Sai sinal ida ba ksolok lolos nian

 

SOLENIDADE DA EPIFANIA DO SENHOR

 

1^a Leitura: Isaias 60:1-6

2^a Leitura: Efesu 3:2-3a.5-6

Evanjelho: Mateus 2:1-12

 

Maun-alin, sarani doben sira; ohin Santa creda celebra solenidade Epifania Na’I nian; Jesus nia revela-an mai iha mundo, liu husi bibi atan, liurai no magia sira mak ksolok no dame nia hun mai iha mundo ida ne’e. sai momenu especial ida mak ita celebra iha festa Natal nian, parte husi Jesus nia prejensa iha mundo mak salvasaun hodi salva ema hotu. Jesus ninia Incarnasaun “Maromak nia Oan Mane mesak moris husi nia inan Virgin Maria.

Iha solenidade ida ne’e, Jesus bolu ita hotu no fo hanoin mai ita Maromak revela ninia an, moris hanesan ema kiak hodi hatudu Nia deseju lolos katak Nia mak sasan hotu nia nain, kriasaun hotu sei hetan salvasaun iha Nia deit.

Husi eventu inportante “Solenidade Epifania do Senhor” Maromak manifesta nia-an mai iha mundo liu husi Nia oan Jesus, ohin magia nain tolu ne’ebé mai husi fatin dook ba vijita Belem.

Matenek boot nain tolu ne’e lao tuir deit sinal ka fitun ne’ebe sira hetan,mai duni iha fatin Jesus moris ba. Maske fatin dook maibe sira des araska too duni iha fatin refere hodi hare mane maksoin lori dame no domin mai iha mundo. sinal liu husi fitun ne’ebe sira rasik hare ho matan.Ohin Maromak hatudu ninia oan mane mesak Jesus Cristo iha ita nia relasaun pessoal sira, kesi metin iha domin Maromak nian ho ita iha mundo.

 Profeta Isaias koalia mai ita nia liafuan domin,esperansa no ksolok. Natividade Jesus nian iha balada sira nia hela fatin no bibi atan sira mak hare uluk. Atitude simples ne’e fo hanoin bebeik no fo hanaoin nafatin mai ita katak; moris kiak iha fatin kiak laos bareira ka “hambatan” ba moris rohan laek.

 Hanesan sarani fiar nain buka hadomi malu, tulun malu, buka moris iha dame laran, lori malu ba dalan diak no respeita malu tuir doutrina sarani nian. Lisaun diak mai ita atu aprende mak exemplo husi Magia nain tolu nia attitude; lao husi fatin dook, la sente kolen no iha esperansa katak sinal ne’ebé mak sira hare sei hatudu buat ruma diferente ba sira nia moris, laos presente ne’ebé sira lori mak iha folin liu, maibe dejeju atu hatene lolos sinal ne’e katak sa? Ikus mai sira mai too duni iha fatin hodi hare Jesus.

 Perseveransa iha ita nia moris lor-loron ne’e importante tebes. hanesan ema ita fraku no kolen lalais deit bainhira buka buat ne’ebé ita hakarak ou harohan ba ita nia intensaun sira sei kleur atu hetan, ita komesa dehan kolen no baruk tamba lori tempu naruk mak sei hetan nia rejultadu.

 Moris ohin loron hakarak buat hotu instant dalaruma mos ita obriga Maromak atu tuir ita nia hakarak, haluha tiha prejente furak liu iha mundo mak ita nia vida rasik ne’ebé mak sai sinal domin ba moris rohan laek nian.

Jesus kosok oan nia moris simples tebes, iha celebrasaun Epifania halo ita iha unidade ho familia Maromak nian, sai hanesan familia Nazare, hasai tiha bareira ita ema nian atu ita bele hakbesik liu tan ba Maromak fo fuan cristaun nian ida ne’e mak objective husi celebrasaun ohin nian.

Igreja Misionaria ho nia misaun atu lori Cristo ba mundo tomak, bibi atan sira reprejenta moris kiak no ignoransia, magia sira reprejenta fiar nain no intellectual sira. Ita hotu hola parte iha prejensa Jesus nian ne’ebe lori salvasaun mai iha mundo hodi recunhese katak Jesus mak Maromak oan no liurai los nian.

    Mai ita refleta hamutuk significa husi epifania:

1             Epifania bolu ita atu hamenus tiha ita nia dúvidas sira kona ba ita nia fiar sarani nian

2.               Epifania chamada ida mai ita atu oferese prejente furak sira, tulun ema seluk liu husi attitude no hanoin diak sira ne’e mak ita iha hanesan magia nain tolu ne’ebe ohin lori sira nia prejente: Aiben morin /Divinidade, Osan mean/liurai no Naan horun/ paisaun no mate.

3.                   Epifania maneira ida atu lori ita ba dalan evajelisador/a nian

4.                 Lisaun husi Magia sira; foti matan hateke ba fitun hodi rona sira nia fuan.

Mai ita hotu buka moris ho dame no domin hodi sente mundo ida ne’e nia furak, sente kosok oan ne’ebé mai moris ona iha ita leet. Dame, Unidade no paz ne’ebé ita labele hola ho ita nia osan no ita nia kapasidade rasik mak; “dame ne’ebé Jesus fo mai ita”.

Perguntas mak ne’e ita prontu ka soi duni ba dame ne’e ka lae? Ida ne’e fila fali ba ita ida idak nian an hanesan sarani fiar nain. Maromak nafatin konvida ita hotu atu sai ninian oan doben. Amen.

Reflesaun Husi:

Irmã Sabina Martins Mota,OP