DOMINGO BA DALA RUANULU TEMPU BAIBAIN NIAN.
1ª Leitura: Is. 56:1, 6-7
2ª Leitura: Rom 11:13-15,29-32
Evangelho: Mt. 15:21-28
Iha moris, Ita ida-idak iha ita-nia istória rasik no la’os istória ne’ebé mak furak, moos no diak liu maibe dala barak istória ne’ebe nakonu no krize oioin,problemas oioin, moras oioin, susar barak no sala barak. Husu ba ita nia an; saida mak ha’u halo ho istória hirak nee? Ha’u subar tia ka halai se’es husi realidade istória nee rasik? Lae! Ita tenke lori ida-ne’e ba Maromak nia futar oin. Maske momentu ne’ebé ita husu Maromak la fo resposta kedas maibe ita sei hetan resposta ka solusaun wainhira Maromak nia tempu to mai. Importante ita labele lakon esperanza hodi hein. Hein ho domin, hein ho pasiensia, hein ho haraik-an, esforso haka’as-an no la rende atu halo orasaun beibeik no la lakon esperansa katak Maromak sei kura ita ka Nia sei kumpri ita nia hakarak sira.
Iha Evangelho ohin nian haktuir mai ita kona ba reuniaun ka hasoru malu entre Jesus ho Feto Canã iha rejiaun Tiria no Sidon. Feto ida ne’ebe nia hasoru susar oioin; Susar ida tamba nia oan feton ne’ebé moras hela no susar ida seluk tamba Feto nee ema Canã nian, sira ema jentiu, inimigo ho Judeu labele kahur ou koalia ho ema Judeu sira. Maibe tan deit nia domin ne’ebé boot ba nia oan feto no fiar ne’ebé boot iha Na’i halo nia iha koragem hi’it an hakbesik ba husu Jesus nia Tulun.
Liu husi Feto Canã nee nia fiar no umildade ne’ebé nia iha ikus mai, nia simu prezente haksolok nian husi Jesus. Iha tempu susar nia laran, nia kontente no hatudu ninia fiar tomak iha Na’i Maromak. Fiar halakon tiha Inan-feton ne’e nia ta’uk, fiar halakon tia nia dúvida hotu, fiar halo nia entrega nia an tomak iha Maromak nia liman. Maromak hadomi ema ne’ebé iha fiar ne’ebé kontente, fiar ne’e sempre iha esperansa, fiar ne’ebé iha oin-midar bele fó naroman ba ema ne’ebé hela iha nakukun laran.
Husi istória nee fó-hanoin mai ita kona ba lisaun importante balu ita aprende ita-nia viajen rasik. Primeiru, hanorin ita kona-ba importásia husi fiar ne’ebé metin bainhira hasoru susar oioin, no Maromak ne’ebé nonok, nia bolu ita atu kontinua tau fiar no tau konfiansa katak Maromak rona ita-nia tanis no halerik sira. Segundu, fo hanoin kona ba Maromak nia domin no laran-sadi’a. Maromak la julga ba ita nia differencia relijiaun judeu ka jentiu, maibe hare ba ita nia fuan no fiar ne’ebé lolos.
Ikus mai, istória ne'e hatudu katak importante tebes atu hatudu haraik-an hodi hakbesik ba Maromak. Haraik-an loke ita nia fuan atu bele simu Maromak nia bénsaun sira no ajuda ita atu hatene katak ita hanoin de'it kona-ba Na’i kuandu ita rekoñese katak ita la iha folin .
Mai ita haburas hahalok haraik-an iha Maromak nia oin. La iha ema ida-ne'ebé foti-an mak bele hamriik iha Maromak nia oin. Kuandu ita hatudu haraik-an liután, ita rekoñese liután Maromak no haraik-an liután, ita rekoñese liu tán ita-nia an, no ita komprende liu tán ita-nia an katak ita la iha buat ida no ita mesak la bele halo buat hotu. Nune’e Maromak mesak de'it mak bele halo buat ne'ebé furak iha ita ida-idak nia moris.
Reflesaun Husi: Irmã Zelina Mendonça, OP
0 comments:
Post a Comment