DOMINGO BA DALA XXII TEMPU BAIBAIN NIAN
1a. Leitura:Dt. 4:1-2,6-8
2a. Leitura:Tgo. 1:17-18,21b-22,27
Evangelho: Mk. 7:1-8,14-15,21-23
Evangelho ohin nian convida ita atu sé tilun hodi rona no hatene didiak mensagem ne’ebé Nai hakarak no fo hatene mai ita. Mensagem sa mak atu rona no hatene? Mensagen Jesus hato’o mai ita ne’e iha relasaun saida ho ita nia moris? Mensagem Evangelho ohin nian sei relevante iha ita moris?
Belun sira, custume ka toman fase liman antes han, babain ona ba ema hotu nia tilun iha mundo ohin loron liliu iha tempo pandemia. Atu prevene an husi virus ne'e mak Organização Saúde Mundial (OMS) sempre insista ema hotu atu: uza maskara, distância social no fase liman bebeik (hand sanitizer).
Nune'e mak Iha Evangelho, ita rona kona ba Escriba no Farizeu sira observa hodi halo critica ba Jesus nia escolante sira ne’ebé la fase liman antes han. Ita hare sira fanático teb-tebes hodi halo tuir lei sira. Maibe hare didiak sira observa no exige ema seluk atu halo maibé sira rasik lá halo no concretiza iha moris. Ita hatene katak Ema Escriba mo Farizeu sira dekor ou “hafal” lei no ukun sira ‘diluar kepala’, hodi halo sira fo atenção liu ba buat liur (aparência ou superficial) nian no sira haluha fo atenção no importância ba buat nebe mai husi laran. Sira observa no conserva regras mas laran dok housi Maromak ou laran nakonu ho foer. Sira hahi Maromak ho ibun tutun mas laran dook husi Nia. Iha liafuan seluk atu dehan katak hahalok fariseu sira nian ne'e, iha liur haré hanesan graça ida maibé iha laran ne'e hanesan desgraça. Husi Sira nia atitude no hahalok ne’e mak Nai Jesus ‘tendangan’ ho naran munafik 'laran makerek'.
Hare fila ba ita-an, ita mos dalabarak hanesan maluk Escriba no Farizeu sira ne’e. Iha ita nia lala’ok lor-loron nian, ita marka horário oi-oin, hanesan oras ba reza, misa, adoração nst; maibé buat hirak ne’e ita halo tamba deit regulamento diario. Nune’e ita hala’o la ho fuan laran. Dalaruma, ita sente hanesan obriga an deit atu moris tuir regra sira. Ita hananu no reza lor-loron maibé ita nia lala’ok hatudu la hanesan ema religiosa ou ema fiar na'in. Basa, ita nia laran ne’e nakonu ho lixu oioin. Hanesan Jesus temi: “sala fo’er, na’ok, liman mean, soe biti kluni hakarak buat hotu ba an rasik, laran aat, laran makerek, laran metan, laran moras, ibun fo’er, loko-an, la hamta’uk Maromak”. Hahalok Farizeu no Escriba nian ne’e sei relevante tebes ba ita ida-idak nia moris iha tempo ohin loron. Tan ne’e, liu husi maluk sira uluk nia hahalok, ita mos bele hare ita nia an iha tempo ohin loron no aban-bairua.
Nune’e, Evangelista S. Marcos convida ita atu reflete kona ba hahalok aat sira be hafo’er no haterus ita ema nia moris hodi dada ita sés husi Maromak hodi la moris tuir ona Nia hakarak no Nia ukun fuan. Buat nebe Jesus hakarak ita atu halo mak ne’e “rona no halo” basa: “Maromak prefere liu Fuan nebe mak Nakonu ho Domin.” Nai Jesus hanorin ita atu hatene lolos ukun fuan domin nian hodi moris tuir Maromak nia hakarak. Ida ne’e la significa ita atu abandona tradição sira be ita iha; maibé, Nia hakarak haklean liu tan. Nune’e Nia dehan: “laiha buat ida iha liur nebe tama hodi halo fo’er ema nia laran, maibé buat nebe sai husi ema nia laran rasik mak hafo’er ema” (Mc. 7:15).
Ita hatene katak hahalok a’at hirak ne’ebé mai husi laran ne’e mak cria inimigo iha ita an rasik hodi halo ita nia moris lahakmatek no mos influência maluk seluk nia moris. Ho ida ne’e mak Jesus convida ita atu rona, no la’os rona deit maibé rona hodi comprende e moris tuir. Hanesan iha caracteres chineses husi liafuan rona (聽 thing) iha dezenho leten compose husi caracter tolu: tilun (耳), matan (目) no fuan (心) nebe fo significa boot ba ema: wainhira ita rona, tenki tun ba fuan, hafoin mak bele aplica iha moris.
Mai ita haka’as an atu cria iha ita fuan hahalok diak sira no hamos ita fuan ho graça Nai nian hodi moris tuir Nia hakarak. Ita harohan atu Nai nia Espírito nafatin anima ita no loke ita fuan, ita tilun no ita nia matan atu fo valor ba mensagen nebé ohin Jesus husik hela mai ita. Amen!
Reflesaun Husi: Irmã Leonarda Da Conceição Evangelista, OP
0 comments:
Post a Comment