DOMINGO BA DALA XIX TEMPO BABAIN
1a. Leitura: 1Re. 19:4-8
2a. Leitura: Ef. 4:30-5;2
Evanjelho: Jo. 6:41-51
Semana hirak liu ba, Evangelista S. João relata fila fila lala’ok kona ba pão moris nian (ai-han) nebe ita ema precisa hodi hetan moris. Domingo semana nee, São João Evangelista dala ida tan relata kona Paun nebe mai tun husi Lalehan katak (Nia an rasik), Jesus saran duni Ninia an iha (Eucaristia/Missa) nudar ai-han espiritual nebe extra-ordinário.
Ai-han nee fo kbiit mai ita nudar criatura hodi halao viagem moris iha mundo nee ba moris rohan laek iha mundo seluk. Nunee, Domingo semana nee, ita hetan convite hodi haklean sentido husi Cristo rasik nudar ai-han espiritual be fo kbiit ba ita nia moris.
Iha mos importante tebes atu ita bele reflete liu tan ba ita nia moris loron loron nian no oinsa ita atu bele pratica buat sira ne hotu liu tuir ita ida ida nia fiar hanesan evangelho sao Joao hatuir mai ita tan katak “hau mak paun moris rohan laek”, wainhira ita kolia kona ba paun moris nian\aihan, sim, aihan ne importante tebes ba ita hotu hotu , tamba ema hotu buka aihan atu bele sustenta sira nia familia, sira nia kabun,no mos importante tebes ba moris. Maibe ita ema moris laos mai husi aihan deit , laos ba ita nia isin lolon deit , maibe aihan saida atu bele fo mos ba ita nia klamar?
Tamba ne’e dala barak liu iha ita nia moris ita preocupa liu ho aihan nebe ba fisiko deit , maibe ita haluha katak iha aihan nebe impotante tebes ba ita nia clamar/spiritual nian ida ne mak ita Nia nai Jesus Christu rasik. sei wainhira ita hakarak buka pão moris, keta tauk atu buka pão moris ne’e, tamba Jesus rasik mak paun moris nian.
Consequência saida mak ita hetan wainhira ita simu Eucaristia? Se ita fiar metin duni saida mak ita haré no simu, nee significa ita simu duni Cristo. Tan Jesus sai duni we matan moris ba ita nobun. Cristo nia moris hanesan ita, ita nia moris sai hanesan Cristo. Moris tuir saida mak Cristo haruka no hanorin. Hamutuk ho Cristo significa hatudu moris diak hamutuk ho ema seluk iha ita le’et.
Liu husi participasaun iha Eukaristia, le’e Bible, simu sacramento sira, tau matan ba ita nia an, tau matan ba ema seluk no ba ita nia natureza no promove valor moris nian bele loke ita nia fuan no hanoin no atu comprende liu tan grasa misterio paun moris nian ne’e, nomos atu bele haklean liu tan ita nia fiar ba Nia. Hanesan mos Jesus haktuir tan mai ita katak “eme ne’ebe fiar hau hetan moris moris rohan laek”.
Reflesaun Husi: Irmã Berta Soares Moniz, OP
0 comments:
Post a Comment