“Imi la’o ba. Ha’u haruka imi ba nudar bibi oan sira iha asu fuik sira leet. Keta lori bukae, kohe eh sandalias.”

 

DOMINGO XVI TEMPU BAIBAIN NIAN

 

1a. Leitura:  Is:6:10-14c

2a. Leitura:  Gal.6:14-18

Evangelho:  Lk 10:1-12, 17-20

 

    Evangelho loron ohin nian, saun Lukas haktuir mai ita kona ba kondisaun atu sai nia discípulo Jesus nian.

  Vida discipulado/a iha riterio ne’ebé mak todan tebes, no criterio ne Jesus rasik mak halo ba ema ne’ebé mak hakarak tuir Nia. Maibe ita sei la sai discipulo/a Jesus nian se nia la bolu ita. Se mak bele tuir Jesus? Perguntas ida ne la’os refere deit ba Missionaria ou ba religioso/a sira deit maibe ba criatura tomak maske nia bolu ita iha dalan ketak ketak atu haklaken nia reino.

   Tambasa mak iha regras discipulo/a nian Jesus tau importansia tebes atu la’o ho liman ain mamuk, no La’o iha Asu fuik sira leet?

Ita tenki hatene katak kultura discipulo/a nian mak humilidade ne’ebé ho nia significa ne’ebé klean mak la’o ho Maromak atu servi.  

   Moris hanesan religioso/a ita presija atu troka ita nia kultura ida ne’ebé senti katak ita mak hatene buat hotu no furak liu ema seluk. Tamba Maromak deit mak ukun nain ba buat hotu. No buat hotu komesa husi Nia. Ho ida ne’e mak atu komesa ita nia jornada moris nian ita presija Nia. Hanesan mos vida discipulo/a ita presija hadia ita nia relasaun ho Jesus nebe bolu ita, no ita atu komesa halo servisu ita presija colabora ho nia selae mak ita nia misaun sei sai pesoal nian.

  Razaun ida ne’e mak Jesus dehan labele lori buat ida, so la’o ho Nia deit. Se ita la’o ho Jesus deit mak asu fuik sira mos sei la tata ita. Dala barak ita hasoru dezafious barak iha ita nia misaun, la’os katak Jesus husik ita mesak, maibe tamba buat barak ne’ebé mak ita lori, exemplo mak ita nia arrogansia, centro de atensaun, no buat barak nebe mak ita gosta tebes maske ita la presija.  

    Jesus haruka ita atu labele lori buat ida iha pasta wainhira ita desejo atu tuir nia tamba nia hatene katak Maromak deit sufficiente, nia bele halo buat hotu. Dalan diak ida atu tuir Jesus mak ita tenki sai ema ne’ebé inculturação atu ita bele moris hanesan Maromak ne’ebé halo An ba Ema. Ho ida ne mak Iha Segundo Leitura Sao Paulo tau nia an iha Maromak nia Forsa hodi dehan “Nia sei la vangloria ho nia an rasik maibe iha deit Jesus nia Cruz tamba Jesus nia Cruz mak forsa nebe lolos.” Gal 6:14-18

   Mai ita hotu moris tuir kultura Maromak nian ne’ebé hanorin ita atu moris iha humilidade hanesan Maromak ne’ebé haraik An hodi moris iha ita. Entrega ita nia prioridade ba sasan, forsa mundu nian ne’ebé la permanente fo tempu ba Jesus hodi hatene nia misaun lolos mai ita ne mak saida.

 

Reflesaun Husi: Irmã Rosaria Aurea Ximenes,OP