“Mai besik hau imi hotu ne’ebé kole no terus, hau sei fo kmaan ba imi.”

 

DOMINGO XIV TEMPU COMUN

1a. Leitura: Zec. 9:9-10

2a. Leitura: Rom 8:9, 11-13

Evangelho: Mt. 11:25-30

 

“Moris nee rasik problema ida” no ema ida-idak iha nia problema rasik. Ho ida nee iha cada processo de jornada, ema ida-idak sempre buka dalan oioin atu hetan solusaun.

Ita hare ba acontesemento sira ohin loron nian. Husi parte material hanesan (osan) no parte profesaun nian hanesan (nai ulun boot sira ou ema conhesido sira). Hirak nee sempre hetan solusaun lalais ba sira nia problemas. Maibe laran susar ba hirak neebe kiik no kiak. Barak la aguenta, no ikus mai lakon MORIS. Realidade hirak nee lori naha todan liu tan ba ema kbit laek sira.

Ohin Cristo rasik hasai nia konvite ba ema hotu. La fihir ba knaar no rasa, maibe fihir ba o no hau nu’u atan ne’ebé fraku; todan atu hader no todan atu hakat ba oin. Nai bolu hodi dehan: “Mai besik hau imi hotu ne’ebé kole no terus, hau sei fo kmaan ba imi.”

Notisia ida nee encoraja ita hotu liliu hirak ne’ebé infrenta hela ho situasaun no condisaun nee moruk tebes. Hakas an nafatin atu tau fiar iha Nai nia mensagen ne’ebé Nia promote. Tan Cristo nia lia promete, mesak liafuan ne’ebé isin no sai tuir lolos ba hirak ne’ebé mak tau neon no laran metin Nia.

Atu conclui, hakarak convida maun alin no inan feton sira hotu. Mai ita hakas an nafatin atu sadere deit ba Cristo. Doutor professional, hatene no conhese klean kanek no todan ne’ebé ita infrenta iha ita nia isin no klamar. Besik ba Cristo, tan Nia milagre nia nain, hori uluk kedan too agora no ba nafatin. Amen!

 

Reflesaun Husi: Irmã Sara Mendonça, OP