak mak S. João dehan “Cristo la bolu ona ita atan, tan atan sira la hatene sira nia na’in halo sa. maibe imi, Ha’u bolu belun, tan Ha’u dehan ona ba imi lia hotu nebe Ha’u rona husi Ha’u Aman”(Jo. 15:15). Ho domin boot ida ne’e, Cristo mos bolu no hili ema sira ba knar ne’e hodi dehan “la’os imi mak fihir Ha’u, maibe Ha’u mak fihir imi” (Jo. 15:16a). 

     Cristo la’os fihir deit maibe Nia haruka sira nebe Nia fihir no bolu ne’e atu halo diak barak, atu fo fuan no Nia hakarak sira nia fuan hela ba nafatin. Tan ne’e liu husi reflecsaun ida ne’e mai ita kuda Nai Maromak Nia domin neébe hasuli tiha ona mai ita hanesan we matan neébe iha ita ida-idak nia fuan laran, hodi hatutan hasuli mos ba ita nia maluk sira seluk atu Nai Maromak nia domin ida ne'e bele buras liu tan hodi halo ita hotu moris iha Nai Maromak nia domin...Amen.

Hakerek Husi: Irma Gragiela do Nascimento, OP

 

Kontinua Le'e