HAKLAKEN MAROMAK NIA LIAFUAN LIU HUSI ITA NIA MORIS LOR-LORON

 

DOMINGO BA DALA III TEMPU BAIBAIN NIAN

 

1a. Leitura: Ne. 8:2-4a,5-6,8-10

2a. Leitura: 1Cor. 12:12-30

Evanjelho: Lk. 1:1-4;4:14-21

 

                 Maluk sira, ohin, ita tama ona ba terceiro domingo, tempo comum.

               Maromak nia furar lia ohin convida ita atu hanoin iha Jesus nia knaar nebe atu halao. Nunee ita bele hare iha Evangelho ohin nian koalia kona ba Jesus nia knaar iha vida publika. Buat hotu hahu ho nia Baptismo iha mota jordao, nebe ita celebra iha dia 9 liu ba. Iha nia Baptismo, Aman Maromak declara ba publico: Nee Hau nia Oan Doben, imi rona nia ba. Liu tiha nia Baptismo, Jesus ba Nazare, hanesan ita rona, ba fatin nebe nia boot ba. Nia too iha loron sabado ida no nia tama iha Sinagoga, hafoin nia kair iha escritura hosi profeta Isaias nian no hahu lee, iha passagem nebe dehan: Nai nia espirito horik ho hau. Nia haruka hau atu haklaken liberdade ba sira nebe hein, foo matan diak ba delek sira, liberdade ba terus sira, no haklaken Maromak nia domin rohan laek. Hafoin nia estrega fila fali escritura nee, Nia dehan:  Hahu ohin, buat hotu nebe imi rona, iha escritura nee.

               Needuni, maun-alin sira, ohin Jesus convida ita atu participa iha ninia kanaar ida nee. Katak Jesus mos sei haruka ita lori liberdade ba ema sira nebe hein, matan diak ba delek sira no liberdade ba sira nebe terus. Nia la hare ba ita nee se, maibe nia convite  ita hotu, kiik eh boot, katuas eh ferik, atu hadaet, hatutan Maromak nia lia-fuan salvacao nian ba ema hotu.

                Hanesan ita rona iha segunda leitura, ita hotu-hotu halo parte iha ida deit iha Kristo. Kristo maka ita nia ulun no ita hotu parte isin lolon nebe halo isin ida deit iha Kristo. Ne’e duni atu haklaken knaar salvação nian, la’os deit amo sira eh madres sira, maibe ita hotu. No oinsa? Liu  hosi ita nia lia-fuan, liu hosi ita nia hahalok no liu hosi ita nia moris.

 

   Wainhira iha ita nia moris ita nia hahalok nebe los, tuir ita nia lia-fuan, ema seluk sei hare iha ita katak la’os ita mak moris, maibe Maromak mak moris iha ita. Maibe wainhira ita nia lia-fuan la tuir ita nia hahalok sira, mak ema sei hadook-an hosi ita, tamba ema la fiar ita, ema hare la’os ita mak moris maibe buat a’at mak moris iha ita.

    Ne’e duni, mai ita moris tuir Maromak nia futar lian atu ita nia aan no mos ema seluk bele hetan salvação. Tamba ne’e ho ita nia domin no laran luak, ita bele lori ema nebe terus, hetan Maromak nia ksolok.

                 Ita la’os Jesus maibe Jesus convida ita atu lori nia fatin hato’o ba ema seluk Maromak nia lia fuan salvação nian iha mundo nee. Tamba ne’e ita mos bele sai Jesus nia saseluk hodi ajuda ema seluk nebe precisa tebes ita nia tulun ba sira, liu liu Maromak nia salvação.

                 Ne’e duni, ohin ita reza mos ba missionários sira hotu iha mundo atu Maromak haraik nafatin kbiit ba sira hodi continua sira nia kna’ar salvação nian ba ema seluk iha mundo. Ita reza mos ba ita nia an atu haklaken nafatin Maromka nia Salvação ba ema seluk liu hosi ita nia moris no hahalok lor-loron nian.

Amen.

.

Reflesaun husi: Irmã Rosaria Aurea Ximenes, OP