SE MAK RAHUN DIAK SIRA?

 

 

DOMINGO BA DALA VI TEMPU BAIBAIN NIAN

1a. Leitura: Jer. 17:5-8

2a. Leitura: 1Cor 15:12,16-20

Evangelho: Lk 6:17, 20-26

 

  Evangelho ohin loron nia Jesus hanorin lia rahun diak nian ba nia escolante sira iha rai tetuk ida. Iha episodio ida ne’e Jesus  encoraja ao mesmo tempo desafia ba ita hotu ne’ebé la’o tuir Cristo.

    Primeiro, iha nia hanorin, Jesus encoraja ba hirak nebe kiak, hamlaha, tanis no hirak ne’ebé hetan terus no desafios oi-oin tanba sira nia fiar iha Maromak. Jesus encoraja atu labele desistir, moris sei la nafatin hanesan ne’e basa, Jesus dehan: rahun diak ba sira ne’ebé ohin kiak, hamlaha, tanis no hirak ne’ebé hetan terus no desafios oin oin  tanba Hau nia naran, basá Maromak nia reino sira nian, no sira sei haksolok iha Hau. Tuir mai, Jesus mos desafia ba sira nebe, ohin loron riku, hamnasa, bem alimentada no hetan admirasaun husi ema. Susar ba ema hirak nee atu hetan grasa rahun diak.

    Tuir hau nia fiar iha Maromak nebe Domin nain, Jesus la’os la hadomi ou rejeita ema hirak ne’ebé riku, hamnasa, no hadomi deit ida nebe kiak, tanis nst… maibe Jesus convida ita hotu  atu reflete kona ba perseverança iha Fiar. Ita nia fidelidade ba Nia iha circuntancias hotu.

    Iha esperensia moris, dala barak ema kiak sira depende a’an ba Maromak, tanba sira nia kbiit la natoon atu tau dependensia ba sira a’an.  Sira nia kbiit no força hetan iha Maromak. Maibe ba ema hirak nebe riku, hamnasa, bem alimentada nst, Ema hirak ne’e dala barak iha tendesia fiar iha sira nia a’an liu, iha sira nia conqista poder do mundo.  Riku soin mundo nia dala barak hamonu ita nia fiar, no haboot ita nia arogansia no poder. Nune’e Jesus atu fo hanoin mai ita hotu atu manten ita nia fiar iha Nia, mesmo que ho buat kiik no simplis deit.

     Hanesan iha primeira leitura ohin nia, profeta Jeremias dehan mai ita kona ba forsa fiar nia iha Maromak nebe halo ita buras no matak nafatin iha vida spiritual no fisica, Rahun diak ba ema nebe tau  laran ba Nai, ema nebe laran metin ho Nai nudar ai-hun kuda besik we ninin, nia soe abut too mota laran, nia sei la tauk loron manas, nia tahan sei buras matak nafatin.  Iha momento ne’ebé o kbi’it laek, ou iha momento nebe o iha poder bot, importante liu nee mak preservar ida nia fiar no fidelidade ba Maromak nia diak, “ Rahun Diak ba  atan fiel sira Nee” iha evangelho Mat.Jesus esclarese mai ita kona ba atan nebe diak no fiel "O senhor respondeu: 'Muito bem, servo bom e fiel! Você foi fiel no pouco, eu o porei sobre o muito. Venha e participe da alegria do seu senhor!' (Matt. 25:21).

    Ksolok lolos ne’e nakloke ba ema hotu nebe fiel ba Maromak, hamtauk, hakruuk ba Nia, e nakloke ba Maromak nia grandeza, iha tempo hotu, iha loron ne’ebé o kiak, no iha loron ne’ebé o riku. Iha loron ne’ebé o hamnasa no iha loron ne’ebé o tanis. Hanesan hare iha natar, wainhira nia isin nakonu ona no kor nabilan hanesan osan mean, nia comesa hakruuk ba loron matan no lalehan.  Reconhesimento ba nia Nain. Fiel nafain ba Nia grandeza ne’ebé fo isin diak hanesan hare. Haraik a’an, ba Nai nia diak tomak!

