NAI JESUS NIA BATISMO

 

FESTA DO BATISMO DO SENHOR

 

1a. Leitura: Is 40:1-5,9-11

2a. Leitura: Tit. 2:11-14;3:4-7

Evangelho: Lk. 3:15-16,21-22

                       

                         Ohin ita celebra Festa Nai Jesus nia Batismo. Ita bele hare iha leitura sira, liu-liu iha segunda leirura no Evangelho ohin nian, koalia kona ba Jesus nia Batismo. Iha segunda leitura Saun Pedro foo testemunho no koalia kona ba Jesus nia Batismo ne’ebé João Batista hala’o, ba ema sira nebe halibur hamutuk iha Cornelio nia uma no oinsa Aman Maromak haraik ba Jesus nia Oan Doben, Nia Espirito Santo no Kbiit. Evangelho koalia kona ba Jesus nia Batismo ne’ebé hala’o hosi João Baptista.

                        Ho Nai Jesus nia Batismo, atu dehan katak ohin remata ona tempo Natal nian. Jesus nia batismo ita celebra nudar festa boot tamba iha nee maka Aman Maromak, Oan Maromak no Espirito Santo Maromak, hatudo an ba publico. Momento Baptismo nian, lalehan no rai sai hamutuk. Lalehan nakloke  no Nai Espirito Santo tu’un ba Jesus no ita rona Aman Maromak nia lian, nee Hau nia Nia Oan Doben.

                       Hanesan ita hare, saun João nia batismo ba ema ne’ebé hakribi sala, nee katak ba ema nebe sala nain. Tamba ne’e saun João lakohi atu sarani Jesus, tamba Nia hatene katak Nai Jesus Maromak Oan. Tamba ne’e mak Nia sempre dehan, nia sarani deit ho we maibe Jesus sei sarani ema ho kbiit Espirito Santo nian. Maibe, iha nee, Jesus husu ba saun João, atu sarania Nia,  tamba Nai Jesus henesan mos ita ema criatura, sala mak lae. Momento Jesus sarani mak rona lian hosi Aman Maromak, ne’e mak Hau Nia oan Doben.

                      Iha fe, ita fiar katak wainhira ita sarani, ita sai mos Maromak nia oan. Ita sai Jesus nia maun-alin tamba batismo. Jesus mai iha mundo atu soi ita liu hosi batismo. Ne’e duni ho batismo, Nai Jesus loke odematan salvacão nian ba ita.

                    Nai Jesus mai mundo tamba Aman Maromak hadomi ita. Tamba ne’e mak hosi batismo ita sai Aman Maromak nia oan. Aman Maromak nunca husik ita, Nia hadomi ita maski ita ema sala nain. Aman Maromak hakarak ita nia salvacão, hakarak atu ita fila ba moris rohan laek nian.

                        Ohin, ita hanoin mos iha loron nebe ita sarani. Karik ita sarani wainhira ita sei kiik no ita la hatene, maibe ita nia Aman – Inan lori ita ba sarani no ita sai Maromak nia oan. Tamba nee ita agradece ba ita nia Aman no Inan tamba graça nee. Ita agradece ba ita nia Aman – Inan tamba favor boot ida nee, halo ita sai Maromak nia oan. Ita reza atu ita metin nafatin iha fiar hanesan Maromak oan. Ita reza mos ba sarani sira hotu atu metin nafatin iha fiar liu hosi batismo. Amen.

 

Reflesaun Husi: Irmã Rosaria Aurea Ximenes, OP