Domingo XVI Tempo Baibain Nian
1a. Leitura: Gen. 18:1-10a
2a. Leitura: Col. 1:24-28
Evangelho: Lc. 10:38-42
Evangelho ba loron ohin nian, Saun Lukas koalia kona ba relasaun entre Jesus no feto rua hanesan Marta ho Maria. Marta sibuk liu ba buat hotu no koko halo buat hotu mesak deit. Maria fokus liu ba Jesus tan ne’e nia tur iha Jesus nia ain hodi rona saida maka ni koalia. Tan ne’e feto rua ne’e hanorin mai ita lisaun ba moris nian. Dala barak iha ita nia moris ita sai hanesan Marta hodi sibuk buat nebe la importante ou menus valor ba ita nia moris loron-loron nian.
Hanesan Marta wainhira nia sibuk liu ba serbisu entaun haluha tiha katak Jesus iha hela sira nia uma, no nia hirus fali Maria tamba nia la ajuda. Ita mos dala barak sibuk liu ba ida-idak ninia serbisu, no ita hatene katak agora ne’e mundu ne’ebé mak barulho tebes hanesan teknologia sira ne halo ita la fokus ba buat ne’ebé mak valor boot ba ita nia moris. Tan buat sira ne halo ita hadook husi Nain no lori ita ba tentasaun mundu nian hanesan konta ema nia vida, laran moras ba ema ne’ebé halo diak no selu-seluk tan.
Evangelho ohin nian Jesus konvida ita atu sai hanesan Maria hodi hakbesik Nia, rona Nia no fokus ba buat nebe mak Nia koalia. Tamba Nia hili Maria iha parte nebe diak liu, ne’ebé dalaruma ita mós presiza hili parte ne 'ebé di' ak liu, atu rona Na 'i iha orasaun no iha momentu silénsiu. Maske mundu ne’e nakonu ho destruisaun, maibe ita presija foti desisaun hodi fahe tempo para hatene katak tempu iha atu nonok hodi rona no tempu iha atu koalia. Tamba dala barak Jesus koalia ho ita iha tempu silensiu.
Reflesaun Husi: Irmã Felizarde dos Santos, OP
0 comments:
Post a Comment