SOLENIDADE BA FESTA NATAL NIAN
1a. Leitura: Is. 52:7-10
2a. Leitura: Heb. 1:1-6
Evangelho: Jn. 1:1-18
Jesus mak mundu nia naroman. Sidade ida-ne'ebé harii iha foho-oan labele subar.
Maluk doben sira hotu mak Kristu hadomi, ohin ita tama ona ba Festa Natal. Natal mak Jesus Kristu nia moris, ne'ebé moris la ho rikusoin no la ho naran-boot, maibé ho haraik-an no domin. Natal nia signifika mak hadomi malu no haraik-an atu prepara dalan ba ita-nia Maromak atu moris iha ita-nia moris.
Maun-alin doben sira, Natal mak tempu kontente, domin no dame nian. Ida-nee fó-hanoin ita atu sai Joao Batista ida seluk ne'ebé prepara ona dalan ba Nai, Maria Virjen ida seluk ne'ebé haraik bénsaun ba Jesus iha ita-nia moris ohin loron atu fó sasin ba ita no José ida seluk atu proteje no dirije Maromak nia ema sira ne'ebé Maromak hili ona. Natal mak loron ne'ebé kontente no momentu ksolok nian. Ema hotu iha mundu ne'e haksolok no haksolok tanba naroman foun ne'ebé moris mai, ne'e mak Jesus, ne'ebé tun ona mai rai. Profeta Isaias hatete iha 9: 2 katak ema ne'ebé la'o iha nakukun laran haree ona naroman boot ida. Iha ema sira ne'ebé hela iha nakukun laran, naroman ida sunu tiha ona. Kosok Oan ne’ebe mai hamutuk ho ita nu'udar naroman ba ema barak ne'ebé iha nakukun laran no sira ne'ebé nunka hatene naroman, agora sira haree ona naroman ne'ebé salva sira.
Iha Evanjellu ohin loron kona ba prólogu husi Saun Joao. Joao apresenta katak Nai Jesus mak LIAFUAN ne'ebé uluk Maromak fó sai ona no liafuan ne'e iha ona antes tinan hotu, no liafuan ne'e mós iha ona ho Maromak no buat hotu mosu liuhusi liafuan nee. Ema ida nunka haree Maromak, maibé agora Jesus ne'ebé hamutuk ho Aman fó sai ona nia. No buat hotu ne'ebé iha mundu ne'e la mai husi ema seluk, maibe liuhusi Jesus Kristu no Jesus rasik mak liafuan ne'e rasik mak fó sustentaun ba kriasaun tomak. LIAFUAN ne'e mós temi nu'udar NAROMAN. Hanesan ohin ita selebra Festa loron NATAL. Natal mak festa NAROMAN nian, tanba Jesus mak naroman ne'ebé mai iha mundu atu hasai tiha nakukun husi sala, mate no Satanas. Kosok Oan Maksoin Na’i Jesus Kristu mai moris hamutuk ho ita atu salva ita ema husi sala no nakukun laran hodi ita ba dalan naroman salvasaun nian.
. Maromak haruka Joao Batista atu fó sasin no fó sasin ba naroman. Nia konvida ema hotu atu fiar ba naroman loos, Jesus Kristu. “Hau mak naroman mundu nian; ema ne'ebé la'o tuir ha'u sei la'o iha nakukun laran, maibé sei iha naroman moris nian.” Ita hotu hatene katak se la iha naroman, ita labele haree ho klaru. Difisil atu la'o iha nakukun laran. Nunee mós iha ita-nia dalan espirituál nian, ita-nia Nai Jesus hakarak ita atu la'o hamutuk ho nia ne'ebé mak naroman lolos. Se la iha nia iha ita-nia moris, ita sei sente susar atu la'o no bele lakon iha ita-nia viajen.
Belun doben sira, ita fo agradece ba Na’i tan Nia haraik grasa bensaun ksolok naroman nian nebe leno dalan ba ita atu passa liu nakukun sira nebe mak ita hasoru ona iha tinan 2022 nia laran. Ita la hatene saida mak sei akontese iha tinan 2023 oin mai, ho situasaun diak ou la diak mak sei hasoru , maibé mai ita nafatin sai naroman nia oan iha tinan oin mai. Husik Kristu nia naroman nakloke iha ita-nia moris hodi dirije povu ne'ebé hale'u ita iha nakukun laran. Iha biban ida nee Santo Padre Papa Francisco hatete “mundu no Igreja presiza imi atu sai hanesan naroman ba mane no feto sira-nia viajen moris nian.” Husik mensagem ida-ne'e sai ita-nia vizaun no ita-nia misaun, atu nune'e Kristu, sai nu'udar naroman ne'ebé loos bai ta ida-idak nia moris.
Ita husu Espiritu Santu nia grasa atu loke ita nia fuan no laran atu naroman ne’ebe mai iha raiklamar leno ita hot-hotu nia fuan atu hatene rekonhece naroman boot ida nee. Atu ita hotu hatene haraik an no mos iha koragem atu loke ita nia fuan atu hatene senti ema seluk nia terus no hamamar ita nia fuan atu hatene hadomi no hatene perdua.
Boas Festas do Santo Natal 2022 ninian ba Maluk doben sira hotu.
Reflesaun Husi: Irmã Zelina Mendonça
0 comments:
Post a Comment