HADOMI HANESAN JESUS HADOMI ITA

 

DOMINGO V DA PASCOA

 

1ª. Leitura: Atos 14, 20-26

2ª. Leitura: Apoc 21, 1-5

Evangelho: Jo.13,31-33a, 34-35

 

Maluk sira ha’u hakarak hahu reflesaun ne’e ho historia ida. Iha loron ida  jovem ne’ebé mate iha tasi laran tan deit atu salva nia belun ne’ebé atu mout. Nia konsege salva nia belun ne’e maibe nia rasik mate iha tasi. Historia sira hanesan ne’e akontese ona iha fatin barak, inklui mos iha ita nia rai. Belun ne’ebé diak mak belun ida ne’ebé saran nia vida hodi soi nia belun nia vida iha ameasa nia laran.

Liafuan Diak loron ohin nian hakarak fo hanoin mai ita atu reflete  oin sa Aman Maromak nia domin mai ita ne’ebé manifesta iha Nai Jesus Kristu. Iha Jesus Kristu ita hare Maromak nia domin ne’ebé bo’ot tan ne’e Jesus fo nia-An hodi iha krus atu salva ita ema.

Husi ne’e ita hare katak domin ne’e kna’ar ida nebe ita tenke realiza iha ita nia moris loron-loron nian, hodi hadomi ema hirak ne’ebé merese atu ita hadomi, liu-liu sira ne’ebé ema la tau matan. Hadomi sira ho domin Jesus nian. Atu ita bele hadomi ema seluk uluk liu ita tenke hadomi ita nia-an rasik no halo relasaun diak ho Jesus Maromak Oan, hafoin ita bele hadomi ema seluk.

Vokasaun baziku ba ita nu’udar ema kristaun maka ita tenke hadomi malu hanesan Nai Maromak hadomi ita. Tanba vokasaun atu hadomi ema seluk mak sasukat ida ba ita atu sai hanesan Maromak nia Oan sira no doben los. Hadomi Maromak no hadomi ema seluk maka ukun ne’ebé los no furak liu. Iha ne’ebé Maromak rasik habadak tiha Nia ukun fuan sanulu ba deit parte rua maka hadomi Maromak no hadomi ema seluk, liu-liu sira ne’ebé halo a’at mai ita.

Hadomi Nai Maromak ne’e hahalok ne’ebe fundamental ba ema Kristaun sira. Maibe oin sa ema bele hadomi? Ho dalan oin sa? Ho maneira oin sa? Oin sa atu konkretiza domin ne’e? sasukat sa ida maka ita uza atu hadomi? Atu hatan ba perguntas ne’e uluk liu mai ita ba aprende ho Jesus rasik basa Nia deit maka bele hanorin lia los mai ita, Nia rasik sei hanorin ita oin sa atu hadomi, se mak ita tenke hadomi. Tan ne’e, maluk sira mai ita sadere ba Maromak atu Nia rasik lori ita hodi hadomi Nia ho ita forsa tomak.

Reflesaun Husi: Irmã Zelia dos Reis, OP