RONA NO HALO TUIR SAIDA MAKA NIA DEHAN

 

DOMINGO BA DALA II TEMPU BAIBAIN NIAN

Primeira Leitura: Isaiah 62:1-5

Segunda Leitura: 1 Cor 12:4-11

Evangelho: Jo. 2:1-11

 

   Evangelho ohin nian hanorin mai ita lisaun importante haat maka hanesan tuir mai ne’e: Jesus nia inan Virgen Maria dehan ba Jesus katak “sira nia tua hotu ona”, Jesus dehan “hau nia loron ladauk too”, Virgen Maria hatete ema sira dehan “imi sei halo tuir buat nebe nia haruka”, Jesus dehan “imi tau be’e ba kusi sira ne’e to’o nakonu”

Lisaun ha’at ne’ebé maka refere iha leten ne’e dala barak akontese iha ita nia moris lor- loron. Ita nu’udar humanu, tan ita nia limitasaun, dala ruma ita la rekonese Jesus nia presence iha ita nia leet, ita sei duvida ba ninia milagre sira ne’ebé mak Nia halo tamba ita preokupa demais saida mak akontese iha ita nia moris.

 Ita hotu hatene katak ita nia mundu agora dadauk mosu problema oin oin hanesan: Pandemia, funu, hamlaha, desatre naturais etc. Ho rasaun ida ne’e ita la iha tempo hodi rona saida mak Nai hatete mai ita.  Maibe evangelho ohin nian Jesus fo hanoin ita katak ense fali kusi ne’ebé mamuk ho fiar no esperansa tomak ba Nia, no mos fo hanoin mai ita katak Ninia tempo seidauk to’o nebe ita hein deit Nia.

Wainhira tempu to’o ona Nia bele halo milagre, nune’e ita tenke ho pasensia hodi hein, hametin fiar no haboot esperansa tomak ba Nia. Mai ita hamriik hamutuk fo forsa ba malu, iha  solidaridade, fiar metin ba Nia, nakonu ho esperansa hodi hein Ninia milagre sira.

 

Reflesaun Husi: Irmã Felizarde Santos, OP

 

 

 

 

 

Kontinua Le'e

NAI JESUS NIA BATISMO

 

FESTA DO BATISMO DO SENHOR

 

1a. Leitura: Is 40:1-5,9-11

2a. Leitura: Tit. 2:11-14;3:4-7

Evangelho: Lk. 3:15-16,21-22

                       

                         Ohin ita celebra Festa Nai Jesus nia Batismo. Ita bele hare iha leitura sira, liu-liu iha segunda leirura no Evangelho ohin nian, koalia kona ba Jesus nia Batismo. Iha segunda leitura Saun Pedro foo testemunho no koalia kona ba Jesus nia Batismo ne’ebé João Batista hala’o, ba ema sira nebe halibur hamutuk iha Cornelio nia uma no oinsa Aman Maromak haraik ba Jesus nia Oan Doben, Nia Espirito Santo no Kbiit. Evangelho koalia kona ba Jesus nia Batismo ne’ebé hala’o hosi João Baptista.

                        Ho Nai Jesus nia Batismo, atu dehan katak ohin remata ona tempo Natal nian. Jesus nia batismo ita celebra nudar festa boot tamba iha nee maka Aman Maromak, Oan Maromak no Espirito Santo Maromak, hatudo an ba publico. Momento Baptismo nian, lalehan no rai sai hamutuk. Lalehan nakloke  no Nai Espirito Santo tu’un ba Jesus no ita rona Aman Maromak nia lian, nee Hau nia Nia Oan Doben.

                       Hanesan ita hare, saun João nia batismo ba ema ne’ebé hakribi sala, nee katak ba ema nebe sala nain. Tamba ne’e saun João lakohi atu sarani Jesus, tamba Nia hatene katak Nai Jesus Maromak Oan. Tamba ne’e mak Nia sempre dehan, nia sarani deit ho we maibe Jesus sei sarani ema ho kbiit Espirito Santo nian. Maibe, iha nee, Jesus husu ba saun João, atu sarania Nia,  tamba Nai Jesus henesan mos ita ema criatura, sala mak lae. Momento Jesus sarani mak rona lian hosi Aman Maromak, ne’e mak Hau Nia oan Doben.

                      Iha fe, ita fiar katak wainhira ita sarani, ita sai mos Maromak nia oan. Ita sai Jesus nia maun-alin tamba batismo. Jesus mai iha mundo atu soi ita liu hosi batismo. Ne’e duni ho batismo, Nai Jesus loke odematan salvacão nian ba ita.

                    Nai Jesus mai mundo tamba Aman Maromak hadomi ita. Tamba ne’e mak hosi batismo ita sai Aman Maromak nia oan. Aman Maromak nunca husik ita, Nia hadomi ita maski ita ema sala nain. Aman Maromak hakarak ita nia salvacão, hakarak atu ita fila ba moris rohan laek nian.