    Ita hotu merese atu hetan graça rahun diak Nian husi Maromak. Graça ksolok ne’e disponível mai ita hotu. Jesus nia mensajem husu ita atu  reflete iha ita nia moris, Hau ne’e ema ida ne’ebé terus tanba fiel iha Maromak no hetan rahun diak? Ou hau ema ida ne’ebé fiel tuir condições ne’ebé hau enfrenta? Wainhira hau hasoru desafius barak iha hau nia moris tanba hau nia compromisso ba Jesus- hau sei fiel nafatin ho consecuensias sira tuir dalan Jesus nian? Ou hau desisti hau nia compromisu no fidelidade ba Maromak? Keta haluha katak, Atan nebe fiel soi Maromak nia ksolok. (Matt. 25:21)

 

Reflesaun Husi: Irmã Mariana  Dos Santos Barreto, OP

 

Kontinua Le'e

TAMA LIU BA TASI LARAN NO SOE DAI BA!

 

DOMINGO BA DALA V TEMPU BAIBAIN NIAN

1a. Leitura: Is. 6:1-2a,3-8

2a. Leitura: 1Cor. 15:1-11

Evangelho: Lk. 5:1-11

 

 “Tama liu ba tasi laran no soe dai ba!’’ (Lc.5:4). Ne’e mak mensagem nebe ita rona iha Evangelio ohin nian. Simão ho nia companeiro sira kail ona kalan tomak maibe lahetan ikan barak. Certamente, sira kolen no desanima husi sira nia servico ne’e. Nune’e, halo sira hakarak los atu descansa no lakoi tan ona atu soe dai. Ikus mai mosu carpenteiro nia oan ida nebe nunka iha esperencia kona ba kail ikan maibe Nia fo hatene ba Simão atu soe dai ba tasi, ne’e imposível tebes atu nia halo tuir, Tan Jesus foho oan no Simão tasi oan, nune’e mos karik iha Simão nia laran nia lakoi atu rona Jesus nia haruka ne’e. Maibe ho fiar boot ne’ebé Simão iha ba Nia, nia consegue rona no halo tuir Jesus nia haruka, ikus mai sira hetan duni ikan barak ne’ebé sira nunka mais imagina.

   Ohin Jesus mos koalia mai ita nune’e: “Tama liu ba tasi laran!” pergunta ba ita tanba sá Jesus dehan nune’e mai ita? Tan Jesus hatene ita hotu nia limitação, fraqueza no necessidade iha moris. Nia mos hatene ita hotu nia experiência wainhira ita hasoru desafius no dificuldades halo ita dezanima iha planu ruma ne’ebé que boot maibe la consegue atu finaliza no hetan sucesso diak. Ita sente kolen no lakoi atu koko tan. Ita hakarak buat hotu tenki sante ou relax de’it. Ita baruk atu esforço-an hodi buka maneira seluk atu atinge ita nia plano sira. Tamba ne’e, Nia hakarak atu ita tama liu tan ba tasi laran atu soe dai. Significa tama liu atu conhece didiak Nia hodi tau confiança no fiar iha Nia mak milagre no sinal sira sempre acontece.

 Jesus nia  Mensagem loron ohin nian, lori ita atu reflete iha ita nia vida Espiritual nian no mos iha ita nia kna’ar nudar misionária. Ita tenki tau iha hanoin katak Jesus nia futar liafuan sira iha kbiit boot tebes, wainhira ita rona, fiar, reflete no hodi halo tuir. Jesus hatene no conhece momos hela ita nia fraquesa hotu hanesan: “ita nia fiar nakdoko wainhira ita hasoru laloran boot no anin boot iha moris; ita desanima iha ita nia evangelização wainhira hasoru desafios; Ita lakon confiança no lakoi atu lao ba oin, nst”.

