BUKA TEMPU BA SILENCIO NO HAKMATEK

 

DOMINGO BA DALA SANULU RESIN RUA TEMPU BAIBAIN

1a. Leitura: Job 38:1, 8:11

2a. Leitura: 2 Cor. 5:14-17

Evangelho: Mk. 4:35-42

Iha mundo agitado ida, ema barak haluha tempu precioso ida ne’e. Tempu ida atu descansa, relax no reflete kona ba moris no husu ba  an tansa laiha tempu atu hakamtek? Ita bele husu ita nia an, no meio da ita nia preocupação sira, sei hetan tempu atu hakmatek no tranquil@s?

Iha causas oi-oin husi ita nia tauk no ansiedade sira ; quando ita hasoru situações sira ne’e, ita lakon concentração no sai desorientad@s.

Iha Evangelho  S. Marcos 4:35-41,  evangelista ne’e  conta  história  kona ba Jesus ho nia  discípulos  ne’ebé hakur ba tasi sorin ho barco ida. No entanto, sira hasoru laloran no anin boot iha tasi klaran.  Discípulos sira hakfodak tebes;  Jesus hamutuk ho sira maibe Nia toba hela. Sira fanu nia no Jesus haksiak anin no dehan ba tasi HAKMATEK BA!

Ita la admira katak no meio da turbulência tasi nian, Jesus sei bele toba? Ita bele hare ba ita nia  experiências: será que ita bele  toba quando ita enfrenta lutas, dificuldades, perigos no moras?  Dala barak ita la consege toba diak tan ita tauk no causa husi ita nia tauk mak falta de confiança..

   Jesus fo hanoin mai ita dala ida tan atu buka tempu atu hakmatek no nonok atu pasa tempu ho Nia iha silencio nia laran atu nune’e ita bele goza no fo saborear Ninia companhia.

Nune’e ita bele reforça ita nia relação ho Nia no aumenta ita nia confiança iha Nia.  Confia iha Nia, keta tauk! Nia mak fonte única de força no encorajamento iha ita nia  jornada hanesan ninia  discípul@s.

Reflesaun Husi: Irmã Maria de Fatima Pui, OP

 

 

Kontinua Le'e

KARI HELA FINI NO HEIN TO’O NIA BURAS NO FO FUAN

 

DOMINGO SANULU RESIN IDA TEMPU BAIBAIN

1a. Leitura: Ez. 17:22-24

2a. Leitura: 2 Cor. 5:6-10

Evanjelho: 4:26-34

      Reflete kona ba Evanjelho Saun Markus 4:26-34, hau kumprende kedas kona ba Aiknanoik  ne’ebé Jesus koalia no compara Reino Maromak nian hanesan ema ida  ne’ebé kari hela fini iha rai.

    Moris husi familia  agricultor, hau hatene didiak oinsa atu kari fini no hein to’o fini ne’e moris sai buras no fo fuan.

   Reino Maromak nian bele compara ho Ita nia moris. Moris ida ne’e hanesan processo ida oinsa kari fini  ida to’o nia sai bo’ot no sei fo fuan .

   Uluk knanain, prepara rai, kari fini, atu fini ne’e moris diak precisa iha loro matan no be’e. Ita tempu balun precisa fokit du’ut no hein   ba milagre moris nian .

    Fini sei moris no buras rasik, ita precisa hein ho entusiasmo no paciensia, tau matan didiak, matan moris, iha coragem liu liu iha fiar no esperanza nafatin.

    Sei coeltha diak agradese, sei ladun diak agradese mos, aprende liu tan husi esperensia atu bele  hetan resultade diak liu tan iha tempu oin mai.

   Maomak mak author ba ita nia moris. Ita  tenki coopera ho moris ne’e  no husik Ninia Espiritu serbisu iha ita nia moris lor-loron.

   Hanesan fiar nain, ita continua kuda fini fiar, esperança, perdaõ, ksolok, dame, no justisa. Ita precisa kari fini Evanjelho nian no husik fini ida ne’e fo fuan.

    Ninia fuan ita sei hare iha cuialidade moris lor-loron nian. Jesus husu atu atu fo fuan, no fuan ne’ebé rohan laek.

 

Reflesaun Husi:  Irmã Maria de Fatima Pui, OP

 

 

 

 

Kontinua Le'e

DIAK NE’EBÉ ITA HALO EMA SEI HALUHA; CONTINUA HALO DIAK

 

DOMINGO BA DALA SANULU TEMPU BAIBAIN

1a. Leitura: Gen. 3:9-15

2a. Leitura: 2 Cor. 4:13-5:1

Evangelho: Mk.3:20-35

 

Jesus ninia parenti sira hanoin nia bulak ona no eskriba balun hanoin nia iha diabo iha nia laran. Tan nia serbisu loron kalan la para. Nia hala’o Aman Maromak nia vontade; halo diak nafatin ba ema hotu.