                        Ohin, ita hanoin mos iha loron nebe ita sarani. Karik ita sarani wainhira ita sei kiik no ita la hatene, maibe ita nia Aman – Inan lori ita ba sarani no ita sai Maromak nia oan. Tamba nee ita agradece ba ita nia Aman no Inan tamba graça nee. Ita agradece ba ita nia Aman – Inan tamba favor boot ida nee, halo ita sai Maromak nia oan. Ita reza atu ita metin nafatin iha fiar hanesan Maromak oan. Ita reza mos ba sarani sira hotu atu metin nafatin iha fiar liu hosi batismo. Amen.

 

Reflesaun Husi: Irmã Rosaria Aurea Ximenes, OP

 

 

 

 

 

Kontinua Le'e

BUKA ROMAN BA ITA NIA DALAN ATU HALAKAN MUNDU

SOLENIDADE DA EPIFANIA DO SENHOR

1ª. Leitura: Isaías 60:1-6

2a. Leitura: Efesu 3:2-3a, 5-6

Evanjelho: Mt 2: 1-12

 

    Iha leituras husi solenidade  Epifania nian ohin loron, primeira no segunda leitura to’o mai Evangelho, sira nain tolu fo koneksaun ida ne’ebé furak teb-tebes.

   Profeta Isaías, fanun ita husi ita nia toba no hader husi nakukun hodi simu naroman, loke ita nia matan atu halo buat ruma ne’ebé necesario troka ita nia fuan no ita nia moris atu hala’o  Nai nia Gloria, naroman lakan no nabilan liu husi  atitude no hahalok lor- loron nian iha ita nia comunidade, familia, sociedade no ema sira nebe hale’u ita lor-loron. 

   Segunda leitura, iha pontu rua ne’ebé tema Epifani hatudu mai ita: primeiro Nai Maromak hatudu nia An mai ita liu husi Jesus Cristo no  segundu Salvasaun Cristo nian oferece ba ita hot- hotu. S. Paulo considera nia an hanesan Apostolo ida haktuir nune’e: “graça be maromak haraik mai hau, ba imi nia diak Maromak hatudu, hau hatene Cristo nia misterio ida nee” Entaun liu husi misterio ida Sao Paulo hateten mai ita nune’e, nia fiar katak liu husi Jesus Nai Maromak mai ba ita hotu hotu la’os ba Judeu sira deit maibe ba ema hotu iha mundu tomak.

    Evangelho ohin hato’o mai ita kona ba, presenja ita nia Nai nian  iha mundu, utiliza ita hanesan Epifania, ne’ebé lori naroman atu motiva ema hotu atu lori ita nia fuan ba Maromak. Ita hotu sei hasoru naroman “Epifania” iha ita nia moris ne’ebé konkretu iha situasaun no cultura ne’ebé forma Cristo nia presenja iha ita nia situasaun saida deit.  

 

Reflesaun Husi: Irmã Cacilda  Fatima, OP

 

 

 

Kontinua Le'e

MAROMAK DEIT HAKSOLOK TAMBA ITA!

 TERCEIRO DOMINGO DO ADVENTO

1a. Leitura: Zep. 3:14-18a

2a. Leitura: Fili. 4:4-7

Evanjelho: Lk. 3:10-18

    Peregrinação spiritual ba terceiro Domingo Advento nian . Lilin ho kor rosas iha sirculo advento nian halakan ona hodi hatudu katak ita hotu tama ona ba tempo kmanek ida, ne’e mak periodo Gaudete ou haksolok. Saida mak acontece iha periodo ksolok ne’e? tamba mos natal besik ona dadaun, tamba ne’e, ita sei hetan tulun atu nakloke an liutan hodi soin ba hasoru Jesus Cristo nia moris. Iha periodo ida ne’e, ita  sei hakribit salan hotu ho loloos, tuir misa no simu comunhão spiritual no halao hahalok caridade nian. Loos duni katak atividade spiritual hirak ne’e ita halao nakonu ho ksolok atu ita mos bele sente Maromak ninia ksolok. Ksolok sai perfeito tamba hakribit salan, nebé haklaken husi João baptista.

   Leitura sira loron oihn nian lori ita atu compreende katak “Maromak mak ksolok nia hun no ksolok ne’e mos mak ita tenki  fahe ba ema seluk”. Sofonias Ninia profecia sira kona ba moris rohan laek husi Maromak ba povo Israel sai duni magnificat ksolok nian tamba Maromak hamutuk nafatin ho ninia povo. Nia Liurai nebé ukun buat hotu. Ho razão kona ba ksolok iha fuan husi povo Israel tamba Maromak hases tiha sanção nebé hatun ona ba ninia povo. Israel ninia funu balun sira lakon hotu tamba Maromak nia kbiit. Maromak sempre presente iha ninia povo nia leet tamba ne’e sira la tauk ba funu balun no inimigo sira. Ida ne’e mak lia menon ksolok nian nebé hakbiit tebes povo Israel sira ninia fuan iha tempo sira terus iha Babilonia.

