“Fini mak Maromak nia lia-fuan, Cristo mak kuda hela; ida ne'ebé hetan Nia, sei hetan moris rohan laek."

 

DOMINGO BA DALA XV TEMPO BAIBAIN

1ª. Leitura: Is. 55:10-11

2ª. Leitura: Rom 8:18-23

Evangelho: Mt. 13:1-23

            Maluk sarani doben sira mak Nai Jesus Cristo hadomi; Maromak ninia futar liafuan iha domingo ba dala XV ne’e liu-liu iha evangelho, Jesus desafia ita atu halo nafatin EXAME DE CONSCIÊNCIA hodi hare ita nia disposisaun;

1.      Oinsa ita rona Maromak nia liafuan!

2.       To’o porcento hira mak ita aplica Maromak nia lia fuan ne’ebé ita rona ne’e iha ita nia moris lor-loron nian?

Maromak nia lia fuan fanun ita nafatin loron ba loron atu hari’i ita nia relasaun pessoal ho NIA oan Jesus.Basa Maromak la sura dala hira ita monu, maibe Nia prontu nafatin atu rona ita nia lia bolu ba Nia ho fuan haraik an no nakonu ho esperansa.

Iha primeira leitura Naí nia futar lia tun dehan “LIAFUAN NE’EBÉ SAI HOUSI HAU NIA IBUN LA FILA HIKAS MOLOK HALO DI’AK, HALO TUIR HAU NIA HAKARAK, NO HALO TUIR NINIA KNA’AR.” Ne’e katak Maromak ninia futar liafuan, liafuan di’ak nian be halo di’ak, be construi ka hari moris ne’e, fo moris ba ema, laos liafuan a’at, laos estraga atu hamate ema nia moris. Nune’e Maromak hakarak dehan mai ita katak hodi Maromak ninia futar liafuan ne’e, ita hotu nebé fiar iha Maromak mesak ida de’it, ita ninia futar liafuan sira tem que tulun moris, hamoris, hari’i, hametin, tem que lori moris mai ita ida idak ninia-an, ba ema seluk no ba mundo tomak. Ita ninia liafuan sira mak reprejenta Maromak ninia futar liafuan ne’ebe nakonu iha: Laran luak no laran maus, la rai odio no hirus maibé hakarak di’ak de’it, la bosok no la bobar lia, maibé buka tulun no hakarak di’ak de’it hode bele perdua malu iha moris tomak, Tamba neé nu’udar ema fiar nain nebé hala’o moris ida ne’e buka halo tuir nafatin Maromak ninia hakarak,  percisa rona ba Maromak ninia futar liafuan lor-loron, no haklaken Maromak ninia futar liafuan los no moris nian ne’e ba ema iha ita nia moris lor- loron. Liu housi ita ninia liafuan no hahalok sira be sai tuir lolós Maromak ninia futar liafuan ne’e”, atu nune’e ita bele hetan moris, no moris ida dook housi susar no nakonu de’it ho domin, dame no ksolok lolós nian.

Iha segunda leitura halo ita bele descobre ita ninia hahalok a’at balun ne’ebé dala wa’in lori terus mai ita no mos ba ema seluk. São Paulo husu ita iha segunda leitura atu ita “hakas-an sai housi fatin aat ka hahalok aat sira ne’e ninia kbiit hodi simu fali kbiit di’ak be mai housi Maromak hodi bele moris lolós nu’udar Maromak ninia oan doben. Ita precisa hatene an katak ita Maromak oan no sei moris tuir de’it dalan Moris Maromak oan sira nian. Ita buka hatene buat nebé los no buat nebé sala hodi hili ida nebé los no ida nebé sala ho roman Espirito Maromak nian no ho tulun Maromak ninia futar liafuan be liafuan moris nian ne’e. Moris tuir Maromak ninia Espirito no Maromak ninia futar liafuan ne’e katak FIAR, HALO TUIR, PROMETE NO PRONTU atu hadomi de’it Maromak liu sasan hotu-hotu no hadomi ema seluk liu ita ninia an rasik. Ita la fiar tan fali ba buat seluk ida, ou buat nar-naran deit. Ita FIAR, HALO TUIR, PROMETE NO PRONTU ba de’it Maromak be moris ninia nain, no bele halo hotu-hotu, bele halakon terus no susar ita nian no bele Manan terus no mate ne’e liu housi maksoin be mai housi Jesus Cristo Maromak oan mane mesak.

