QUARTO DOMINGO DO ADVENTO
1a. Leitura: Is. 7:10-14
2a. Leitura: Rom. 1:1-7
Evangelho: Mt. 1:18-24
Maluk doben sira hotu mak Cristo hadomi. Ohin ita tama ona ba Domingo ikus molok Natal, Ita hein katak tempu ne'e sei nakonu ho esperansa, ksolok, domin no dame. Espera ita hotu iha tempu atu reflete fali kona-ba promesa sira ne'ebé ita halo ona iha tempu Advento. Tempu ne'ebé ita prepara ita-nia an ba simu Jesus nia prezensa mai moris hamutuk ho ita.
Ohin loron Domingu ba dala haat tempo Advento nian baibain konsidera hanesan “Domingo DOMIN” nian. Ita hare ba Evangelho ohin nian la'ós apresenta mai ita kona ba dame maibe istória ida-ne'ebé lori ita ba ema laran-loos ida-ne'ebé haraik-an naran Jose.
Iha Evanjellu ohin loron mak atu fó-hatene de'it ba ita katak Jesus moris ho Espíritu Santu nia kbiit no Maria Virjen moris tuir Maromak nia planu. Kronolojia kona-ba akontesimentu sira inklui Jose nia mehi hatudu de'it oinsá mak Maromak iha planu ida atu salva ita. Istoria ne'e hatudu ho klaru katak ema envolve an iha Maromak nia planu salvasaun nian. Ohin mai ita hanoin kle'an kona-ba resposta rua husi ema nain-rua ne'ebé importante liu, ne'ebé sai nu'udar instrumentu iha Maromak nia inkarnasaun.
Primeiro, Maria nia fiar hatán ba Maromak nia promesa: Maria nia knotak sai Arka Aliansa Foun nian, ne'ebé Maromak la'ós de'it halo inventa maibé mai atu hasoru ema ne'ebé rahun ona. Maria nia SIM sai nu'udar xave ne'ebé Maromak loke odamatan ba ita-nia salvasaun. Nia haka'as an atu dehan SIM ba Nai, tanba liafuan sira-ne'e Maria tau iha nia laran. Maria iha fiar ne'ebé kle'an, no nia tenke husik ninia planu rasik no hatete SIM ba moris fiar nian.
Segundu, ohin loron ema bolu Jose nu'udar ema laran-loos la'ós tanba nia halo tuir ukun-fuan no tuda Maria ho fatuk atu oho, maibé tanba nia hatudu fiar hodi rona ba espíritu santu. Nia husik Kristu moris iha ita nia leet hodi husik Espíritu Santu atu halo serbisu bainhira nia foti Maria nu'udar ninia feen.
Saõ Jose tau fiar ba Maromak nia intervensaun no ninia mehi liuhusi Anju. Importante tebes atu nota katak Saõ Jose hako'ak Kristu nia oan tanba mehi ida. Maibe ne'e mak mehi deit ka? Ita hotu iha mehi barak no balu ne'ebé oin-seluk no la iha signifikado. Entaun, tanbasá mak Saõ Jose sadere ba mehi ne'e nia loloos? Resposta ba pergunta ne'e simples tebes. Maski nunee, ninia mehi mak mehi ida de'it ne'ebé akompaña mós ho prezente fiar nian no fiar ba Maromak. Jose hatene ho laran-metin katak Maromak nia lian ko'alia ona ba nia no nia hatán ho fiar ne'ebé laran-luak. Ita sei la iha mehi ne'ebé Maromak ko'alia ba ita hanesan anju ida, maibé Maromak ko'alia ba ita lor-loron. Maromak ko'alia diretamente ba ita-nia fuan, neon no laran no mós liuhusi kuidadu no mediasaun ba Anju sira-nia lian oioin. Maromak nia Anju kontinua lori mensajen no inspirasaun husi Maromak mai ita. Pergunta ba ita mak ita rona ka lae? Rona ho ita-nia laran ne'ebé nonook ohin loron no husik ita nia an atu halo tuir Testemuna ne'ebé fó glória ba Santu Jose nu'udar nia hatán ba ita-nia Nai nia hakarak ho fiar no fiar ne'ebé perfeitu. Santu Jose habelar ninia laran-sadi'a, no ninia aten-barani hotu sai husi ninia fiar ne'ebé metin ba Maromak. Mai ita koko atu konvida Jose nia hahalok sira no halo nia sai ita-nia modelu hodi tuir Jesus.
Belun doben sira, iha mós tempu balu iha ita-nia moris bainhira buat ne'ebé la hanesan mosu iha ita-nia dalan. Porezemplu, ema ne'ebé nia hadomi mate derrepente deit, moras perigozu ida, buat ne'ebé la kontente, no seluk tan. Ita prontu atu simu sira nu'udar Maromak nia hakarak ka? Mai ita halo orasaun liuhusi Intercesaun Inan doben Maria Virgen no Saun Jose nia liafuan atu ita mós bele simu Maromak nia hakarak iha ita-nia moris. Amen.
Reflesaun Husi: Irmã Zelina Mendonça
0 comments:
Post a Comment