Wainhira ita halo buat ida, ema seluk sempre koalia. Nune’e Santa Teresa de Calcuta fo hanoin mai ita nune’e:

Ema dala ruma irracional no hanoin deit sira nia an, fo perdua sira de qualquer maneira.

Se ita laran diak, ema acuja ita iha motivos ocultos

Sai laran diak de qualquer maneira.

Se ita honesto, ema sei bosok ita,

Sai ema honesto de qualquer maneira.

Se ita hetan ksolok, ema sei laran moras,

Haksolok de qualquer maneira.

Buat diak ne’ebé ita halo, ema sei haluha loron tuir mai,

Halo diak de qualquer maneira.

Fo ba mundo buak diak liu ne’ebé ita iha no talvez nunca suficiente

Fo ita nia melhor de qualquer maneira.

Atu ita hare, no fim, ida ne’e entre ita ho Maromak

Nunca husi ita ho sira de qualquer maneira.

Jesus mesmu ema barak hanoin oi-oin kona ba saida mak Nia halo. Nia la para hala’o Aman Maromak nia vontade. Nia missaun manan ona diabu nia hahalok no Nia preocupa deit ho hahan Spiritual nian.

Tan ne’e mai ita hare ita nia serbisu sira lor-loron nian, se ita halo tuir Maromak nia hakarak, ita halo ba ita an rasik, ou ita halai tuir diabo nia hakarak?

Tebes duni, se ita hala’o Maromak nia serbisu, ita sei haksolok no sei la rende mesmu que  ita rona ema koalia kontra ita. Maibe sei ita halo saida mak ita hakarak deit no halo tuir diabo nia hakarak, ita nia moris sei la hetan ksolok no saida mak ita halo loron ida sei lakon le’et deit. Tan hala’o Maromak nia serbisu mak folin a’as liu buat hotu.

 

Reflesaun Husi: Irmã Maria de Fatima Pui, OP

 

 

Kontinua Le'e

SAI PAUN PEDAÇO IDA BA MUNDO

 

SOLENIDADE DO SANTISSIMO CORPO E SANGUE DE CRISTO

1a. Leitura; Ex. 24:3-8

2a. Leitura: Heb. 9:11-15

Evangelho: Mk. 14: 12-16, 22-26

 

Durante tempu pandemia celebrasaun festa ohin loron nian sai significativa teb-tebes. Sarani barak iha mundo tomak labele simu comunhão tan Celebração Eucaristica iha deit “online.” Sarani lubuk iha deseju boot tebes hakarak simu Jesus Nia futar Isin ho Ran real.

Maibe oras ne’e ita fila fali ona ba situasaun normal. Ema barak ba missa no simu comunhão domingo- domingo.. Ba sira ne’ebé iha devoção maka’as ba Eucaristia, adora no simu Jesus nia futar isin lor-loron.

Pergunta ida mosu katak: depois de simu Jesus nia futar isin no ran iha impacto saida ba ita nia moris? Iha transformação ruma? Ita koko moris tuir Ida ne’ebé fo nia isin ita han no fo nia ran ita hemu? Desafio boot ida mai ita katak depois de ita simu Jesus nia isin no ran, ita precisa sai hanesan nia. Ita koko atu hola ituan nia moris.

 Iha Evangelho são Markus nian descreve katak  Jesus kaer paun, fo bensa hodi  silu, no fahe paun moris nian ba escolante sira.(Mk. 14:22)  

    Iha matenek nain ida naran Henry Nouwen, o hanoin mai ita hodi hakerek iha nia liafuan rasik liafuan sira: “ kaer” “ fo bensa” “silu” no fahe” fo summario ba ita nia moris sarani nian tamba hanesan sarani, chamada ida ba ita atu sai paun moris nian ba mundo. Paun ida ne’ebé kaer, fo bensa, silu no fahe.

Hanesan paun ida Jesus kaer, Maromak hili ita, seleciona ita tan ita iha role improtante atu halo iha Maromak nia istoria. Hanesan Paun ne’ebé Jesus fo bensaun, ita mos hetan bensaun husi Nai Maromak. Nia bolu ita ita sai bensaun ba ema seluk

Hanesan paun ne’ebé silu hodi fahe, ita mos “quebrados” iha manera oi-oin. Convida ita atu hakuak ita nia kanek sira, aprende atu transforma sira nune’e ita bele senti sufremento maluk sira nian iha ita nia mundo nakonu ho kanek. Hanesan Paun ne’ebé Jesus fahe, Nia mos fahe mai ita atu sai presente ba ita nia humanidade.

