“IDA NE’E, HA’U NIA OAN DOBEN TEBES, NE’EBÉ HA’U HADOMI. IMI RONA NIA BA.”

 

                  FESTA TRANSFIGURASAUN NA’I JESUS NIAN

              1a. Leitura: Dan. 7:9-10, 13-14

              2a. Leitura: 2 Pe. 1:16-19

                                  Evangelho: Mt. 17:1-9

 

      Maluk doben sira mak Christ hadomi. Ohin ita selebra Festa Transfigurasaun Na’i Jesus nian. Iha Evangelho ohin nian Saun Mateus haktuir mai  ita katak Jesus lori Pedro, Tiago ho João sae ba foho Tabor atu halo orasaun. Iha Biblia, foho ne’e representa pontu reuniaun nian ida ho Maromak. Tan ne’e iha foho tutun momentu ne’ebe Jesus reza hela Jesus transforma ou transfigure an, Nia roupa sai mutin hanesan jelu-rahun.

       Iha transfigurasaun, tamba sa mak Moises ho Elias iha neba? Moses ho Elias sira nee mak naran koñesidu iha Antigo Testamentu. Moses representa lei, Elias representa Profeita sira. Iha momentu transfiguasaun Aman Maromak hatudu Nia-an ho sira iha foho tutun Tabor. Maromak hatete katak Jesus mak Nia oan, Na’i revela Oan-Mane nia identidade lolós núdar Maromak Oan ida be fo sasin lei no profeita sira, ne’ebé simboliza husi prezensa Moises no Elias nian. Jesus hatudu nia-an núdar Maromak-Oan ba nia Escolante sira.

      Jesus nakfilak an ba Mane-Maksoin no Aman Lalehan dehan “ida ne’e, Ha’u nia Oan doben tebes, ne’ebe Ha’u tau domin. Imi rona Nia ba.” Rona maka attitude domin nian, rona attitude fundamental fiar sarani nian, rona halo ita sai ema haraik an iha Maromak nia futar oin, atu ita halo tuir Maromak nia hakarak sira. Rona hodi rekonhece katak ita ema sala nain, atu bele hakbesik an ba Jesus hodi husu perdua ba ita nia sala sira. Fo ita nia an rona ba Na’i hamutuk ho Nia tama iha Kalohan kontempla, medita no reflete Na’I nia grasa sira atu ita senti Maromak nia domin mai ita. Wainhira ita senti Na’i Nia domin hela hamutuk ho ita momentu ne’e ita senti paz iha fuan, ida nee mak transforma troka ita nia an atu lao sees husi sala nakukun nian hodi lao tuir dalan naroman Jesus nian.

      Oinsa mak ita hasoru Maromak iha ita-nia moris? Husi minute balu fo tempo hodi lao ba foho hodi halo encontru ho Maromak. Ita hasoru Maromak liu husi orasaun. Liu husi orasaun troka ita nia moris,  waihira ita hela ho orasaun lori mai ita kura Spiritu nian; isin no klamar. Tamba ne’e iha momentu nebe ita senti fraku  reza atu ita nia hodi transforma sai forsa liu, ita bele senti Naroman nabilar Espiritu Santo nian. No ita presiza transfigura ita nia an, hodi fo naromak ba ita nia an rasik no ba ema seluk. Ho ida ne’e mak ita bele RONA Aman Maromak nia lian, lian ida be dehan “rona Nia ba”. Mai ita rona no halo Sakrifísiu hodi lao tuir Jesus.

     

Reflesaun Husi: Irmã Zelina Mendonça,OP