   Belun sira, keta tauk! Basá, Jesus ne’ebé bolu no hili ita sei la husik ita mesak nune’e deit, Maibe Nia bolu ita nafatin atu tama liu ba tasi laran. Iha nebá mak ita sei hetan buat ne’ebé ita nia fuan hakarak, no buat ne’ebé fo ksolok rohan laek mai ita nia moris. Fiar ba katak buat hirak ne’e mak ksolok no graça hotu nebé Maromak prepara hela mai ita ida idak tuir ita nia capacidade no necessidade.  Maski ksolok no graça hotu Nia fo mai ita ne’e gratuita de’it, maibe Nia mos hakarak ita atu colabora ho Nia. Maromak iha plano no mehi ne’ebé furak tebes mai ita ida idak, maibe ita mos tenki esforço-an hodi buka descobre Ninia hakarak ida ne’e iha ita nia moris.

    Nune’e mai ita aprende husi Simão nia atitude ne’ebé haraik an hodi halo tuir Jesus nia haruka. Ita harohan atu Nai haklean liu tan ita nia fiar atu nune’e ita mos bele sai hanesan Simão Pedro ne’ebé ho fiar tomak iha Jesus nia liafuan hodi husik buat hotu la’o tuir Nia no ikus mai pescador ikan nian transforma-an sai pescador ema hotu nian.

 

Reflesaun Husi: Irmã Leonarda da Conceição Evangelista, OP

 

Kontinua Le'e

HAMRIIK METIN HODI DEFENDE LIALOS

 

Domingo Ba dala IV Tempu Baibain Nian

1a. Leitura: Jer 1:4-5, 17-19

2a. Leitura: 1 Cor 12:31-13:13

Evangelho: Lk 4:21-30

    Primeira Leitura no Evangelho ohin nian fo hanoin mai ita kona ba ita nia vokasaun tamba, iha Primeira leitura Jesus hateten katak “molok o nia inan kous o, hau hatene nanis o, molok o nia inan hahoris o, hau hili tiha ona o, hodi halo o sai profeta rai tomak nian.” Iha Evangelho Saun Lukas haktuir katak “ema rejeita profeta ida iha ninia fatin rasik.”

    Uluk knanain, Ita nuudar Sarani Katolika, ita nia knaar maka haklaken Nain nia Evangelho ba mundu tomak liu-liu ema sira nebe mak seidauk rona. Maibe ita tenke simu ninia konsekuensia hanesan rejeita ita, hatuun ita,nst.

    Iha ita nia moris, wainhira ita koalia lia los/halo buat nebe diak, sempre iha kanek, maske ita nia ema rasik sei la simu ita no buat barak mak sei akontese ba ita maibe ita tenke hanoin katak Maromak hatene saida maka ita halo tamba nia kunhese liu ita duke ema seluk. No mos Nia fo grasa ba ita atu lori ninia liafuan diak ba mundu. Tan nee la iha kestaun nebe forte liu kona ba opozisaun tamba ita fiar katak nia sempre akompanha ita ba ne’ebé deit.

    Ikus liu, Evagelho ohin nia fo hanoin no fo korajen mai ita makaas atu kontinua la’o ba oin nafatin maske dalan ida ita hili dadauk ne la fasil no dala barak ita monu, maibe hamriik fila fali no kaer metin nia liafuan katak “keta tauk haw sei akompanha o iha ne’ebé deit”

 

Reflesaun Husi: Irmã Felizarde dos Santos, OP

 

 

 

Kontinua Le'e

HAKLAKEN MAROMAK NIA LIAFUAN LIU HUSI ITA NIA MORIS LOR-LORON

 

DOMINGO BA DALA III TEMPU BAIBAIN NIAN

 

1a. Leitura: Ne. 8:2-4a,5-6,8-10

2a. Leitura: 1Cor. 12:12-30

Evanjelho: Lk. 1:1-4;4:14-21

 

                 Maluk sira, ohin, ita tama ona ba terceiro domingo, tempo comum.

