“Lalehan ho rai sei liu tiha, maibé Ha’u nia liafuan sei la liu."

                                                         

                                                       Domingu XXXIII Tempu Baibain

1a. Leitura:Dan. 12:1-3

2a. Leitura:Heb. 10:11-14-18

Evanjelho: Mk. 13:24-32

Maluk doben sira mak Kristu hadomi!

    Liturjia tempu bain -  bain nian besik remata ona no Maromak nia futar lia hateten mai ita kona ba tempu ne’ebé sei husik no tempu nebe sei mai. Bainhira Jesus Nazaré mai hola isin hanesan ema atu lori mudansa ba ita nia moris nebe laos iha mundu nee deit  maibe hanoin ba ita nia moris rohan laek. Ema matenek sira ne’ebé ita rona iha evanjellu iha tempu Natal, matenek nain tolu ne’ebé mai husi parte Leste lao tuir fitun hanoin hela Messias ida ne’ebé mai nee hanoin kona ba mundu nia rohan no wainhira Nia iha ona ema nia leet sira sei hanoin Joao Baptista mak Messias karik.

    Saun Markus Evanjelista fo sai sasin katak Jesus fahe ninia vizaun ba dixipulu sira kona ba akontesimentu sira ne’ebé sei akontese iha mundu, wainhira Jesus dehan Hau tenke liu iha Jerusalem hasoru terus mate no moris hias, dixipulu sira hanoin ona katak sira nia mundu sei hotu ona preokupa hodi hanoin saida mak sei akontese?

    Dala ruma ita rona belun sira nia halerik katak hau nia mundu hotu ona! Wainhira labarik  feto adolosente  ida  dehan hau nia mundu hotu ona tamba nia doben lao ho feto seluk fali  nee hanoin nia mundu remata ona ho ida nee. Liafuan sira nee sai wainhira ita hasoru susar ka terus ruma ne’ebé enfrenta hela no ita hateten ho matawen nakonu. Nudar ema ita hakaas an ne’ebé laiha kbiit atu hasoru Maromak nia hanoin no hakaas an nafatin maske moris nee tenke kontinua ba oin.

    Nudar ema sarani no fiar nain ita ema sarani iha vantajem boot  atu hasoru pergunta oin oin ne’ebé mosu iha ita nia moris tamba husi ita nia preokupasaun ba problema sira ita iha “Esperansa” , esperansa tan buat ne’ebé Jesus Kristu halo ona ba ita, basa Jesus rasik dehan mai ita kona ba esperansa no vizaun ida ba Vitoria ikus nian (Apokalipse saun João ).

    Fiar no esperansa sei lori ita ba moris perfeitu. Fiar  fo razaun ne’ebé perfeitu fiar mak hanoin nebe los no esperansa  bele halo ita nia hakarak sai perfeitu esperansa mak dejezu ida  atu bele hetan moris rohan laek iha lalehan. Nudar ema ita nain rasik lahatene saida mak akontese iha future. Moris actual  agora dadaun nee mak prezente furak liu ne’ebé Maromak fo mai ita, prezente ne’ebé ita hetan hodi forma ita nia destinu iha nee no agora, Maromak fo ona mai ita iha nee no ba oin nee mak folin boot liu.

    Mai ita hili dalan no moris ne’ebé laran metin no fo bensaun no lori bensaun Maromak nia mai ita hotu. Basá Maromak hateten mai ita halo buat nebe diak, diak no laran metin!

Reflesaun Husi: Irmã Lucia do Carmo, OP