Nune’e belun sira,  mai ita hotu sai paun pedaço ida ba mundo.

Reflesaun Husi: Irmã Maria de Fatima Pui, OP

 

Kontinua Le'e

SANTÍSSIMA TRINDADE MAK ITA NIA MODELO DE UNIDADE

 

DOMINGO DA SANTÍSSIMA TRINDADE

1a. Leitura: Deut.4,32-34.39-40

2a. Leitura: Rm.8:14-17

Evangelho: Mt.28:16-20

 

Ohin loron ita celebra um dos maiores mistérios iha ita nia fe nudar ema sarani, Santíssima Trindade. Celebrasaun ida ne fo hanoin mai ita kona ba Aman, Oan no Espírito Santo nia servisu hamutuk. Sira nunka fahe malu mesmu sira ida-ida iha distinta divina. Sira nia unidade ne’e misterio ida ne’ebé ita la komprende so bele apresia deit ho matan fiar nian.

Iha primeira leitura, Moises fo hanoin mai ita kona ba Maromak nia knaar maravilhoso. Maromak poderoso no domin nain ida ne’ebé realiza nia knar salvasaun nian. Tan ne’e mak Moises encoraja ita atu aumenta ita nia fiar ba Maromak ho maneira obedece ba Nai nia mandamento sira.

Iha segunda leitura São Paul aprezenta mai ita Santíssima Trindade nia asaun iha forma concreta: “Ho Espírito Santo nia acompanhamento ita Maromak nia oan no ita mak liman-rohan ho Cristo”.  Ho Espírito Santo ida nebe procede tanto husi Aman no Oan mak ajuda ita hodi bolu Maromak ABBA AMAN.

Iha evangelho Cristo rasik revela misterio Santíssima Trindade nian mai ita. Nia revelado ida ne’e ho mandato ida “Ba no halo discípulos iha nasaun tomak, sarani sira hodi Aman, hodi Oan no hodi Espírito Santo”.

Ohin loron Igreja fo hanoin mai ita katak Santíssima Trindade la ketak husi sira nia asaun grasa nian. Maibe sira servisu hamutuk no lao hamutuk, sira nia misaun hanesan deit, mak salvasaun mundo nian. Aman haruka Oan mai atu kasu mundo nia sala (Jn.1:1-3). No Aman no Oan haruka Espírito Santo hanesan ita nia Conselho no Advogado (Act.1:8).

Ho nune’e, Cristo nia orasaun ba nia Aman mak: “Atu sira sai ida deit hanesan ita” (Jn.12:22) ida ne’e mak orasaun ida nebe reflete Trindade nia domin.

Portanto, saida mak ita celebra ohin ne’e hanesan modelo ida ba ita nia unidade. Ita iha lisaun barak atu aprende husi Santíssima Trindade. Buat ida nebe importante liu hanesan Trindade mak, ita bele moris hamutuk no servisu hamutuk hanesan familia ida. Tamba iha ita hotu nia a’an ita lori imagen ida deit, ne’e mak imagen Maromak nian. Nune’e apesar ho ita nia personalidades individual no ita nia diferença sira UNIDADE NE POSSÍVEL NO UNIDADE NE’E OPÇÃO FUNDAMENTAL.

Nune’e, celebrasaun iha domingo Trindade nian ne’e iha buat barak tebes atu hanorin mai ita kona ba unidade iha ita nia relasaun sira, amizades, uma-kain, familia no comunidade tomak. Ida ne’e fo hanoin mos mai ita katak, apesar ho ita nia diferentes talentos sira, grasa be ita ida-ida hetan, nivel social no economía be ita ida-ida iha, ita bele fo liman ba malu hodi servisu hamutuk ba ita nia salvasaun no salvasaun mundo nian.

Finalmente, celebrasaun ne’e atu dehan mai ita katak Se ita lolo liman ba malu hamutuk ita nia diferentes personalidades sei sai ita nia forsa, laos ita nia fraqueza ou causa husi ita nia disintegração. Ba Trindade nia domin no unidade, mai ita hahi Santíssima Trindade: Gloria ba Aman, Gloria ba Oan no Gloria ba Espírito Santo, Amen

 

Reflesaun Husi: Irmã Rosita Carvalho da Costa, OP

 

Kontinua Le'e