   Evangelista Lucas apresenta figura João Baptista. Nia mai atu haklaken kona ba conversão ba ema hotu atu nune’e soin ba simu Mesias nebé mai. Ema hotu nebé rona lia haklaken ne’e fahe ba grupo balun, no hodi temi pergunta nebé hanesan, sira iha comitmento liu ba hakribit salan. Sira mak sociedade social (civil society) nebé dominante liu, cobrador osan sira nebé sai figura publico iha contexto justica no ba servidor ba estado nebé ukun povo.

   Grupo primeiro, ema barak (comum). Sira husu: “se hanesan ne’e, saida mak ami tenki halo?” (Luc 3;10). João fo hanoin sira atu aten barani hodi fahe, laran domin nain ba ema seluk. wainhira ema bele fahe então ksolok sai ema nia soin. Nia dehan :“ema nebe iha hatais tahan rua, fahe ho maluk nebe laiha; no ema nebe iha aihan, halo mos nune’e.” (Luc 3:11).

    Segundo grupo, cobrador osan sira. Sira husu: “mestre, saida mak ami tenki halo?” (Luc 3:12). João hatan  hanesan mestre nebé hanorin dalan diak atu hasoru ho Maromak. João fo hanoin sira atu hamoris justiça no laran mos ba Maromak no maun alin sira. Nia dehan imi keta husu impostu, liu ida nebe estado haruka.” (Luc 3;13). Ema nebé haksolok ne’e ema nebé halao justiça ba maun alin sira.

   Terceiro grupo, ukun nain sira. Sira husu. “no ami, saida mak ami tenki halo?” João hatan, “keta hanehan ema no keta duumatak simu deit ho laran imi nia kolen.” (Luc 3;14). Ema nebé haksolok bele disciplina, justo no fiel iha ninia moris.

Mensagem ksolok João Baptista nian halo ema barak loke fuan atu hakribit salan. Sira pronto atu simu baptismo husi bee. Iha biban nebé hanesan João Baptista dehan Mesias mak Jesus Cristo nebé sei fo baptismu ho Espírito Santo no ahi. Nia mak iha kbiit liu hodi hasanto ema.

    Liafuan Maromak nian iha semana datoluk Advento nian ne’e, haforça ita hotu. Mai ita hakribit salan, mai ita harii amizade ida nebé perfeito hodi nakloke ba malun, sai ema nebé justo no real, respeita direitos humanos. Ho nune’e ksolok rohan laek laos deit hanesan historia ida maibé loloos duni katak ema hotu bele sente. Maromak deit mos haksolok ho ema, tamba sa mak susar tebes atu haksolok ho ita ninia maluk?

 

Reflesaun Husi: Irmã Gragiela do nascimento, OP

Kontinua Le'e

Prepara an no fila ba dalan los

 

Segundo Domingo do Advento

Primeira Leitura: Bar 5:1-9

segunda Leitura: Fil. 1:4-6,8:11

Evanjelho: Lk 3:1-6

          Adventu mak tempo nebe atu prepara ita ba dalan los, katak; muda ita nia hanoin no hahalok at hotu, maske konaba Maromak, no ba ita nia maluk sira. Adventu fo hanoin mai ita konaba buat barak iha ita nia neon ho laran nebe teri netik dalan ba ida nebe atu mai soy ita.

             Hanesan mos iha Evangelho Domingu ohin nian, Saun Lukas fo hanoin mai ita konaba João Batista fo hatene ba ema hotu atu hakribi salan, hodi hetan perdua, nudar profeta Isaias hakerek ona iha Eskritura, dehan: “Lian ida mai husi rai fuik maran dehan; Hadia Nai nia dalan. Hamos Nai nia dalan inuk, Taka rai klean hotu. Hatun foho tomak, aas no badak. Dalan kleuk sei los, dalan att sei tetuk hotu hafoin kriatura tomak sei hare Maromak nia Maksoyn.”

Ne’e duni, ho lian nebe ita rona iha Evangelho Domingu ohin nian, fo hanoin fali mai ita hotu katak atu prepara ita nia ann, hadia ita nia moris, hametin ita nia fiar ba Maromak, hadok ann husi dalan nebe atu lori ita ba nakukun laran, hadok ann husi problemas sira nebe mak mosu iha ita nia rai laran no atu simu malun nudar maun alin iha ita nia familia uma laran nian. Atu nune, ita bele iha domin no damen, kbit no forsa hodi hein ita nia Maksoyn nebe atu mai hela ho ita iha mundu ida nee.

Dala barak, ita la preokupa ba lian ne'ebe ita rona atu prepara ita nia ann, maibe ita preokupa liu ba ema seluk nia moris, ita preokupa liu ba ema seluk nia problemas no ita preokupa liu ba ema seluk ninia frakeza. Maibe ita la deskobre didiak ita nia ann hanesan ema maksalak. Tamba ida ne’e, mak iha segundu Domingu Adventu ida ne’e fo hanoin fali mai ita atu prepara ita nia ann didiak ba Dalan nebe los.

 

Reflesaun Husi: 

Irma Isabel dos Santos Gomes, OP 

Kontinua Le'e