SOLENIDADE MARIA MAROMAK NIA INAN
1a. Leitrua: Nm 6:22-27
2a. Leitura: Gal 4:4-7
Evanjelho: Lk 2:16-21
Mundu ne’e sei naroman ho dame no domin se ita hafoun ita nia moris ho hanoin ne’ebé positive. Tinan foun hanesan opportunidade ida ba ita ema atu komesa moris foun, moris ne’ebé nakonu deit ho Maromak nia Spiritu santo. Ho Opportunidade ida ne, ita mos sei fo tempu hodi halo reflesaun kona ba ita nia lalaok iha tempu pasado nian. Oinsa ita nia relasaun ho Maromak ho ita nia Maun alin sira no mos ho ita nia an rasik? Tamba buat hotu ne’ebé ita halao iha ita nia vida moris nian, ida ne’ebé essencial tebes mak, Domin ba Maromak, no ba ema seluk hanesan ita nia an rasik. Ho ida ne mak Hau konvida ita hotu atu reflete evangelio ohin nian husi Saun Lukas 2:16-21.
Iha Evanjelho ne’e haktuir katak: “Wainhira Bibi atan sira hare Jesus, Maria Ho Jose iha Belem sira haksolok no haklaken makas hodi fo gloria ba Maromak” Mai ita reflete hamutuk, tamba sa mak bibi atan sira haksolok tebes wainhira hare Jesus ne’ebé mak toba det iha Bibi luhan? No tamba mak sira fo Gloria ba Maromak?
Wainhira Bibi atan sira hare Jesus ne’ebé toba iha bibi luhan, sira hare Maromak nia prejensa, sira hare esperansa, sira hare ksolok, sira hare naroman no sira senti Domin. Hare ba ita nia mundu modernu, wainhira ita visita ema kiak sira ita triste tebes tamba sa sira moris nune, tamba sa sira hela iha fatin a’at, Dalaruma ita la valoriza sira hanesan Maromak nia kriatura tamba deit vida moris nian differente. Maibe Bibi atan sira ohin ne hanorin ita atu hare ba buat nebe importante no namoran tebes ba ita, ida ne’e mak hare ba Jesus ne’ebé toba iha bibi luhan laos hare ba fatin ne’ebé mak nia toba ba.
Loron ohin ita selebrate Solenidade Maria Maromak nia inan, hodi relembra realidade Jesus Cristo nia incarnasaun. Jesus sai ema liu husi Maria hodi ida ne mak ita bele hatene didiak Jesus liu husi Maria. Sai Hanesan Inan ba Igraja Maria mos inan ba Intercesaun. Honra Maria atu hatudu ita nia respeita ba nia hanesan Jesus nia Inan. Ita nia domin ba Maria nunka mais boot liu Jesus Christu nian, Jesus hadomi Maria liu buat hotu tamba ho Maria mak nia sai ema lolos. Mai ita selebra Maria Maromak nian ida hodi husu nia sai belun no modelu moris nian ba ita. Hanesan Maria ita mos tenki iha coragem hodi simu terus no susar iha silensio nia naran no entrega det ba Maromak. Ho Maria, mai ita sai ema ne’ebé mak hanoin foun hodi hadia ita nia moris hanesan Kristaun ne’ebé hadomi Maromak no maun Alin sira.
Reflesaun Husi: Irmã Rosaria Aurea Ximenes,OP
0 comments:
Post a Comment