‘’EMA NE’EBÉ LAKON NIA MORIS TAMBA HAU SEI HETAN FALI NIA’’

 DOMINGO XXII TEMPU BAIBAIN

1a. Leitura: Jer. 20:7-9

2a. Leitura: Rom. 12:1-2

Evangelho:  Mat. 16:21-27

 

Nudar saseluk Kristo nian, ita hotu-hotu iha knar atu moris no banati tuir Jesus nia lalaok ne’ebé husik hela mai ita. Tuir dalan Kristo nian, ita mos pronto atu sacrifica an hodi husik buat hotu, leba ita nia krus lao tuir Nia.

Evangelio ba Domingo Commun dala XXII nian, lori ita ba reflete klean liu tan kona ba dalan oinsa atu hetan moris lolos, moris nebee Cristo rasik hakarak fo mai ita. Ita hotu hatene katak moris tuir Jesus ne laos dalan nebee nakonu deit ho aifunan rosas maibe ita mos tenki realiza katak aifunan rosas mos iha nia tarak barak ne’ebé dalaruma sai obstáculo mai ita. São Pedro depois de professa nia fiar iha Jesus katak: “Ita boot mak Kristu (Mesias), Maromak moris nia oan”(Mt. 16:16) falha atu realiza katak dalan ba Salvasaun ne’ebé Jesus lori mai ita tenki liu husi terus no mate.

Segredu no dalan ba sucesso nunka halai sees husi obstáculos, terus, desafius, decepção no falhanços. Ita ida-idak iha experencia moris ne’ebé dalaruma halo ita hakarak atu give up ho mehi ne’ebé ita iha; tan ita lakoi atu simu realidade ne’ebé menciona ona iha leten. Iha ita nia servico pastoral no missaun, ita mos hasoru desafius no critica husi maluk seluk, no dalawain ita reclama no lakoi atu simu tan ita prefere atu moris nee saudavel deit.

Jesus iha Evangelio ohin fo hanoin mai ita katak: ema ne’ebé hakarak tuir Ha’u karik, nia sei hewai nia an rasik, sei lori nia Krus hodi tuir Ha’u. Tan ema ne’ebé hakarak soi nia moris sei lakon moris nee; maibe ema ne’ebé lakon nia moris tamba Ha’u sei hetan fali nia (Mat 16:24-26).

Pergunta ne’ebé ita bele husu ba ita nia an mak nee:

1.      Ha’u pronto atu duni atu hewai an hodi tuir Jesus?

2.      Ha’u pronto atu sascrifica an no leba hau nia Krus hodi tuir Nia?

3.      Ha’u nia Krus mak sa?

4.      Obstáculos saida mak sai bloco mai hau iha hau nia dalan ba tuir Jesus?

5.      Saida mak bele haforsa ha’u iha ha’u nia evangelisaun?

Ita harohan atu ho grasa Nai ninian, ita hotu bele aten brani nafatin atu lao ba oin hodi descobre liu tan saida mak Maromak nia hakarak mai ita.

Bom Domingo ba ita hotu!

 

Reflesaun Husi: 

Ir. Leonarda Da C. Evangelista, OP