“IDA NE’EBÉ LA SIMU NIA CRUZ ATU BELE TUIR HA’U, NIA LAÓS HA’U NIAN.”

 

 

 

DOMINGO XIII TEMPU COMUN

 

              1a. Leitura: 2 Rs. 4, 8-11, 14-16

              2a. Leitura: Rom. 6:3-4, 8-11

                                  Evangelho: Mt. 10:37-42

 

      Maluk doben sira hotu mak Kristu hadomi, ohin ita tama iha Domingo ba dala sanulu resin-tolu iha tempo baibain. Iha leitura ohin nian Jesus hanorin mai ita atu tau Maromak uluk husi ita nia prioridade sira; Primeiro, ita tenki hadomi Maromak liu fali ema hotu, inklui mós ita nia inan-aman, oan no ema nebé ita hadomi. Tamba ita hadomi no hamtauk ita nia inan-aman mak hakerek ona iha (Ukun-Fuan Sanulu). Maibé Jesus la hatete ba ita atu la hadomi ita-nia inan-aman ka oan sira. Jesus dehan ita tenki hadomi uluk Maromak. Se ita hadomi Maromak ho laran tomak, ita-nia domin sei sai barak liután no sei sai nakonu liután. Ita sei iha domin ne'ebé natoon ba família, belun, ema nebe la gosta ita no mós ema ne’ebé rai ódio mai ita. Segundo, ita nia disponibilidade ba lori ita nia Kruz rasik hodi la’o tuir Jesus, no halo di’ak ba ita nia maluk sira ne’ebé presija tebes ita nia tulun.

      Iha primeira leitura ohin hanorin mai ita kona ba feto ida nebé simu profeta Eliseu ho laran-luak ba ninia uma tamba nia hatete ba ninia la’en: “Hau hanoin ema ne’ebé mai beibeik ita nia uman, ema di’ak ida, nia Maromak nia emar.” Ho attitude laran di’ak ne’ebé feto iha, Eliseu haraik bensaun ba ninia laran-luak hodi husu Nai atu haraik bénsaun ba ninia oan ida.

      Iha Segundo leitura Saun Paulo hanorin mai ita kona-ba Batizmu natureza ne’ebé halo ita sai ida de’it ba Kristu nia mate no moris-hias, hodi halo ita livre husi salan hodi moris hamutuk Maromak no Nia oan mane Jesus Kristu.

      Iha Evangelho ba ohin nian, Jesus hateten simu ita nia Cruz hodi lao tuir Jesus, inklui ita nia moris rasik, ita tenke hili la’o tuir Maromak no lao tuir nia. Nia hanorin ita, la’ós atu hatudu laran di’ak deit, maibé atu fó ita nia moris tomak ba ema seluk nia servisu. Nuné mos Jesus hatete kona-ba fó ba sira ne’ebé halo buat di’ak ba ninia disípulu sira. Ne’e katak sá? Ne’e katak buat di’ak ne’ebé ita halo ba ema ne’ebé la’o tuir Jesus mak ita sei simu fali buat ne’ebé ita halo ba dala atus ida. Ita hotu hatene katak Jesus hakarak ita laos atu hatudu hahalok di’ak ba ninia desípulu sira de’it maibé ita halo buat nebé di’ak ba ema nebé presiza: Ba ema ne’ebé lakon, ba ema kiak sira ne’ebé lao iha dalan laran, ba ema ne’ebé lakon esperansa nunka senti Maromak nia prezensa iha sira nia moris, ba familia ne’ebé moris iha susar no terus nia laran seidauk hetan ema seluk nia ajuda no selun tan. Ita halo buat diak ida ba ema seluk la signifika ema atu selu fila fali mai ita maibe ita halo tamba ita hadomi tebes Maromak.

      Liu husi leitura tolu ne’ebé ita reflete, ita aprende kona ba buat ne’ebé importante liu hotu nebé ita tenke halo nu’udar ita nia embaixador ba mundu. Ita tenki pronto atu hasa’e sakrifísiu lori ita nia cruz rasik nebe la fasil, ita lao laos ida dalan kaber no tetuk, sei hasoru dezafius oioin, lao liu husi ai-tarak kroak, anin fuik, hasoru mota boot no sae foho leten, ikus mai crúz ne’ebé todan sai midar no fo naroman hodi leno dalan ba ita nia moris rohan laek.

       Ikus liu kuandu ita pasiensia no haraik-an hodi halo tuir Maromak nia hakarak no ajuda ema seluk atu lori sira nia crúz hodi la’o tuir Jesus, nia haraik bénsaun barak ba ita. Ohin loron, Jesus sei haraik bénsaun ba ita hotu atu lori ita-nia crúz no la’o tuir nia.

 

Reflesaun Husi: Irmã Zelina Mendonça, OP