Iha evangelho ita hare momos ita ema nia hahalok ho Maromak nia liafuan husi aiknanoik semeador. Iha parábola  ida ne’e iha buat lima nebé importante, primeiro konaba “Ema ida ba kuda fini iha rai”. Segundo, fini balun ne’ebé monu iha dalan ninin. Terceiro, Fini seluk monu iha fatuk laran. Quarto, Fini balun nebé monu iha ai-tarak laran no Quinto, Fini balun nebé monu iha rai bokur.

Iha caracteristica haat nebé ita identifica nu’udar hahalok ema nian ne’ebé rona no la rona Maromak nia Liafuan. Ema ne’ebé simu no la simu Maromak nia Liafuan. Ema nebé halo tuir no ema nebé la halo tuir Maromak nia Liafuan. Ne’e mak hanesan ohin ita rona iha Evangelho São Mateus 13, 3-9, haktuir mai ita katak fini balun nebé monu iha dalan ninin; manu sira haré no han tiha. Ema ida ne’e lakohi liu atu simu Na’i Maromak nia Liafuan iha nia moris tomak, fila kotuk ba Maromak. Ikus mai buat aat mak sai domina liu iha nia moris. Nune’e nia moris la folin iha sociedade nia le’et.

Fini seluk ne’ebé monu iha fatuk laran; fini ne’e moris duni maibe la dun iha nia fuan tan rai la dun bokur nune’e wainhira loron manas kona mate tiha tan abut la metin. Ne’e atu dehan mai ita katak ita rona Maromak nia Liafuan iha Domingo-Domingo maibe fila fali ba uma, ema seluk mai fó influencia ou bosok ita tan deit atu simu osan, supermi, kareta, motor, uma no posisaun ikus mai ita ba tama fali religião seluk. Fini seluk fali monu iha ai-tarak laran; moris mai ai-tarak hanehan mate tiha. Katak ita simu duni Maromak nia Liafuan maibe moris hamutuk ho hahalok aat sira no hahalok aat ida ne’e domina liu ita ema ikus mai Maromak nia Liafuan lakon tiha iha ita nia atitude ibun dehan fiar maibe hahalok moris lao ketak. Katak ita la fó importancia ba fiar nudar sarani hakarak passa vida contente ho sasan mundo nian ikus mai ita lakon ita nia-an nudar sarani. No fini seluk ne’ebé monu iha rai bokur; ne’e sei fó fulin to’o atus, seluk to’o hitu nulu no seluk fali to’o tolu nulu. Ne’e katak ema nebé simu no rona Na’i Maromak nia Liafuan ho laran mós, klamar mós no prática Evangelho iha nia moris tanto iha família no sociedade. Jesus ohin simplifica tiha katak fini nebé monu iha rai bokur hetan fulin wain be wain. Ema ne’ebé simu Na’i Maromak nia Liafuan iha nia moris tomak, loron ida nia sei hetan Graça wain be wain, sura be la nahas, sukat be lato’o. Ho ida ne’e; mai ita hare ba ita ida-idak nia moris. ita nia moris dadauk ne’e representa fini nebe monu iha estrada, fatuk laran, ai-tarak laran ou ida ne’ebé monu iha rai bokur?

Ita husu ba maromak atu tulun ita iha ita nia haka’as-an atu produz fuan tebar iha ita moris atu ema seluk bele hare ita nudar maromak nia seguidor nebe autêntico. Karik ita nia moris representa rai to’os, fatuk no tarak; momento ida ne;e bele lori ita  fila fali ba maromak no rona didiak maromak nia lia fuan hodi husik ita-an atu maromak nia graça hola abut no isin iha ita. mai buka halo diak nafatin iha ita ida-idak nia moris no labele kolen atu halo diak hanesan ita nia aman iha lalehan ne’ebé sempre halo diak mai ita, maske dala barak ita fila kotuk tuir deit ita nia hakarak sira. abilidade halo diak iha moris iha mundo ne’e risku maibe, iha komitmentu a’as ba Maromak nia promete no lia fuan diak ne’ebe sai isin liu husi nia oan Jesus nia prejensa mai ita ita iha mundo hodi sai mediador ba ita ho Aman Maromak, ohin la iha tan duvidas atu fiar iha Maromak. Aman,Oan no Espiritu Santo. amen

 

Reflesaun Husi: Irmã Sabina Mota, OP