               Maromak nia furar lia ohin convida ita atu hanoin iha Jesus nia knaar nebe atu halao. Nunee ita bele hare iha Evangelho ohin nian koalia kona ba Jesus nia knaar iha vida publika. Buat hotu hahu ho nia Baptismo iha mota jordao, nebe ita celebra iha dia 9 liu ba. Iha nia Baptismo, Aman Maromak declara ba publico: Nee Hau nia Oan Doben, imi rona nia ba. Liu tiha nia Baptismo, Jesus ba Nazare, hanesan ita rona, ba fatin nebe nia boot ba. Nia too iha loron sabado ida no nia tama iha Sinagoga, hafoin nia kair iha escritura hosi profeta Isaias nian no hahu lee, iha passagem nebe dehan: Nai nia espirito horik ho hau. Nia haruka hau atu haklaken liberdade ba sira nebe hein, foo matan diak ba delek sira, liberdade ba terus sira, no haklaken Maromak nia domin rohan laek. Hafoin nia estrega fila fali escritura nee, Nia dehan:  Hahu ohin, buat hotu nebe imi rona, iha escritura nee.

               Needuni, maun-alin sira, ohin Jesus convida ita atu participa iha ninia kanaar ida nee. Katak Jesus mos sei haruka ita lori liberdade ba ema sira nebe hein, matan diak ba delek sira no liberdade ba sira nebe terus. Nia la hare ba ita nee se, maibe nia convite  ita hotu, kiik eh boot, katuas eh ferik, atu hadaet, hatutan Maromak nia lia-fuan salvacao nian ba ema hotu.

                Hanesan ita rona iha segunda leitura, ita hotu-hotu halo parte iha ida deit iha Kristo. Kristo maka ita nia ulun no ita hotu parte isin lolon nebe halo isin ida deit iha Kristo. Ne’e duni atu haklaken knaar salvação nian, la’os deit amo sira eh madres sira, maibe ita hotu. No oinsa? Liu  hosi ita nia lia-fuan, liu hosi ita nia hahalok no liu hosi ita nia moris.

 

   Wainhira iha ita nia moris ita nia hahalok nebe los, tuir ita nia lia-fuan, ema seluk sei hare iha ita katak la’os ita mak moris, maibe Maromak mak moris iha ita. Maibe wainhira ita nia lia-fuan la tuir ita nia hahalok sira, mak ema sei hadook-an hosi ita, tamba ema la fiar ita, ema hare la’os ita mak moris maibe buat a’at mak moris iha ita.

    Ne’e duni, mai ita moris tuir Maromak nia futar lian atu ita nia aan no mos ema seluk bele hetan salvação. Tamba ne’e ho ita nia domin no laran luak, ita bele lori ema nebe terus, hetan Maromak nia ksolok.

                 Ita la’os Jesus maibe Jesus convida ita atu lori nia fatin hato’o ba ema seluk Maromak nia lia fuan salvação nian iha mundo nee. Tamba ne’e ita mos bele sai Jesus nia saseluk hodi ajuda ema seluk nebe precisa tebes ita nia tulun ba sira, liu liu Maromak nia salvação.

                 Ne’e duni, ohin ita reza mos ba missionários sira hotu iha mundo atu Maromak haraik nafatin kbiit ba sira hodi continua sira nia kna’ar salvação nian ba ema seluk iha mundo. Ita reza mos ba ita nia an atu haklaken nafatin Maromka nia Salvação ba ema seluk liu hosi ita nia moris no hahalok lor-loron nian.

Amen.

.

Reflesaun husi: Irmã Rosaria Aurea Ximenes, OP

 

 

Kontinua Le'e